បាតុកម្មផ្ទុះនៅប្រទេសសង្គមនិយម វ៉េណេស៊ុយអេឡា
ចុះផ្សាយនៅថ្ងៃ៖
ស្តាប់ - ០៤:១៤
រហូតមកដល់ចុងសប្តាហ៍ មុននេះ បាតុកម្មរបស់ចលនានិស្សិតមិនចុះថមថយ នៅរដ្ឋធានី ការ៉ាកាស ក្នុងប្រទេស វ៉េណេស៊ុយអេឡា។ កាលពីប៉ុន្មានសប្តាហ៍មុន ក្រុមនិស្សិត វ៉េណេស៊ុយអេឡា ចុះថ្នល់ធ្វើបាតុកម្មដើម្បីថ្កោលទោសនយោបាយសេដ្ឋកិច្ច របស់រដ្ឋាភិបាល និងអសន្តិសុខនៅក្នុងប្រទេស។ ប៉ុន្តែ នៅចុងសប្តាហ៍នេះ ពួកនិស្សិតដែលមានចំនួនមិនចេះថមថយ បានសម្រុកធ្វើបាតុកម្មដើម្បីទាមទារឲ្យរដ្ឋាភិបាលដោះលែងគ្នីគ្នារបស់ពួកគេ និង ជាពិសេសបំផុត គឺទាមទារឲ្យលោកប្រធានាធិបតីNicolas Manduro ចុះចេញពីតំណែង។
វ៉េណេស៊ុយអេឡាជាប្រទេសផលិតប្រេងដ៏សំខាន់មួយ នៅក្នុងពិភពលោក និងជាប្រទេសស្ថាបនិកអង្គការប្រទេសនាំចេញប្រេងOPEP។ តាមអង្គការ វ៉េណេស៊ុយអេឡាមានសំបូរអណ្តូងប្រេងដែលមានប្រេង ជិត ៣០០ពាន់លានធុង គឺជាប្រទេសធំទីមួយ ក្នុងពិភពលោក ដែលសំបូរមាសខ្មៅជាងគេ នាំមុខទាំងប្រទេសអារ៉ាប៊ី សាអ៊ូឌីតទៅទៀត។
ការបូមប្រេងបានប្រមាណ ២ លាន ៥សែនធុង ក្នុងមួយថ្ងៃ ធ្វើឲ្យ វ៉េណេស៊ុយអេឡាក្លាយជាប្រទេសផលិតប្រេងទី ១១ ក្នុងពិភពលោក។ យោងតាមធនាគារពិភពលោក វ៉េណេស៊ុយអេឡាជាប្រទេសសេដ្ឋកិច្ចធំទីបី នៅអាមេរិកឡាទីន បន្ទាប់ពីប្រេស៊ីល និងម៉ិចស៊ិក នេះបើនិយាយពីផលិតផលក្នុងស្រុកសរុប ដែលមានប្រមាណ ៣៥០ ពាន់លានដុល្លារ។
កេសថវិការបស់ វ៉េណេស៊ុយអេឡាតែងតែពេញជានិច្ចដោយសារការនាំចេញប្រេង។ ក្នុងប្រទេសដ៏សំបូរប្រេងនេះ ប្រជាជនបានទទួលសាំង សឹងមិនគិតថ្លៃពីរដ្ឋ ដោយសាំងមួយលីត្រមានតម្លៃត្រឹមតែមួយសង់ទីម អឺរ៉ូ ឬស្មើនឹង៤០រៀល លុយខ្មែរ។ ប្រសិនបើកេសរដ្ឋមិនខ្វះលុយ ដោយមកពីការលក់ប្រេង ហើយប្រជាជនប្រើសាំង សឹងតែមិនគិតថ្លៃ ហេតុអ្វីបានជានិស្សិតធ្វើបាតុកម្មប្រឆាំងនឹងនយោបាយសេដ្ឋកិច្ចរបស់រដ្ឋាភិបាលទៀត?
ប៉ុន្មានសប្តាហ៍មកហើយ ក្រុមនិស្សិតបានចេញធ្វើបាតុកម្ម ជំនួសឲ្យប្រជាជន ដើម្បីបរិហារពីអតិផរណា ដែលឡើងខ្ពស់កប់ពពក មិនដែលមាន គឺច្រើនជាង ៥០ភាគរយ ទៅទៀត។ ក្រៅតែពីរងគ្រោះដោយសារអតិផរណា ទំនិញ ប្រជាជន វ៉េណេស៊ុយអេឡារងគ្រោះផងដែរនឹងកង្វះទំនិញ ដែលជាញឹកញយ ដាច់ អស់ពីស្តុក នៅតាមហាងទំនិញ ដូចជាទឹកដោះគោ ឬក្រដាសអនាម័យជាដើម។
វ៉េណេស៊ុយអេឡាជាប្រទេសកំពុងអភិវឌ្ឍន៍ សំបូរដោយឧស្សាហកម្ម ប៉ុន្តែ ក៏ប្រទេសដែលនាំចូលច្រើននូវចំណីអាហារពីបរទេស។ តាមអ្នកជំនាញសេដ្ឋកិច្ច ដោយសារតែរដ្ឋជាអ្នកកំណត់ថ្លៃ ពោលគឺបញ្ចុះតម្លៃទំនិញ នៅតាមទីផ្សា ទំនិញទាំងឡាយតែងតែលក់ឆាប់អស់ពីស្តុក។ ដោយសារមិនសូវមានទំនិញច្រើន ទំនិញដែលមានដាក់លក់ នៅលើទីផ្សារតែងតម្លៃថ្លៃកប់ពពក។
រដ្ឋាភិបាលរបស់លោកប្រធានាធិបតីម៉ាឌូរ៉ូវិញបានចោទប្រកាន់ក្រុមហ៊ុនឯកជនតូចៗ ថា ជាក្រុមកេងចំណេញ ដោយលួចទិញទំនិញ យកមកស្តុក និងបង្កើនតម្លៃខ្ពស់។ តាមលោកប្រធានាធិបតីម៉ាឌូរ៉ូ ក្រុមនេះមានបក្សពួក ជាក្រុមបរទេស និងក្រុមហ្វាស៊ីស ដែលចង់គំរាមកំហែងស្ថិរភាពនយោបាយរបស់រដ្ឋាភិបាល។
ក្រុមនេះ ដើរយុទ្ធសាស្រ្តស្រដៀងគ្នាលើក្រដាសប្រាក់ដុល្លារ។ នៅពេលរដ្ឋគ្រប់គ្រងតឹងខ្លាំង និងជាអ្នកកំណត់អត្រាប្តូរលុយដុល្លារ ក្នុងប្រទេសនោះ ចរន្តដោះដូរលុយនៅទីផ្សារដូរលុយងងឹត មានកាន់តែច្រើន រហូតឲ្យ ធនាគារជាតិ វ៉េណេស៊ុយអេឡាជួបវិបត្តិខ្វះសាច់ប្រាក់។
សម្រាប់ក្រុមនិស្សិតបាតុករ រដ្ឋាភិបាលខ្ជីរខ្ជាមិនអាចការពារសុវត្ថិភាពជូនប្រជាជន នៅពេលដែលអសន្តិសុខកាន់តែមានចំនួនច្រើន នៅក្នុងប្រទេស។ អសន្តិសុខសម្រាប់ប្រជាជន ក្រុមនិស្សិតទាំងនោះ បានថ្កោលទោសផងដែរ ដល់ក្រុមប្រដាប់អាវុធ ដែលបានបាញ់រះទៅលើក្រុមបាតុករ កាលពីថ្ងៃពុធសប្តាហ៍មុន រហូតសម្លាប់មនុស្សពីរនាក់។
នៅ វ៉េណេស៊ុយអេឡា រដ្ឋាភិបាលបានព្យាយាមចែកចាយ ផលចំណេញពីប្រេងដល់ប្រជាជន ប៉ុន្តែ របបនយោបាយបែបសង្គមនិយម គឺរដ្ឋជាអ្នកគ្រប់គ្រង និងកំណត់ថ្លៃនៅក្នុងទីផ្សារ ហាក់លែងដំណើរការ ឬលែងមានប្រសិទ្ធិភាពហើយ នៅពេលនេះ។ ១៦ឆ្នាំមកហើយ ដែលរដ្ឋលក់ សាំង សឹងមិនគិតថ្លៃដល់ប្រជាជន។ នយោបាយនេះ ធ្វើឲ្យរដ្ឋខាតបង់ថវិកាប្រមាណ ១២ ពាន់៥រយ លានដុល្លារ ក្នុងមួយឆ្នាំៗ។ កាលពីថ្ងៃពុធកន្លងទៅ រដ្ឋាភិបាលរបស់លោកប្រធានាធិបតី វ៉េណេស៊ុយអេឡាបានលើកឡើងពីយុទ្ធសាស្រ្តដំឡើងថ្លៃប្រេង ទៅថ្ងៃអនាគត។
លោកម៉ាឌូរ៉ូបានលើកឡើងពីនយោបាយនេះ យ៉ាងប្រយ័ត្នប្រយែងបំផុត ដោយបានបញ្ជាក់ថា វានឹងមិនធ្វើឡើង នៅក្នុងពេលខាងមុខឆាប់ៗនេះ ឬធ្វើឡើងដោយសង្រ្គប់ដែរនោះដែរ។ នយោបាយផ្តល់ប្រេងសឹងមិនគិតថ្លៃ បានចាក់ចូលជ្រៅទៅក្នុងទម្លាប់ និងបេះដូងរបស់ប្រជាជន វ៉េណេស៊ុយអេឡា។ លោកប្រធានាធិបតីម៉ាឌូរ៉ូប្រយ័ត្នប្រយែង ក្នុងរឿងដំឡើងថ្លៃប្រេងសាំង ព្រោះថា គ្រប់ប្រជាជន វ៉េណេស៊ុយអេឡា នៅចងចាំមិនភ្លេចពីមេរៀន ចាស់ ដែល វ៉េណេស៊ុយអេឡា បានជួបប្រទះ ក្នុងអតីតកាល។ កាលពីឆ្នាំ ១៩៨៩ ចលនាងើបបះបោររបស់ប្រជាជន នៅការ៉ាកាហ្សូ ធ្លាប់បានដុតទីក្រុងឲ្យឆេះសន្ធោសន្ធៅ និងសម្លាប់មនុស្សអស់ជាច្រើនរយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ