អ្នកការទូត៥១នាក់ ចង់ឱ្យអាមេរិកវាយរដ្ឋាភិបាលស៊ីរី
បទឈប់បាញ់ចាស់ បទឈប់បាញ់ថ្មី នៅស៊ីរី គ្មានអ្នកគោរពទៀតទេ ! ពីរបីម៉ោងក្រោយការប្រកាសរបស់ម៉ូស្គូ ការវាយប្រហារផ្លូវអាកាសបានផ្តើមឡើងវិញ យន្តហោះរដ្ឋាភិបាលក្រុងដាម៉ាសបានចេញធ្វើប្រតិបត្តិការទម្លាក់គ្រាប់បែកលើទីតាំងរបស់ពួកឧទ្ទាម នៅតំបន់អាឡិប។ យន្តហោះរុស្ស៊ីក៏ទំនងជាបានដឹកនាំការបាញ់ប្រហារពីលើអាកាសលើភាគខាងត្បូងស៊ីរី ប្រឆាំងនឹងពួកឧទ្ទាមគាំទ្រដោយសហរដ្ឋអាមេរិក។ ក្នុងខណៈនោះ នៅវ៉ាស៊ីនតោន មានអ្នកការទូតអាមេរិកជាច្រើន បានផ្តាច់ខ្លួនធ្វើការរិះគន់យុទ្ធសាស្ត្រអាមេរិក នៅស៊ីរី និងបានសំណូមពរឱ្យមានការវាយប្រហារលើរបបលោក អាសាដតែម្តង ដើម្បីបិទបញ្ចប់សង្រ្គាមដ៏រ៉ាំរ៉ៃនៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
អ្នកការទូតអាមេរិក៥១នាក់ ដែលមានទំនួលខុសត្រូវលើសំណុំរឿងយុទ្ធសាស្ត្រអាមេរិកនៅស៊ីរី បាននាំគ្នាចុះហត្ថលេខាលើលិខិតមួយរិះគន់ជំហរអាមេរិកនៅស៊ីរី និងបានអំពាវនាវឱ្យអាមេរិក ធ្វើការវាយប្រហារលើរបបលោកក្រុងដាម៉ាសតែម្តង។
ប្រសិនបើយោធាអាមេរិកវាយប្រហារសំដៅលើរដ្ឋាភិបាលលោកបាស្ហារ អាល់អាសាដ មែន នោះពិតជាការប្តូរផ្លាស់នយោបាយដ៏សំខាន់បំផុត ព្រោះពេលនេះរដ្ឋបាលអូបាម៉ា ផ្តុំប្រតិបត្តិការផ្លូវអាកាស ក្នុងក្របខ័ណ្ឌសម្ព័ន្ធអន្តរជាតិ តែលើទីតាំងរបស់ពួកអង្គការរដ្ឋអ៊ីស្លាមនៅស៊ីរី ប៉ុណ្ណោះ។
លោក ចនឃែរី ប្រមុខការទូតអាមេរិកដែលកំពុងស្ថិតនៅប្រទេសដាណឺម៉ាក សុំមិនធ្វើអត្ថាធិប្បាយអ្វីទាំងអស់ ដោយគ្រាន់តែព្រលយថាសំណើប្តូរយុទ្ធសាស្ត្រនេះ ថាជាឯកសារដ៏សំខាន់។ លោកនឹងពិភាក្សាជាមួយម្ចាស់លិខិតពេលត្រលប់ចូលប្រទេសវិញ។ តែជំហរសេតវិមាន គឺ ប្រឆាំងជានិច្ចនឹងការប្រើកម្លាំងយោធា ឱ្យចូលជ្រៅទៅក្នុងប្រទេសស៊ីរី។
សូមបញ្ជាក់ថា អ្នកការទូតអាមេរិកហ៊ានធ្វើសំណើនេះឡើង ដោយសំអាងថាបទឈប់បាញ់ដាក់ឱ្យដំណើរការតាំងពីចុងខែកុម្ភៈឆ្នាំ២០១៦ មក គ្មាននរណាគោរព។ យុទ្ធសាស្ត្រអាមេរិករយៈពេល៥ឆ្នាំកន្លងមកនេះ គ្មានលទ្ធផល របបក្រុងដាម៉ាសរបស់លោក បាស្ហារ អាល់អាសាដ កាន់តែជំហររឹងមាំ ដោយមានជំនួយពីកងទ័ពអាកាសរុស្ស៊ី ឯសមត្ថភាពរបស់ពួកអង្គការរដ្ឋអ៊ីស្លាមគ្មានបានប៉ះពាល់ថមថយទេ។ ជាក់ស្តែងនៅថ្ងៃនេះ កងកម្លាំងយោធារុស្ស៊ី ទំនងជាបានបើកប្រតិបត្តិការនៅភាគខាងត្បូងប្រទេសស៊ីរី ប្រឆាំងនឹងក្រុមប្រឆាំងរដ្ឋាភិបាល តែគាំទ្រដោយអាមេរិក។ កងទ័ពរដ្ឋាភិបាលក្រុងដាម៉ាស ក៏បានចេញទម្លាក់គ្រាប់បែកលើទីតាំងរបស់ពួកឧទ្ទាមដែរ នៅថ្ងៃនេះ នៅតំបន់ក្រុងអាឡិប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ