អភិបាលរដ្ឋ គ្រីស គ្រីស្ទី ប្រកាសបេក្ខភាពប្រធានាធិបតីឆ្នាំ២០១៦
អភិបាលរដ្ឋ គ្រីស គ្រីស្ទី ជាបុរសដែលមានបុគ្គលិកលក្ខណៈដ៏ខ្លាំងក្លា ដែលគេធ្លាប់បានចាត់ទុកថាជាផ្នែកមួយនៃក្តីសង្ឃឹមនៃគណបក្សសាធារណរដ្ឋ បានប្រកាសពីបេក្ខភាពរបស់ខ្លួនកាលពីថ្ងៃអង្គារម្សិលមិញ ដើម្បីចូលប្រឡូកក្នុងការប្រកួតប្រជែងការបោះឆ្នោតប្រធានាធិបតីអាមេរិកឆ្នាំ២០១៦ បើទោះជា មានរឿងអាស្រូវមួយចំនួនដែលធ្វើឲ្យរូបភាពរបស់លោកស្ថិតក្នុងភាពអាប់អួរយ៉ាងណាក៏ដោយ។
ចុះផ្សាយនៅថ្ងៃ៖
លោក Chris Christie អភិបាលរដ្ឋញ៉ូជើស៊ីបានប្រកាស កាលពីថ្ងៃអង្គារតាមអ៊ីមែលទៅកាន់អ្នកគាំទ្រ របស់លោកថា លោកនឹងឈរឈ្មោះជាបេក្ខភាពសម្រាប់ការបោះឆ្នោតប្រធានាធិបតីអាមេរិកឆ្នាំ២០១៦ នៅមុនពេលព្រឹត្តិការណ៍ផ្សាយបន្តផ្ទាល់អំពីការប្រកាសផ្ទាល់មាត់ពីបេក្ខភាពរបស់លោកពី Livingston High School ក្នុងរដ្ឋកំនើតរបស់លោក។ អភិបាលរដ្ឋរូបនេះមានអាយុ៥៣ឆ្នាំ មានដើមកំនើតក្នុងរដ្ឋ ញ៉ូជើស៊ី មានការបណ្តុះបណ្តាលខាងវិស័យច្បាប់។ លោកធ្លាប់ធ្វើជារដ្ឋអាជ្ញានៃរដ្ឋញ៉ូជើស៊ី ពីឆ្នាំ២០០២ ដល់២០០៨ និងបានជាប់ឆ្នោតធ្វើជាអភិបាលរដ្ឋញ៉ូជើស៊ីពីឆ្នាំ ២០១០រហូតមកដល់ពេលបច្ចុប្បន្ន។
កាលពីឆ្នាំ២០១១ លោកធ្លាប់ត្រូវបានគេចាត់ទុកថាជា ក្តីសង្ឃឹមនៃគណបក្សសាធារណរដ្ឋ ក្នុងការឈ្នះឆ្នោតប្រធានាធិបតីឆ្នាំ២០១២ តែកាលណោះលោកបានសម្រេចចិត្តមិនចូលរួមការប្រកួតប្រជែងទៅវិញ។ ទើបតែនៅពេលនេះលោកបានប្រកាសថា៖ ឥឡូវនេះខ្ញុំត្រៀមខ្លួនជាស្រេច ក្នុងការប្រកួតប្រជែង ដើម្បីប្រជាពលរដ្ឋសហរដ្ឋអាមេរិក។ ក៏ប៉ុន្តែ ក្នុងរយៈពេលបួនឆ្នាំចុងក្រោយនេះ មានការប្រែប្រួលជាច្រើនលើរូបភាពរបស់លោក ពិសេសគឺរឿងអាស្រូវកាលពីខែកញ្ញាឆ្នាំ២០១៣ ស្តីពីការបិទផ្លូវលើស្ពាន George Washington Bridge តភា្ជប់ជាមួយនឹងទីក្រុងញ៉ូយ៉ក រយៈពេលប្រាំថ្ងៃតាមការបញ្ជាពីរដ្ឋបាល របស់លោក ដែលបណ្តាលឲ្យមានការខឹងសម្បារយ៉ាងខ្លាំងពីពលរដ្ឋអ្នកប្រើប្រាស់ផ្លូវ និងបញ្ហាប្រជែង ខាងនយោបាយនៅខាងក្រោយការបិទផ្លូវនោះ។
រឿងរ៉ាវនេះទំនងជាហេតុផលធំមួយដែលបណ្តាលឲ្យការគាំទ្រលើបេក្ខភាពរបស់លោកមិនសូវ សមប្រកប។ ព្រោះយោងតាមការស្ទង់មតិថ្មីបំផុតរបស់ ABC News / វ៉ាស៊ីនតោនប៉ុស្តិ៍កាលពីខែមុន មានពលរដ្ឋអាមេរិកត្រឹម ២២ភាគរយប៉ុណ្ណោះ គាំទ្រលើបេក្ខភាពរបស់លោក ក្នុងខណៈពេលដែល ៤៨ភាគរយមិនគាំទ្រ។
បន្ទាប់ពីការប្រកាសបេក្ខភាពរបស់លោកនៅថ្ងៃអង្គារ លោក គ្រីស្ទី នឹងបន្តធ្វើយុទ្ធនាការទាក់ទាញការគាំទ្រ ក្នុងរដ្ឋ New Hampshire បន្តទៀតនៅក្នុងសប្តាហ៍នេះ តាមការជួបប្រជុំនិងទទួលទានអាហារពេលល្ងាច នៅតាមបណ្តា ក្រុងធំៗនានា។ បន្ទាប់មកលោកក៏នឹងបង្ហាញខ្លួននៅថ្ងៃសៅរ៍ទី ៤ ខែកក្កដា ជាថ្ងៃដង្ហែក្បួនក្នុងក្រុង Wolfeboro នាឱកាសបុណ្យជាតិរបស់សហរដ្ឋអាមេរិក។
ជាសរុប ខាងគណបក្សសាធារណរដ្ឋមានបេក្ខភាពចំនួន១៤រូបនិងខាងគណបក្សប្រជាធិបតេយ្យរបស់លោកប្រធានាធិបតីចប់អាណត្តិឆ្នាំ២០១៦ បារ៉ាក់ អូបាម៉ា មានចំនួន៤រូបដែលក្នុងនោះមានលោកស្រី ហ៊ីឡារី គ្លីនតុន អតីតរដ្ឋមន្រ្តីការបរទេស និងជាភរិយារបស់អតីតប្រធានាធិបតីប៊ីលឃ្លីនតុនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ