វ៉េណេស៊ុយអេឡា ៖ បក្សប្រឆាំងពន្យុះការបះបោរ ប្រធានាធិបតីច្រានចោលសំណើធ្វើប្រជាមតិ
វិបត្តិនយោបាយនៅប្រទេសវ៉េណេស៊ុយអេឡា កំពុងធ្លាក់ដុនដាបយ៉ាងខ្លាំង និងកំពុងឈានដល់ជម្លោះរវាងប្រធានាធិបតីនិងសភា។ បក្សប្រឆាំងដែលមានសំឡេងភាគច្រើននៅក្នុងសភា និងប្រធានាធិបតីកំពុងដំឡើងសំឡេងដាក់គ្នា ដោយម្ខាងបានអំពាវនាវឱ្យពលរដ្ឋ និងយោធាងើបបះបោរឈប់ស្តាប់បង្គាប់ថ្នាក់ដឹកនាំប្រទេស ឯខាងប្រធានាធិបតី លោក ម៉ាឌូយរ៉ូ បដិសេធមិនព្រមរៀបចំប្រជាមតិឡើយ ព្រោះយល់ថាការគម្រោងគៀងទម្លាក់លោកពីអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
វ៉េណេស៊ុយអេឡា បានធ្លាក់ក្នុងវិបត្តិនយោបាយ អស់ជាច្រើនខែមកហើយ តែនៅថ្ងៃនេះ វិបត្តិកាន់តែធ្ងន់ធ្ងរបន្ថែមទៀត ដោយសភាបានច្រានចោលក្រឹត្យរបស់ប្រធានាធិបតី។
កាលពីថ្ងៃសុក្រ ប្រធានាធិបតីវ៉េណេស៊ុយអេឡា ម៉ាឌុយរ៉ូ បានចេញក្រិត្យដាក់ប្រទេស ក្នុង “ស្ថានភាពពិសេស និងអាសន្នសេដ្ឋកិច្ច” ដើម្បីប្រឈមនឹងវិបត្តិសេដ្ឋកិច្ច។ ក្រិត្យនេះ គ្រាន់តែការបន្តក្រឹត្យចាស់ ចែងកាលពីខែកុម្ភៈ ដាក់ប្រទេសក្នុងភាពបន្ទាន់សេដ្ឋកិច្ចប៉ុណ្ណោះ។ ប៉ុន្តែសម្រាប់បក្សប្រឆាំង នេះគឺជាការស្វែងរកអន្តរាគមន៍ និងការបំពាក់របបយោធាឱ្យប្រទេស។ ហេតុដូច្នេះហើយបាននៅល្ងាចមិញ សភា ដែលកាន់កាប់ដោយបក្សប្រឆាំង បាននាំគ្នាបោះឆ្នោតច្រានចោលក្រឹត្យប្រធានាធិបតី ដោយសំអាងថាក្រឹត្យនោះមានតម្លៃផ្ទុយនឹងរដ្ឋធម្មនុញ្ញ។
ជាងនេះទៀត ប្រមុខបក្សប្រឆាំងដែលមិនមែនជាសមាជិកសភា និងជាអតីតគូប្រជែងរបស់លោកប្រធានាធិបតីបានឆ្លៀតឱកាសវឹកវរនេះ អំពាវនាវឱ្យប្រជាពលរដ្ឋឈប់ស្តាប់បង្គាប់ប្រមុខរដ្ឋ និងពន្យុះឱ្យយោធាជ្រើសរើសរវាងរដ្ឋធម្មនុញ្ញ និងប្រធានាធិបតី។ ដើម្បីជាការដាក់សម្ពាធ ក្រុមបក្សប្រឆាំងបាននាំគ្នាធ្វើបាតុកម្មទ្រង់ទ្រាយធំ នៅថ្ងៃពុធនេះ ទាមទារឱ្យមានការរៀបចំប្រជាមតិ ប្រឆាំងឬគាំទ្រប្រធានាធិបតី។ ប៉ុន្តែទោះមានគំនាបខ្លាំងយ៉ាងដូច្នេះក៏ដោយ ក៏លោកប្រធានាធិបតី ម៉ាឌុយរ៉ូ មិនចុះញ៉មឡើយ ដោយបានស្រែកសំឡុតបដិសេធ គម្រោងធ្វើប្រជាមតិនោះ និងបានចោទប្រកាន់បក្សប្រឆាំងថាមានកំហុស ធ្វើបាតុកម្មដោយគ្មានការអនុញ្ញាតពីអាជ្ញាធរ។
ក្នុងស្ថានភាពបែបនេះ អ្នកឯកទេសព្រួយបារម្ភអំពីហានិភ័យផ្ទុះវិបត្តិផ្ទៃក្នុង ខណៈដែលវិបត្តិសេដ្ឋកិច្ចធ្លាក់ដុនដាប ប្រជាពលរដ្ឋកំពុងជួបកង្វះខាត គ្រឿងឧបភោគបរិភោគនិងសម្ភារៈចាំបាច់សម្រាប់រស់ ជាបណ្តើរៗហើយ។ បើតាមការស្ទង់មតិ ពលរដ្ឋវ៉េណេស៊ុយអេឡា ៧នាក់ក្នុងចំណោម១០នាក់ មិនពេញចិត្តនឹងចំណាត់ការរបស់ប្រធានាធិបតីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ