កាណាដាវិះរងភេរវកម្មជីហាតអង្គការរដ្ឋអ៊ីស្លាម តែប៉ូលិសកម្ចាត់បានទាន់ពេលវេលា
កាណាដា ដ៏ដូចជាបណ្តាប្រទេសបស្ចឹមលោកមួយចំនួន កំពុងរងការគំរាមកំហែងភេរវកម្ម ខ្ពស់ដែរ។ ប៉ុន្តែនៅថ្ងៃល្ងាចថ្ងៃពុធម្សិលមិញ ជាសំណាងល្អ ប៉ូលិសកាណាដា បានបំផ្លាញផែនការភេរវកម្មមួយ ដោយបានបាញ់សម្លាប់សកម្មជនអង្គការរដ្ឋអ៊ីស្លាមម្នាក់។ ហេតុការណ៍បានកើតឡើងនៅភាគកណ្តាលប្រទេស ក្នុងពេលដែលភេរវជនហៀបនឹងចុចបំផ្ទុះគ្រាប់បែកធ្វើភេរវកម្ម ទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
មានអាយុ២៤ឆ្នាំ ធ្លាប់ត្រូវបានប៉ូលិសចាប់ខ្លួនបានកាលពីឆ្នាំទៅ ពីបទបានគាំទ្រនិងភ្ជាប់ខ្លួនទៅនឹងក្រុងអង្គការរដ្ឋអ៊ីស្លាមតាមរយៈប្រព័ន្ធសង្គម រួចដោះលែងទៅវិញនៅខែកុម្ភៈឆ្នាំ២០១៦ ដោយដាក់ឱ្យស្ថិតនៅក្រោមការតាមដានច្បាប់ ភេរវជនជាតិកាណាដា ឈ្មោះ អារ៉ុង ដ្រាយវឺ Aaron Driver នេះ ត្រូវបានប៉ូលិសបាញ់សម្លាប់ នៅពេលកំពុងរៀបចុចគ្រឿងផ្ទុះទីពីរ។
ប៉ូលិសកាណាដា បានទទួលព័ត៌មានគួរឱ្យទុកបាន ថាមានភេរវកម្មមួយកំពុងត្រូវបានរៀបចំឡើងដើម្បីវាយប្រហារ ក្នុងពេលឆាប់ៗ។ ហេតុដូច្នេះបានជារដ្ឋាភិបាលធ្វើការតាមដាននិងចាត់វិធានការយ៉ាងតឹងតែងបំផុត ជាពិសេសចំពោះជនដែលអាចឈានទៅធ្វើសកម្មភាពភេរវកម្ម ដូចយ៉ាង អារ៉ុង ដ្រាយវឺ។ គ្រាន់តែបានឮមានការផ្ទុះជាលើកទីមួយដែលបង្កឱ្យមានអ្នករងរបួសម្នាក់ ភ្លាមប៉ូលិសបានចេញធ្វើអន្តរាគមន៍ អមដោយកងកម្លាំងយោធាមួយកងផង ទៅដល់ភូមិដែលអារ៉ុងដ្រាយវឺស្នាក់នៅ។
បើតាមប្រភពសម្ងាត់ ដែលទូរទស្សន៍កាណាដាមួយទទួលបាន ភេរវជនមានគម្រោងចង់ទៅដាក់បំផ្ទុះ នៅតាមទីតាំងមានមនុស្សម្នាច្រើន ដូចជា អាកាសយានដ្ឋាន និងមជ្ឈមណ្ឌលពាណិជ្ជកម្មផ្សារទំនើប។
តាំងពីចុងឆ្នាំ២០១៤មក បន្ទាប់ពីបានរងការវាយប្រហារផ្ទួនៗ ពីសំណាក់យុវជនដែលផ្តាច់ខ្លួនទៅធ្វើជីហាតមក កាណាដាបានបោះឆ្នោតកែប្រែច្បាប់ប្រឆាំងភេរវកម្ម ផ្តល់អាទិភាពខ្លាំងដល់ភ្នាក់ងារស៊ើបការណ៍ និងប៉ូលិស ក្នុងការតាមដានអង្កេតទប់ស្កាត់យុវជនមិនឱ្យចេញទៅបម្រើអង្គការរដ្ឋអ៊ីស្លាមនៅស៊ីរី ឬអ៊ីរ៉ាក់។
កាណាដា បានចូលរួមជាមួយក្រុមសម្ព័ន្ធអន្តរជាតិដឹកនាំដោយអាមេរិក តាំងពីឆ្នាំ២០១៤មក ដើម្បីប្រយុទ្ធប្រឆាំងនឹងអង្គការរដ្ឋអ៊ីស្លាម តែបានកាត់បន្ថយសកម្មភាពច្រើន នៅពេលរដ្ឋាភិបាលថ្មី ឡើងដឹកនាំប្រទេស។ រដ្ឋាភិបាលនេះ ទើបបង្ហាញឆន្ទៈប្រយុទ្ធប្រឆាំងនឹងភេរវនិយមជាថ្មី លើគ្រប់ទម្រង់និងសហការយ៉ាងស្អិតល្មួតឡើងវិញជាមួយប្រទេសសម្ព័ន្ធមិត្តឡើងវិញ ក្រោយភេរវកម្មនៅក្រុងនីសប្រទេសបារាំងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ