លោកអូបាម៉ា បញ្ជាក់ជំហរមិនចុះសម្រុងជាមួយអ៊ីស្រាអែល ក្នុងសំណុំរឿងនុយក្លេអ៊ែរអ៊ីរ៉ង់
លោកនាយករដ្ឋមន្ត្រីអ៊ីស្រាអែល នឹងត្រូវឡើងថ្លែងសុន្ទរកថានៅចំពោះមុខសភានិងព្រឹទ្ធសភាអាមេរិក នៅថ្ងៃអង្គារនេះ ក្នុងខណៈដែលកិច្ចចរចានុយក្លែអ៊ែរអ៊ីរ៉ង់ ជាមួយក្រុមប្រទេសមហាអំណាច ៥+១ កំពុងប្រព្រឹត្តទៅនៅប្រទេសស៊្វីស។ នាយករដ្ឋមន្ត្រីអ៊ីស្រាអែល បានប្រកាសត្រៀមធ្វើគ្រប់យ៉ាងរារាំងមិនឱ្យកិច្ចព្រមព្រៀងនុយក្លេអ៊ែរអ៊ីរ៉ង់ចេញជារូបរាងបាន។ ចំណែកលោកប្រធានាធិបតីអាមេរិក ដែលប្រាថ្នាស្វែងរកកិច្ចព្រមព្រៀងជាប្រវត្តិសាស្ត្រជាមួយអ៊ីរ៉ង់ មានការរង្គៀសចិត្តយ៉ាងខ្លាំងនឹងវត្តមានរបស់ប្រមុខរដ្ឋាភិបាលអ៊ីស្រាអែលនៅទីក្រុងវ៉ាស៊ីនតោន និងបានបញ្ជាក់ជាថ្មី អំពីជំហរផ្ទុយគ្នាជាមួយនឹងលោកនេតាន់យ៉ាហ៊ូក្នុងសំណុំរឿងនុយក្លេអ៊ែរ។ តាំងពីឡើងកាន់អំណាចមកលោកអូបាម៉ា និងនេតាន់យ៉ាហ៊ូ ពុំដែលមានទំនាក់ទំនងរលូននឹងគ្នាទេ ហើយទំនាក់ទំនងបែបនេះទំនងជាត្រូវបន្តអូសបន្លាយរហូតដល់ចប់អាណត្តិតែម្តង។
ចុះផ្សាយនៅថ្ងៃ៖
លោកអូបាម៉ា និងលោកនេតាន់យ៉ាហ៊ូ នៅល្ងាចថ្ងៃចន្ទម្សិលមិញ បានលាតត្រដាងជំហរខ្វែងគ្នា ជាសាធារណៈ។ លោកប្រធានាធិបតីអាមេរិកបានចោទប្រកាន់ លោកនេតាន់យ៉ាហ៊ូ ថាយល់ខុសក្នុងអតីតកាល លើសំណុំរឿងនុយក្លេអ៊ែរអ៊ីរ៉ង់ -លើមូលដ្ឋានគ្រឹះនៃកិច្ចព្រមព្រៀងចុងក្រោយដែលក្រុមប្រទេសមហាអំណាច ៥+១ (សហរដ្ឋអាមេរិក រុស្ស៊ី ចិន បារាំង អង់គ្លេស និងអាល្លឺម៉ង់) កំពុងសាកល្បងស្វែងរក ជាមួយអ៊ីរ៉ង់។ លោកអូបាម៉ា បានយកកិច្ចព្រមព្រៀងបឋម លើកដំបូង រវាងអាមេរិកនិងអ៊ីរ៉ង់ កាលពីចុងឆ្នាំ២០១៣មកធ្វើជាបង្អែករិះគន់។
កិច្ចព្រមព្រៀងដែលអ៊ីរ៉ង់មានកាត្វកិច្ចផ្អាកសកម្មភាពនុយក្លេអ៊ែរមួយភាគជាថ្នូរនឹងការលើកទណ្ឌកម្មមួយភាគ បានរងការជំទាស់យ៉ាងខ្លាំងនិងរិះគន់យ៉ាងខ្លាំងពីអ៊ីស្រាអែល។ តែគឺក្នុងរយៈពេលនោះហើយដែលគេបានមើលឃើញពិតពីកម្មវិធីនុយក្លេអ៊ែរអ៊ីរ៉ង់។ នេះបើតាមប្រសាសន៍លោកអូបាម៉ា។
សម្រាប់លោកអូបាម៉ា ការចរចានេះមានសំណាងរកឃើញកិច្ចព្រមព្រៀងតិចតួចណាស់។ កម្មវត្ថុរបស់សហរដ្ឋអាមេរិក គឺចង់ឃើញអ៊ីរ៉ង់ផ្អាកសកម្មភាពនុយក្លេអ៊ែរ ជាលក្ខណៈពិតត្រង់ ផ្អាកសកម្មភាពបរមាណូរយៈពេលយ៉ាងហោច១០ឆ្នាំ នឹងត្រូវដាក់ឱ្យស្ថិតនៅក្រោមការធ្វើអធិការកិច្ចយ៉ាងទៀងទាត់ទៀត។
នេះជាសេចក្តីថ្លែងការណ៍ យ៉ាងចំៗ របស់លោកអូបាម៉ា ទៅកាន់ភ្នាក់ងារសារព័ត៌មានReuters ថ្ងៃចន្ទម្សិលមិញ ពោលគឺមុនពេលដែលលោកនាយករដ្ឋមន្ត្រីអ៊ីស្រាអែល ត្រូវឡើងធ្វើសុន្ទរកថានៅមុខសភាអាមេរិក និងក្នុងពេលដែលវ៉ាស៊ីនតោននិងតេអេរ៉ង់កំពុងបន្តកិច្ចចរចាផ្តាច់ព្រ័ត្រនៅប្រទេសស្វ៊ីសផង។
លោកនេតាន់យ៉ាហ៊ូ គ្រោងនឹងទម្លាយអំពីចំណុចសំខាន់ៗនៃកិច្ចចរចានុយក្លេអ៊ែរអ៊ីរ៉ង់ ដែលកន្លងមកត្រូវបានលាក់បិទជិតឈឹង ទៅកាន់សភាអាមេរិកនៅល្ងាចនេះ។ ការបង្ហើបព័ត៌មានដែលអាចនឹងធ្វើឱ្យរំខានដល់ការចរចា។ នេះបើតាមអ្នកប្រភពការទូតអាមេរិក។ ប៉ុន្តែសម្រាប់លោកនាយករដ្ឋមន្ត្រីអ៊ីស្រាអែល លោកបានអះអាងនៅល្ងាចមិញមុនអន្តរាគមន៍របស់លោកអូបាម៉ា ថាលោកមានកាតព្វកិច្ច មានបេសកកម្មជាប្រវត្តិសាស្ត្រ ត្រូវបញ្ចេញមតិយោបល់ ច្បាស់ៗ ចំៗ ផ្ទុយនឹងរដ្ឋបាលអូបាម៉ា តែដើម្បីប្រយោជន៍រួមរបស់ពលរដ្ឋជ្វីហ្វ។ សូមបញ្ជាក់ថា សុន្ទរកថារបស់ប្រមុខរដ្ឋាភិបាលអ៊ីស្រាអែលនៅសភាអាមេរិក មានលក្ខណៈប្រវត្តិសាស្ត្រស្រាប់ទៅហើយ ! លោកជានាយករដ្ឋមន្ត្រីបរទេសទីមួយដែលបានថ្លែងសុន្ទរកថាដល់ទៅបីលើកនៅមុខសភាអាមេរិក (លើកទីមួយនៅឆ្នាំ១៩៩៦ និងលើកទីពីរនៅឆ្នាំ២០១១)។
លោកនេតាន់យ៉ាហ៊ូបានធានាអះអាងថា វត្តមានជាពិសេសរបស់លោកនាពេលនេះ គ្មានបង្កប់ភាព មិនគោរពចំពោះប្រធានាធិបតីអាមេរិកឡើយ។ ឯចំណែកប្រធានាធិបតីអាមេរិក ដែលថ្វីបើបានបញ្ជក់ជំហរផ្ទុយគ្នាស្ឡះរវាងរដ្ឋបាលអាមេរិកនិងអ៊ីស្រាអែលលើមធ្យោបាយទប់ស្កាត់អ៊ីរ៉ង់កុំឱ្យមានអាវុធនុយក្លេអ៊ែរមែន តែក៏បានប្រើបទសម្ភាសន៍ម្សិលមិញនេះកាយកប់មិនឱ្យឃើញ មានសំណល់ មិនល្អ ល្អក់កករដល់ទំនាក់ទំនងទ្វេភាគី ទៅថ្ងៃអនាគត។
“មិនមែនបញ្ហាបុគ្គល”
វ៉ាស៊ីនតោន និងហ្ស៊េរុយសាឡិម មានទំនាក់ទំនងតានតឹងនឹងគ្នាខ្លាំង នារយៈពេលចុងក្រោយនេះ ប៉ុន្តែ លោកប្រធានាធិបតីអាមេរិកផ្ទាល់ខ្លួនបានបញ្ជាក់ថាមិនមែនជាបញ្ហាបុគ្គល “អូបាម៉ា-នេតាន់យ៉ាហ៊ូ” គឺបណ្តាលមកពីការមិនគោរពដំណើរការនយោបាយក្នុងប្រទេសអ៊ីស្រាអែល។
ប៉ុន្តែតាំងពីឡើងកាន់អំណាចមក បុរសរដ្ឋទាំងពីរ ពុំដែលមានទំនាក់ទំនងរលូននឹងគ្នាទេ។ នៅឆ្នាំ២០០៩ លោកអូបាម៉ា ទើបជាប់ឆ្នោតជាប្រធានាធិបតីអាមេរិកថ្មីថ្មោង បានប្រកាសនៅទីក្រុងគែរប្រទេសអេហ្ស៊ីប ឱ្យអ៊ីស្រាអែលបញ្ឈប់សកម្មភាពធ្វើអាណានិគមកិច្ចលើដែនដីប៉ាឡេស្ទីន។ ព្រមព្រៀងធ្វើតាមបានតែ១០ខែ រដ្ឋាភិបាលអ៊ីស្រាអែលរបស់លោកនេតាន់យ៉ាហ៊ូ បានបង្កើននិងប្រកាសជាហូរហែសាងសង់លំនៅដ្ឋាននៅស៊ីហ្ស័កដានីនិងហ្ស៊េរុយសាឡិមខាងកើតទៀត។
សហរដ្ឋអាមេរិក ចង់យកគំនូសព្រំដែនឆ្នាំ១៩៦៧មកធ្វើជាមូលដ្ឋាននៃកិច្ចចរចាសន្តិភាពអ៊ីស្រាអ៊ែល-ប៉ាឡេស្ទីន ?! នៅឆ្នាំ២០១១ លោកអូបាម៉ា សុខចិត្តទទួលជួប លោកនេតាន់យ៉ាហ៊ូមួយទល់នឹងមួយនៅសេតវិមាន បន្ទាប់មកនៅសភា ក្រោមស្នូរទះដៃយ៉ាងកងរំពង។ ឥលូវលោកនេតាន់យ៉ាហ៊ូរង់ចាំស្នូរទះដៃបែបនេះទៀត នៅយប់នេះ តែដើម្បីវាយប្រហារកិច្ចព្រមព្រៀងនុយក្លេអ៊ែរអ៊ីរ៉ង់ ដែលកំពុងចរចានៅឡើយ។
នៅឆ្នាំ២០១២ លោកនេតាន់យ៉ាហ៊ូ បន់ឱ្យលោកអូបាម៉ាចាញ់ឆ្នោត។ តែលើកនេះដល់វេនលោកនាយករដ្ឋមន្ត្រីម្តង ដែលកំពុងចេញឃោសនាបោះឆ្នោតសភា។ ភាពតានតឹងរវាងអាមេរិកនិងអ៊ីស្រាអែល អាចបណ្តាលមកពីមានតាកទិកខុសគ្នាក្នុងសំណុំរឿងអ៊ីរ៉ង់ តែប្រសិនបើលោកនេតាន់យ៉ាហ៊ូឈ្នះឆ្នោតនៅខែមីនានេះ នោះប្រមុខដឹកនាំទាំងពីរត្រូវទ្រាំមើលមុខគ្នាយូរទៀត គឺរហូតដល់លោកអូបាម៉ាចប់អាណត្តិជាប្រធានាធិបតី នៅចុងឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ