ហ្សីកា ៖ ការស្វែងរកថ្នាំវ៉ាក់សាំងមានពន្លឺព្រាលៗ
ក្នុងពេលដែលប្រេស៊ីល ប្រកាសអំពីកំណើនទារកកើតមកក្បាលតូចខុសប្រក្រតីកើនឡើងដល់ទៅ១០% ការស្រាវជ្រាវរកថ្នាំការពារជំងឺហ្ស៊ីកា បានបោះជំហានទៅមុខគួរឱ្យកត់សម្គាល់។ មន្ទីរពិសោធន៍អាមេរិកបានប្រកាសនៅល្ងាចថ្ងៃពុធម្សិលមិញថា ការធ្វើតេស្តសាកល្បង លើសត្វកណ្តុរផ្តល់លទ្ធផលគួរឱ្យទីពេញចិត្ត ព្រមទាំងចង់ធ្វើការសាកល្បងលើមនុស្ស នៅដំណាច់ឆ្នាំ២០១៦នេះ។
ចុះផ្សាយនៅថ្ងៃ៖ កែប្រែថ្ងៃទី៖
វ៉ាក់សាំងដែលមន្ទីរពិសោធន៍អាមេរិកកំពុងសាកល្បងនេះ ជាថ្នាំ ដែលមិនទៅវាយប្រហារវីរ៉ុសមានជីវិតទេ តែទៅលើចំណែកDNA របស់វីរ៉ុសហ្ស៊ីកា និងអាចរក្សាទុកបានជាយូរម៉ោង ក្នុងសីតុណ្ហភាពធម្មតា។
មានយ៉ាងហោចណាស់ក្រុមហ៊ុនឱសថ និងមជ្ឈមណ្ឌលស្រាវជ្រាវវេជ្ជសាស្ត្រចំនួន១៥ បាននិងកំពុងប្រជែងគ្នាសិក្សាស្រាវជ្រាវរកថ្នាំការពារប្រឆាំងនឹងវីរ៉ុសហ្ស៊ីកា។ នៅបារាំង វិទ្យាស្ថានប៉ាស្ទ័រ ដែលធ្លាប់រកឃើញមុខគេថ្នាំការពារជំងឺគ្រុនឈាម ក៏បានផ្តើមកម្មវិធីរកវ៉ាក់សាំងប្រឆាំងហ្ស៊ីកាហើយ។ ឥណ្ឌា ក៏រៀបចំធ្វើតេស្តសាកល្បងប្រសិទ្ធិភាពថ្នាំវ៉ាក់សាំងលើសត្វដែរ។ នេះបើតាមអង្គការសុខភាពពិភពលោក ដែលបានបញ្ជាក់ទៀតថា បើទោះបីជាមានគម្រោងច្រើន និងសកម្មភាពលឿនយ៉ាងណាក្តី ក៏គេត្រូវរង់ចាំយ៉ាងហោចណាស់១៨ខែទៀត ទើបអាចមានថ្នាំវ៉ាក់សាំងប្រឆាំងហ្ស៊ីកា អាចធ្វើតេស្តសាកល្បងកំរិតពិភពលោកបាន។
ហ្ស៊ីកា វីរ៉ុសរកឃើញជាលើកដំបូងនៅឆ្នាំ ១៩៤៧ បានចេញរាតត្បាតជាថ្មី នៅឆ្នាំ២០១៥ ដោយផ្តើមដំបូងនៅប្រទេសប្រេស៊ីល។ វីរ៉ុសនេះត្រូវជាប់សង្ស័យថាជាភ្នាក់ងារបង្កឱ្យទារកក្នុងផ្ទៃស្លាប់ ឬកើតមកមានការលូតលាស់មិនប្រក្រតី ក្បាលតូចខ្លាំងខុសពីធម្មតា។
រហូតមកទល់ពេលនេះ ប្រេស៊ីល បានរងគ្រោះជាងគេ ដោយរាប់ឃើញមានករណីឆ្លងហ្ស៊ីកាដល់ទៅ ១លាននាក់កន្លះ គិតចាប់ពីឆ្នាំ២០១៥មក។ អគ្គនាយកអង្គការសុខភាពពិភពលោក និងអ្នកជំនាញជាច្រើនរូបទៀត ត្រូវអញ្ជើញទៅប្រេស៊ីលនៅសប្តាហ៍ក្រោយ រយៈពេល៤៨ម៉ោង ដើម្បីវាយតម្លៃស្ថានការណ៍រាតត្បាតក្នុងប្រទេសនេះ។
កាលពីដើមខែ អង្គការសុខភាពពិភពលោក បានអះអាងពិតជាអាចមានទំនាក់ទំនងខ្លាំងរវាងវីរ៉ុសហ្ស៊ីកា និងការកើនឡើងខ្លាំងនៃចំនួនទារកកើតមកក្បាលតូចជ្រុល នៅប្រេស៊ីល។ របាយការណ៍ម្សិលមិញ បានមកពង្រឹងសម្មតិកម្មនេះ ដោយបង្ហាញថា ទារកកើតមកមានជំងឺក្បាលតូច បានកើនឡើងដល់ទៅ១០% បើប្រៀបទៅនឹងសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ