លទ្ធផលដ៏ភ្ញាក់ផ្អើលនៃការបោះឆ្នោតជ្រើសរើសបេក្ខជនប្រធានាធិបតីអាមេរិក
មហាសេដ្ឋីដូណាល់ត្រាំ Dolnald Trump នៃបក្សសាធារណរដ្ឋ លោកស្រី ហ៊ីលឡារី គ្លីនតុន Hillary Clinton នៃបក្សប្រជាធិបតេយ្យ ដែលជាបេក្ខជនមានប្រជាប្រិយភាពលេចធ្លោខ្លាំងជាងគេនៅក្នុងបក្សនីមួយៗ ស្រាប់តែត្រូវចាញ់ឆ្នោតតាំងពីថ្ងៃទីមួយ សម្រាប់លោកដូណាល់ត្រាំ និងយ៉ាងប្រផុតប្រផើយបំផុត សម្រាប់លោកស្រីគ្លីនតុន។ លទ្ធផលដ៏ភ្ញាក់ផ្អើលនេះ អាចបញ្ជាក់បានថាការបោះឆ្នោតជ្រើសរើសបេក្ខជនប្រធានាធិបតី ទំនងជាមានលក្ខណៈស្វិតស្វាញខ្លាំង។
ចុះផ្សាយនៅថ្ងៃ៖
ជាលទ្ធផលជាក់ស្តែង និងជាការភ្ញាក់ផ្អើលដ៏អវិជ្ជមានបំផុត សម្រាប់លោក ដូណាល់ ដែលបានបានចាញ់ឆ្នោតដល់បីពិន្ទុ នៅពីក្រោយគូប្រជែង ថេដ គ្រូស (២៧%)ដោយបានទទួលសំឡេងត្រឹមតែ ២៤%។
ការភ្ញាក់ផ្អើលមានកាន់តែខ្លាំង ព្រោះលោក ដូណាល់ត្រាំ ត្រូវបានវ៉ារឈ្នះ ដោយបេក្ខជនដែលមាននិន្នាការនយោបាយអភិរក្សជ្រុលនិយមជាងទៅទៀត។ ហេតុដូច្នេះហើយបានជាអ្នកវិភាគយល់ថា មិនមែនការស្ទង់មតិខុស ឬមកពីគោលនយោបាយទេ តែមកពីលោកថេដ គ្រូស មានវិធី និងយុទ្ធសាស្ត្រច្រើនជាង ប្រមូលបាននូវការគាំទ្រពីសំណាក់គ្រិស្តសាសនិកជន ប្រូតេស្តង់ អេវង់ហ្សេឡិក ...
នេះជាបរាជ័យដំបូង សម្រាប់ការបោះឆ្នោតលើកទីមួយ នៅរដ្ឋដំបូងគេបង្អស់ ប៉ុន្តែមិនមែនមានន័យថាចប់ទេ ! ក្រោយពីបានទទួលលទ្ធផលភ្លាម លោក ដូណាល់ត្រាំ បានថ្លែងសរសើរគូប្រជែង ថេដ គ្រូស និងបានអរគុណរដ្ឋIowa ព្រមទាំងបានសន្យាថាអាចនឹងវិលត្រលប់មកទិញកសិដ្ឋាននៅរដ្ឋនេះទៀតផង។ បរាជ័យដំបូងនេះ ជាមេរៀន ប្រាប់ថាអាចនឹងមានបរាជ័យថ្មីទៀត នៅចំពោះមុខបេក្ខជនដដែល ឬបេក្ខជនផ្សេងទៀត។ ប៉ុន្តែមិនមែនជាពេលវេលាដែលត្រូវទម្លាក់ដៃឡើយ ផ្ទុយទៅវិញ ដោយគ្មានបង្អង់ លោក ដូណាល់ត្រាំ បានបង្កើនយុទ្ធនាការភ្លាម ដើម្បីយកឈ្នះនៅរដ្ឋផ្សេងៗទៀត។
តើ ថេដ គ្រូស Ted Cruz ជានរណា និងមានប្រវត្តិនយោបាយយ៉ាងដូចម្តេចខ្លះ ?
ថេដ គ្រូស គឺជាគូប្រជែងរបស់លោក ដូណាល់ ត្រាំ ដ៏ចម្បងបំផុតនៅក្នុងបក្សសាធារណរដ្ឋ និងជាបុគ្គលដែលបក្សស្អប់បំផុតដែរ។ កើតនៅឆ្នាំ១៩៧០ នៅប្រទេសកាណាដា ម្តាយជាជនជាតិអាមេរិក ឪពុកគុយបា ធំធាត់នៅរដ្ឋតិចសាស់ រៀនក្នុងសាលាល្បីៗ Princeton Harvard លោក ថេដ គ្រូស បានចូលធ្វើនយោបាយ នៅឆ្នាំ២០០០ ជាមួយលោក George W Bush។ លោក ថេដ គ្រូស ទទួលការគាំទ្រពីបក្ស Tea Party និងប្រកាន់នយោបាយអភិរក្សនិយមបំផុត មិនខុសពីលោក ដូណាល់ ត្រាំ ប៉ុន្មានទេ ពោលគឺប្រឆាំងនឹងនយោបាយអ្នកមាន ប្រឆាំងនឹងការរម្លូតកូន ព្រមទាំងសន្យារំលាយចោលច្បាប់ធានារ៉ាប់រង់សុខភាពរបស់លោក អូបាម៉ា Obamacare ការពារគ្រិស្តសាសនិកជន បរិហារអន្តោប្រវេសន៍ខុសច្បាប់... ថ្វីបើមានដើមកំណើតគុយបា តែប្រឆាំងដាច់ខាតការរំកិលចូលគ្នារវាងអាមេរិកនិងគុយបា តែការពារការកាន់អាវុធ ! ក្នុងឃ្លីបឃោសនានយោបាយ គេឃើញរូបលោកផ្ទាល់ហាត់បាញ់កាំភ្លើង និងយកសាច់ក្រកមកចំអិនលើកាណុង ...
ក្រោយពីបានជោគជ័យនៅរដ្ឋIowa ភ្លាម លោក ថេដ គ្រូស បានថ្លែងថា អរគុណព្រះ និងចាត់ទុកជោគជ័យនេះថា ជារបស់អ្នកអភិរក្សនិយមដ៏ក្លាហាន និងវាយប្រហារគូប្រជែងថា មិនមែន ប្រព័ន្ធឃោសនាជាអ្នកជ្រើសរើសបេក្ខជនប្រធានាធិបតីទេ។
សូមបញ្ជាក់ថា នៅក្នុងបក្សសាធារណរដ្ឋនេះ ក្រៅពីលោក ដូណាល់ ត្រាំ និងថេដ គ្រូស នៅបេក្ខជនម្នាក់ទៀត ដើមកំណើតអាមេរិកឡាទីន កំពុងប្រដេញប្រដំប្រសងគ្នាខ្លាំងក្នុងលំដាប់ទីបីនោះគឺលោក Marco Rubio (២៣%) អាយុ៤៤ឆ្នាំ ដែលអាចធ្វើឱ្យការប្រកួតប្រជែងមានលក្ខណៈស្វិតស្វាញខ្លាំង និងធ្វើឱ្យការបោះឆ្នោតនៅរដ្ឋបន្ទាប់ក្រឡាប់ចាក់ដូចគ្នានឹងរដ្ឋIowa។
លោកស្រី គ្លីនតុន ឈ្នះលោកសិនដឺ យ៉ាងប្រផុតប្រផើយ
នៅក្នុងបក្សប្រជាធិបតេយ្យវិញ ការរាប់សន្លឹកឆ្នោត៩៩%ដំបូងបានបង្ហាញថា លោកស្រី គ្លីនតុន ជាអ្នកឈ្នះយ៉ាងពិតប្រាកដ តែជាការឈ្នះយ៉ាងប្រផុតប្រផើយបំផុត។ ឈ្នះតិចពេករហូតមិនអាចផ្តល់លទ្ធផលច្បាស់លាស់បានភ្លាមៗ ដោយត្រូវរង់ចាំដល់ថ្ងៃស្អែកទើបមានសេចក្តីប្រកាសជាផ្លូវការ។
ថ្វីបើលោកស្រី នៅតែញញឹមស្រស់ រក្សាទឹកមុខរីករាយ សម្តែងអំណរ និងអរគុណរដ្ឋអាយអូវ៉ា អំពីជោគជ័យ ប៉ុន្តែលោកស្រីគ្លីនតុន មិនបានស្រណុកចិត្តទេ ! អតីតកាល កាលពីឆ្នាំ២០០៨ ដែលកាលណោះលោកស្រីត្រូវបានគូប្រជែងដ៏ក្មេងបំផុត អូបាម៉ា ផ្តួលតាំងពីថ្ងៃដំបូង ទំនងបានលងចិត្តលោកស្រីផង។ នៅថ្ងៃនេះ ស្រមោលខ្មៅហាក់បន្តអន្ទោលតាមប្រាណលោកស្រីទៀត តែម្តងនេះ គឺដោយបេក្ខជនដែលមានវ័យចំណាស់ជាងបំផុត គឺលោក ប៊ែរនី សិនដឺ Bernie Sanders អាយុ ៧៤ឆ្នាំ។
លោក ប៊ែរនី សិនដឺ អ្នកប្រជាធិបតេយ្យបែបសង្គមនិយម ដ៏ក្រីក្រប្រើបៀបទៅនឹងទ្រព្យធនដ៏មហាសាលរបស់លោកស្រីគ្លីនតុន កាលពី៩ខែមុន គ្មានប្រាក់ គ្មានមធ្យោបាយ គ្មានរចនាសម្ព័ន្ធនយោបាយ គ្មាននរណាស្គាល់សោះ (មានត្រឹមតែ១០%) ស្រាប់តែនៅថ្ងៃនេះ បានទទួលសំឡេងគាំទ្រពីរដ្ឋIowa ដល់ទៅ ៤៩,៦% ទល់នឹងលោកស្រីគ្លីនតុន ៤៩,៩%។ ដូច្នេះសម្រាប់លោកប៊ែរនី សិនដឺ នេះជាជោគជ័យ ដ៏ពិតប្រាកដ ! ជាជោគជ័យប្រឆាំងនឹងប្រព័ន្ធឃោសនា ជាជោគជ័យនៃបដិវត្តនយោបាយ។
លោកសិនដឺចាស់មែន តែចេះទាក់ទាញស្រទាប់យុវវ័យបាន ដែលត្រូវការអ្វីថ្មី ត្រូវការស្រមើស្រមៃ។ នេះគឺជាចំណុចខ្លាំងរបស់លោក ប៊ែរនី សិនដឺ ដែលលោកស្រីគ្លីនតុន មិនអាចធ្វើដូចបាន។ ជាមួយលទ្ធផលនៅរដ្ឋIowa លោកសិនដឺ កាន់តែអាចមានជំនឿស៊ុបនៅសប្តាហ៍ក្រោយ នៅរដ្ឋញ៉ូវហាំសឺ ព្រោះបើតាមការស្ទង់មតិលោកជាអ្នកនាំមុខស្រាប់ទៅហើយ។
ដំណើរឆ្ពោះទៅក្លាយជាបេក្ខជនប្រធានាធិបតីពិតជាមានការលំបាកខ្លាំង សម្រាប់លោកស្រី គ្លីនតុន ប៉ុន្តែអ្នកវិភាគនៅតែសំលឹងឃើញថាលោកស្រីគ្លីនតុននឹងក្លាយជាបេក្ខជនប្រធានាធិបតីច្រើនជាងលោក សិនដឺ ព្រោះលោកស្រីមានអ្នកគាំទ្រធំៗខ្លាំងក្នុងរង្វង់បក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ