ជំងឺអេដស៍ ៖ បានទទួលថ្នាំពន្យារជីវិតកាន់តែឆាប់ ប្រសិទ្ធិភាពការពារជីវិតកាន់តែខ្ពស់
អ្នកស្រាវជ្រាវវិទ្យាសាស្ត្រ ដែលកំពុងជួបជុំនៅគ្នានៅប្រទេសកាណាដា ក្នុងសន្និសីទស្តីពីជំងឺស៊ីដា ពីថ្ងៃអាទិត្យទី ១៩ ដល់ ថ្ងៃពុធទី ២២កក្កដា បានអំពាវនាវឱ្យប្តូរវិធីសាស្ត្រព្យាបាលជំងឺស៊ីដា ដោយត្រូវផ្តល់ថ្នាំពន្យារជីវិតភ្លាម ដល់គ្រប់បុគ្គលមានឆ្លងមេរោគអេដស៍។ ពោលគឺនៅពេលរកឃើញមានការឆ្លងមេរោគភ្លាម គ្រូពេទ្យត្រូវផ្តល់ថ្នាំពន្យារជីវិតភ្លាម ដោយមិនត្រូវបង្អែរបង្អង់ រង់ចាំរហូតដល់អ្នកផ្ទុកមេរោគធ្លាក់ខ្លួនឈឺទេ ទើបបានទទួលថ្នាំឡើយ។
ចុះផ្សាយនៅថ្ងៃ៖
កាលពីជិត២០ឆ្នាំមុន ក្នុងសន្និសីទឆ្នាំ១៩៩៦ ក្រុមអ្នកស្រាវជ្រាវបានកត់ត្រាដំណាក់កាលដ៏សំខាន់មួយនៃប្រយុទ្ធប្រឆាំងនឹងជំងឺស៊ីដា ឬអេដស៍ ព្រោះបានប្រកាសរកឃើញលទ្ធផលដ៏គាប់ប្រសើរ នៃការព្យាបាលជំងឺ ដោយប្រើថ្នាំពន្យារជីវិតបីប្រភេទបញ្ចូលគ្នា។ ចាប់ពេលនោះមក អ្នកមានផ្ទុកមេរោគអេដស៍អាចបន្តជីវិតរស់រានដូចមនុស្សធម្មតាបាន មិនមើលប្រឈមនឹងការស្លាប់ភ្លាមទាំងស្រុង ប្រសិនបើបានទទួលថ្នាំ។
នៅថ្ងៃនេះក្រុមអ្នកស្រាវជ្រាវអាចបង្ហាញមោទនភាពថ្មី កត់ត្រាក្នុងប្រវត្តិសាស្ត្រវេជ្ជសាស្ត្របានបន្ថែមមួយរឿងទៀត ! ប្រកាសថា "កាន់តែឆាប់បានទទួលថ្នាំពន្យារជីវិត អង់ទីរ៉េត្រូវេរ៉ូ អ្នកមានផ្ទុកមេរោគអេដស៍ឬស៊ីដា កាន់តែមានសំណាងទ្វេដង អាចរស់បានយូរ និងមានសុខភាពល្អ !” នេះជាអនុសាសន៍ដែលក្រុមអ្នកវិទ្យាសាស្ត្របានចុះហត្ថលេខា នាឱកាសបើកសន្និសីទអន្តរជាតិរបស់សហគមន៍អន្តរជាតិស្តីពីជំងឺស៊ីដាលើកទី៨ នៅទីក្រុងវានកូវឺ ប្រទេសកាណាដា។
បើតាមការស្រាវជ្រាវថ្មីៗចុងក្រោយបានបង្ហាញថា ផ្តល់ថ្នាំពន្យារជីវិតនៅពេលរកឃើញមានផ្ទុកមេរោគស៊ីដាភ្លាម អាចការពារកុំឱ្យវីវ៉ុសស៊ីដាឆ្លងទៅដៃគូ ឬមនុស្សទីបី ហើយការផ្តល់ថ្នាំជាកិច្ចបង្ការ អាចការពារប្រកបដោយប្រសិទ្ធិភាពបុគ្គលប្រឈមនឹងគ្រោះថ្នាក់ឆ្លងវីរ៉ុស។ យុទ្ធនាការព្យាបាលសាកល្បងអន្តរជាតិ ទើបបិទបញ្ចប់កាលពីខែឧសភា អាចពង្រឹងសម្មតិកម្មខាងលើបាន ព្រោះថា អ្នកដែលបានទទួលថ្នាំពន្យារជីវិតតាំងពីដំបូងភ្លាម ជាងពាក់កណ្តាល (៥៣%) ឆ្លងផុតពីគ្រោះមរណៈ ឬគ្រោះកើតជំងឺឆ្លៀតឱកាសផ្សេងទៀត។
ក្រុមអ្នកស្រាវជ្រាវបានធានាអះអាងពីវេទិកាសន្និសីទថា ជាមួយនឹងការរកឃើញថ្មីនេះ គេនឹងអាចកាត់បន្ថយការចម្លងមេរោគស៊ីដាបាន៩៥% ប៉ុន្តែចាំបាច់ត្រូវឱ្យអ្នកទទួលត្រូវនយោបាយយល់ព្រមបញ្ចេញសកម្មភាពស្របតាមអនុសាសន៍លើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ