បោះឆ្នោតជ្រើសរើសបេក្ខជនប្រធានាធិបតីអាមេរិក ៖ លោកស្រីគ្លីនតុនចាញ់នៅរដ្ឋ New Hampshire
ការរាប់សន្លឹកឆ្នោតនៅមិនទាន់ចប់សព្វគ្រប់ទេ ! ប៉ុន្តែ ទាំងខាងបក្សប្រជាធិបតេយ្យ ក៏ដូចជាបក្សសាធារណរដ្ឋបានដឹងយ៉ាងច្បាស់លាស់ ថាបេក្ខជន ណាឈ្នះ ណាចាញ់។ បោះឆ្នោតពីរដងលទ្ធផលខុសគ្នាទាំងពីរដង ! នៅលើកនេះ គ្មានទេការភ្ញាក់ផ្អើល លោក ដូណាល់ ត្រាំ Dolnald Trumps នៃបក្សសាធារណរដ្ឋនិងលោក Bernard Sanders នៃបក្សប្រជាធិបតេយ្យបានទទួលជោគជ័យយ៉ាងត្រចះត្រចង់។ ដូចការស្មានទុក លោកស្រី ហ៊ីលឡារី គ្លីនតុន បានស្គាល់បរាជ័យជាលើកទីមួយ បន្ទាប់ពីបានឆ្លងកាត់ដំណើរការឃោសនាដ៏ស្មុគស្មាញ និងពិបាកទស្សន៍ទាយលទ្ធផលមក។
ចុះផ្សាយនៅថ្ងៃ៖ កែប្រែថ្ងៃទី៖
បើតាមលទ្ធផលបណ្តោះអាសន្ន លោក សិនដឺ (៥៩%) បាននាំមុខលោកស្រី គ្លីនតុន (៣៨%) ដាច់ដល់ទៅជាង ២០%។ ជ័យជំនះដែលបានលើកទឹកចិត្តបេក្ខជនសិនដឺ ឱ្យកាន់តែមានសេចក្តីក្លាហាន ប្រកាសព្រមានគូប្រជែងក្នុងបក្សថានឹងតស៊ូរហូតដល់ជោគជ័យចុងក្រោយ។ ចំណែកលោកស្រី គ្លីនតុន គ្មានជម្រើសអ្វីផ្សេង ក្រៅពីត្រូវបន្តប្រឹងដើម្បីឈ្នះនៅរដ្ឋផ្សេងៗទៀត។
បរាជ័យលើកនេះបានបញ្ជាក់ជាថ្មីថាលោកស្រីមិនអាចអូសទាញការគាំទ្រពីសំណាស់ស្ត្រី និងយុវវ័យទេ ! ត្រូវតែមើលយុទ្ធសាស្ត្រឃោសនាឡើយវិញ។ ប៉ុន្តែ ថ្វីបើកាលពី១០ថ្ងៃមុន លោកស្រីអតីតរដ្ឋមន្ត្រីការបរទេសអាមេរិក បានឈ្នះឆ្នោតយ៉ាងប្រផុតប្រផើយបំផុតលើគូប្រជែង ហើយនៅថ្ងៃនេះត្រូវបរាជ័យទាំងស្រុងក៏ដោយ ក៏គ្មានហេតុផលអ្វីត្រូវទម្លាក់ដៃនៅពេលនេះដែរ នៅមានការបោះឆ្នោតជាបន្តបន្ទាប់ទៀត នៅសប្តាហ៍ក្រោយនៅរដ្ឋការ៉ូលីនខាងត្បូង និងណេវ៉ាដា និងពិសេសនៅត្រូវយកឈ្នះឱ្យបាននៅថ្ងៃទី ១ មីនា ថ្ងៃដែលមានរដ្ឋបួនបោះឆ្នោតជុំគ្នាក្នុងពេលតែមួយ។
ការបោះឆ្នោតនៅរដ្ឋ New Hampshire តំណាងឱ្យ១%នៃសំឡេងសរុប ដែលសម្រេចជ្រើសរើសបេក្ខជនប្រធានាធិបតីបក្សប្រជាធិបតេយ្យនៅខែកក្កដាតែប៉ុណ្ណោះ។ ដើម្បីជាការប្រៀបធៀប លោកអូបាម៉ាក៏បានចាញ់ឆ្នោតនៅរដ្ឋNew Hampshireនេះដែរកាលពីឆ្នាំ២០០៨ ទល់នឹងលោកស្រីគ្លីនតុន។
ខាងបក្សសាធារណរដ្ឋវិញ លោកមហាសេដ្ឋី ដូណាល់ត្រាំ បានស្គាល់រសជាតិជោគជ័យជាលើកដំបូងនៅក្នុងខ្សែជីវិតនយោបាយ ដោយបានទទួលសំឡេងគាំទ្រ៣៥%។ ដោយមិនទាន់ភ្លេចបរាជ័យនៅរដ្ឋអាយអូវ៉ា កាលពីសប្តាហ៍មុន លោកមិនបានកញ្ជ្រោលអរខ្លាំងទេ ប៉ុន្តែបានជ្រើសរើសថ្លែងសុរន្ទរកថាក្រោយគេ ដើម្បីបានបញ្ចេញអារម្មណ៍ពិតបានយូរ ដោយឆ្លៀតបង្ហើរសារវាយប្រហារដូចទម្លាប់ថា អ្នកនយោបាយមានឯកទេសសុទ្ធតែអសមត្ថភាព មានតែរូបលោកមានបទពិសោធន៍ជំនួញដែលអាចជួយស្រោចស្រង់អាមេរិកពីឱនភាពបាន។
តែជាមួយជ័យជំនះនេះ លោក ដូណាល់ត្រាំ បានក្លាយជាបេក្ខជនប្រធានាធិបតី ដ៏ម៉ត់ហ្មត់ជាងគេសម្រាប់បក្សសាធារណរដ្ឋ ព្រោះបេក្ខជនផ្សេងទៀត តួយ៉ាងលោក ថេដ គ្រូស ដែលឈ្នះឆ្នោតនៅអាយអូវ៉ា បានធ្លាក់ដល់លំដាប់ទីបី ប្រដេញដោយប្រកិតដោយបេក្ខជនត្រកូលប្រធានាធិបតីប៊ូស លោក Jeb Bush ។ បេក្ខជនក្មេងជាងគេ និងលេចធ្លោខ្លាំងក្នុងរដ្ឋនេះបានធ្លាក់ដល់លំដាប់ទី៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ