អាមេរិកចោទជនជាតិចិន៦នាក់ពីបទចារកម្មសេដ្ឋកិច្ច និងការលួចការសម្ងាត់ពាណិជ្ជកម្ម
កាលពីថ្ងៃអង្គារ ក្រសួងយុត្តិធម៌អាមេរិកបានប្រកាសថា ជនជាតិចិនប្រាំមួយនាក់ត្រូវបានចោទប្រកាន់ ពីបទចារកម្មសេដ្ឋកិច្ចនិងលួចការសម្ងាត់ពាណិជ្ជកម្ម ដើម្បីជាប្រយោជន៍សម្រាប់សាកលវិទ្យាល័យ និងក្រុមហ៊ុនដែលគ្រប់គ្រងដោយប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
បុរសទាំងប្រាំមួយនាក់នោះ រួមមានសាស្រ្តាចារ្យសាកលវិទ្យាល័យនៅប្រទេសចិនចំនួនបីនាក់ ត្រូវបាន គេចោទប្រកាន់ថាបានលួចបច្ចេកវិទ្យាដ៏សំខាន់របស់ក្រុមហ៊ុនចំនួនពីរគឺ Avago Technologies និង Skyworks Solutions ដែលជាក្រុមហ៊ុនឧបករណ៍អេឡិចត្រូនិករបស់អាមេរិក នេះបើយោងតាមលិខិតចោទប្រកាន់។ ផែនការងងឹតនេះត្រូវបានគេដឹងថាបានចាប់ផ្តើមតាំងពីឆ្នាំ២០០៦ម៉្លេះ ហើយមានគោលបំណងលួចការសម្ងាត់ពាណិជ្ជកម្មរបស់ក្រុមហ៊ុន Avago ដែលមានមូលដ្ឋាននៅរដ្ឋ California និងក្រុមហ៊ុន Skyworks ឋិតក្នុងរដ្ឋ Massachusetts (ភាគឦសាន) ជាពិសេសគឺបច្ចេកវិទ្យា ដែលគេប្រើនៅក្នុងទូរស័ព្ទដៃដើម្បីស្ទង់សញ្ញា និងបង្កើនសមត្ថភាពបច្ចេកទេស។
ជាផែនការដែលត្រូវបានរៀបចំក្រោមការត្រួតពិនិត្យរបស់មន្ត្រីនៃសាកលវិទ្យាល័យ Tianjin ដែលជាសាកលវិទ្យាល័យដ៏សំខាន់មួយរបស់ក្រសួងអប់រំប្រទេសចិន ដោយប្រើក្រុមហ៊ុនមួយឈ្មោះ ROFS Microsystems ជាខែលបិតបាំងមានទីតាំងស្ថិតក្នុងកោះ Caymans នៃតំបន់ការ៉ាអ៊ីប និងមានតួនាទីជាអ្នកផលិតបច្ចេកវិទ្យាទាំងនេះ។
សាស្រ្តាចារ្យម្នាក់ចំណោមនោះឈ្មោះ Hao Zhang ត្រូវបានឃាត់ខ្លួនកាលពីថ្ងៃសៅរ៍នៅពេលធ្វើដំណើរមកដល់សហរដ្ឋអាមេរិក នៅឯអាកាសយាន្តដ្ឋានរដ្ឋ Los Angeles ចំណែកជនជាប់ចោទប្រាំនាក់ផ្សេងទៀតកំពុងនៅប្រទេសចិននៅឡើយ នេះបើតាមអ្នកនាំពាក្យរបស់ក្រសួងយុត្តិធម៌អាមេរិក។
ជនជាប់ចោទ Hao Zhang មានអាយុ៣៦ឆ្នាំធ្លាប់ជានិយោជិតធ្វើការឲ្យក្រុមហ៊ុន Skyworks និងក៏ជាសាស្រ្តាចារ្យ នៃសាកលវិទ្យាល័យ Tianjin ផងដែរ។ ឯឈ្មោះ Wei Pang អាយុ៣៥ឆ្នាំ ជាសាស្រ្តាចារ្យ នៃសាកលវិទ្យាល័យ Tianjin និងធ្លាប់ជានិយោជិតធ្វើការឲ្យក្រុមហ៊ុន Avago។ អ្នកទាំងពីរបានជួបគ្នា កាលពីរៀនថ្នាក់បណ្ឌិតវិស្វកម្មអគ្គិសនីនៅសាកលវិទ្យាល័យអាមេរិក Southern California និងធ្លាប់ដឹកនាំការស្រាវជ្រាវជាមួយគ្នាក្រោមការឧបត្ថម្ភហិរញ្ញវត្ថុពីភ្នាក់ងារស្រាវជ្រាវនៃក្រសួងការពារជាតិអាមេរិក។
ចំណែកសាស្រា្តចារ្យម្នាក់ទៀតនៃសាកលវិទ្យាល័យ Tianjin ដដែល ធ្លាប់ជាអតីតនិស្សិតរបស់សាកលវិទ្យាល័យ Southern California របស់សហរដ្ឋអាមេរិក និងមានតួនាទីបច្ចុប្បន្នជាអ្នកគ្រប់គ្រងក្រុមហ៊ុនខែលរបស់ចិន ROFS Microsystems ខាងលើ។
ជារួមជនល្មើសទាំងប្រាំមួយនាក់ត្រូវបានរងការចោទប្រកាន់ពីបទចារកិច្ចសេដ្ឋកិច្ចនិងការលួចការសម្ងាត់ពាណិជ្ជកម្ម ដោយរំលោភលើកិច្ចព្រមព្រៀងពាណិជ្ជកម្មនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ