លោកអូបាម៉ា ទ្រាំលែងបាន ក្រោយហេតុការណ៍បាញ់រះសម្លាប់មនុស្សជាថ្មី
ហេតុការណ៍បាញ់រះសម្លាប់មនុស្សកាលពីថ្ងៃព្រហស្បតិ៍ ដែលបានកើតឡើងនៅក្នុងសកលវិទ្យាល័យមួយ នៃរដ្ឋអូរីហ្គុន សហរដ្ឋអាមេរិក បានធ្វើឲ្យសហរដ្ឋអាមេរិកតក់ស្លុតជាថ្មីម្តងទៀត។ យ៉ាងហោចណាស់ មានមនុស្សស្លាប់ ដោយសារគ្រាប់កាំភ្លើងចំនួន១០ នាក់ និងរបួស៧នាក់ផ្សេងទៀត។ លោកបារ៉ាក់ អូបាម៉ា បានធ្វើសន្និសីទកាសែតភ្លាមៗ ដោយលោកមិនបានលាក់លៀមនូវកំហឹងរបស់លោក ចំពោះហេតុការណ៍នេះទេ។ អ្វីដែលធ្វើឲ្យលោក អត់ទ្រាំមិនបាន គឺហេតុការណ៍បាញ់រះរបៀបនេះ បានកើតឡើងជារើយៗ ប៉ុន្តែច្បាប់ ស្តីពីការរិតបន្តឹងការគ្រប់គ្រងអាវុធ ដែលជាតំណោះស្រាយនោះ ត្រូវបានអ្នកតំណាងរាស្ត្រអាមេរិកមួយចំនួនប៉ែងជើងរហូត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
លោកបារ៉ាក អូបាម៉ា បានថ្លែង ដោយទប់កំហឹងមិនបាន ជាពិសេសដោយបានសង្កត់ធ្ងន់ថា វាល្មមដល់ពេលហើយ ដែលប្រជាជនអាមេរិកទាំងអស់ ងើបឈរឡើង ដាក់គំនៀបសង្កត់ ទៅលើតំណាងរាស្រ្តនិង សមាជិកព្រឹទ្ធសភាអាមេរិក ឲ្យគាំទ្រការបង្កើតច្បាប់ថ្មី ស្តីពីការគ្រប់គ្រងចរាចរណ៍អាវុធ។
លោកអូបាម៉ា បន្តថា ហេតុការណ៍បាញ់រះសម្លាប់មនុស្សរបៀបនេះ កើតឡើងសឹងតែជាប្រពៃណីទៅហើយនៅអាមេរិក ហើយរៀងរាល់លើក លោកនិយាយដដែលៗ ថាត្រូវតែធ្វើកំណែទម្រង់ លើការគ្រប់គ្រងអាវុធ ឲ្យបានតឹងរឹង មិនមែនសេរីដូចបច្ចុប្បន្ននេះទេ តែក៏ជារៀងរាល់លើកដែរ ដែលអ្នកតំណាងរាស្ត្រ និងសមាជិកព្រឹទ្ធសភាអាមេរិក មិនខ្ចីយកភ្នែកមើល ហើយព្យាយាមប៉ែងជើងរដ្ឋាភិបាល ដោយសារតែពួកគេបំរើផលប្រយោជន៍ ឲ្យក្រុមហ៊ុនផលិតអាវុធ។
លោកបន្តទៀតថា ថ្ងៃនេះ លោកសូមឲ្យប្រជាជនអាមេរិកទាំងអស់ ពិចារណា ថាអ្វីខ្លះ ដែលគេអាចធ្វើបានដើម្បីបញ្ចប់អំពើសោកនាដកម្មទាំងអស់នេះ ព្រោះមិនមែនគ្រាន់តែធ្វើការបន់ស្រន់ សម្រក់ទឹកភ្នែកស្តាយជីវិតមនុស្សដែលស្លាប់ វាគ្រប់គ្រាន់នោះទេ។ ប្រជាជនអាមេរិកត្រូវចូលរួមជាមួយរដ្ឋាភិបាល ដើម្បីជំរុញការធ្វើច្បាប់ថ្មី ជាច្បាប់គ្រប់គ្រងអាវុធ ជាច្បាប់ដែលនឹងអាចការពារជីវិតមនុស្ស ការពារកូនចៅជំនាន់ក្រោយ ឲ្យរស់រានក្នុងសង្គមមួយ ដែលគ្មានការបាញ់បោះដោយសេរី។
ជាការពិតណាស់ ក្នុងប្រសាសន៍នេះ លោកអូបាម៉ា ចង់បន្ទោសដោយប្រយោលទៅលើអ្នកតំណាងរាស្ត្រមកពីគណបក្សសាធារណរដ្ឋ ដែលតែងតែមានទំនោរការពារឧស្សាហកម្មផលិតអាវុធ។ នៅសហរដ្ឋអាមេរិក ក្នុងរដ្ឋមួយចំនួនគេទិញកាំភ្លើង ឲ្យកូនកាន់ ដូចជាទិញតុក្តា ឲ្យក្មេងលេងដូច្នោះដែរ។ នៅក្នុងអាណត្តិទីពីរនេះ លោកអូបាម៉ា បានបរាជ័យម្តងជាពីរដង ធ្វើច្បាប់គ្រប់គ្រងអាវុធ ដោយសារតែសភា និងព្រឹទ្ធសភា មិនគាំទ្រ។ យោងតាមរបាយការណ៍ របស់ Gun Violences Archive ក្នុងឆ្នាំ២០១៥នេះ មានគ្រោះថ្នាក់បាញ់ រឺក៏រាកៃអាវុធចំនួន ៣៩៥២៤ករណី ដែលក្នុងនោះគឺមាន២៦៤ករណី ជាករណីបាញ់រះ លើមនុស្សជាច្រើននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ