លោក Donald Trump រុះរើក្រុមការងារឃោសនា ខណៈលោកស្រី Hillary Clinton កំពុងរៀបចំក្រុមបន្តវេនដឹកនាំប្រទេស
ចុះផ្សាយនៅថ្ងៃ៖
ស្តាប់ - ០៣:៥៤
ជាការគួរឲ្យភ្ញាក់ផ្អើល កាលពីសប្តាហ៍មុននេះ លោក Donald Trump បានប្រកាសផ្លាស់ប្តូរក្បាលម៉ាស៊ីនដឹកនាំយុទ្ធនាការឃោសនារបស់ខ្លួន។ ក្រុមការងារថ្មីនេះនឹងជួយលោក Trump ឲ្យទទួលបានសម្លេងគាំទ្រច្រើនជាងមុន ខណៈពេលដែលលទ្ធផលនៃការស្ទង់មតិបង្ហាញការដាំក្បាលចុះពីមួយថ្ងៃទៅមួយថ្ងៃ។ ទន្ទឹមគ្នានេះផងដែរ លោកស្រី Hillary Clinton កំពុងរៀបចំក្រុមការងារពិសេសមួយ ដើម្បីបន្តវេនដឹកនាំប្រទេសពីលោក ប៉ារ៉ាក់ អូបាម៉ា ក្នុងករណីដែលលោកស្រីឈ្នះឆ្នោត។
លោក Donald Trump បានសំរេចចិត្តរុះរើក្រុមការងារដឹកនាំយុទ្ធនាការបោះឆ្នោតហើយ កាលពីសប្តាហ៍មុននេះ។ ការផ្លាស់ប្តូរយុទ្ធសាស្រ្តថ្មីនេះ គឺដោយសារតែលោក Paul Manafort ប្រធានក្រុមការងារឃោសនាកំពុងតែជាប់ពាក់ព័ន្ធនឹងរឿងអាស្រូវមួយ។ រឿងរ៉ាវនេះបានផ្ទុះឡើង ក្រោយស្ថាប័នប្រឆាំងអំពើរពុករលួយនៅប្រទេសអ៊ុយក្រែនសង្ស័យថា លោក Paul Manafort បានទទួលប្រាក់ចំនួន ១២,៧ លានដុល្លារពីសំណាក់មេដឹកនាំអ៊ុយក្រែន ដែលមានទំនោរទៅរកប្រទេសរុស្សី ហើយដែលមិនចង់ឲ្យអ៊ុយក្រែនចូលជាសមាជិកសភាពអឺរ៉ុប។ មេដឹកនាំអ៊ុយក្រែនបានជ្រើសរើសលោក Paul Manafort ជាទីប្រឹក្សាចន្លោះពីឆ្នាំ ២០០៧ ដល់ ២០១២។ អ្វីដែលគេសង្ស័យថាជាអំពើរពុករលួយនោះ គឺទឹកប្រាក់ទាំងនោះត្រូវបានទូរទាត់ក្រោមរូបភាពជាលុយសុទ្ធ ហើយការចំណាយចំពោះសេវាកម្មរបស់លោក Paul Manafort គឺ គ្មានដានបញ្ជីផ្ទេរច្បាស់លាស់ឡើយ។
ម៉្យាងទៀត ការផ្លាស់ប្តូរនេះក៏ដោយសារតែលោក Donald Trump ប្រឈមនឹងរលកនៃការរិះគន់ពីគ្រប់មជ្ឈដ្ឋានចំពោះពាក្យសំដីអសុរស រើសអើងពូជសាសន៍ និងគ្មានការពិចារណារបស់បេក្ខជនរូបនេះ ក្នុងរយៈពេលប៉ុន្មានសប្តាហ៍ចុងក្រោយនេះ។ ជាពិសេស អ្វីដែលព្រួយបារម្ភនោះ គឺការធ្លាក់ពិន្ទុក្នុងការស្ទង់មតិ ដែលធ្វើឲ្យគន្លាតកាន់តែឃ្លាតឆ្ងាយគ្នាពីគូប្រជែងគឺ លោកស្រី Hillary Clinton។ លទ្ធផលនៃការស្ទង់មតិ ដែលបានផ្សព្វផ្សាយនៅលើវេបសាយ៍ Real Clear Politics បានឲ្យដឹងថា លោក Donald Trump ទទួលបានសម្លេងគាំទ្រចំនួន ៤១,២% ពីពលរដ្ឋអាមេរិក ខណៈដែលលោកស្រី Hillary Clinton ទទួលបានចំនួន ៤៧,២%។
នេះជាលើកទីពីរហើយ ក្នុងរយៈពេលតែពីរខែប៉ុណ្ណោះ ដែលលោក Trump ផ្លាស់ប្តូរក្រុមការងារដឹកនាំការឃោសនាបោះឆ្នោត។ ប្រធានក្រុមការងារថ្មីនេះគឺ លោកស្រី Kellyanne Conway ដែលជាអ្នកមានអាជីពផ្នែកស្ទង់មតិប្រចាំគណបក្សសាធារណរដ្ឋ ហើយក៏ជាមនុស្សម្នាក់ដែលមានឈ្មោះបោះសម្លេង និងជាទីគួរឲ្យគោរព។ ហើយសំរាប់ប្រវត្តិសាស្រ្តបោះឆ្នោតអាមេរិក លោកស្រី Kellyanne Conway គឺជាស្រ្តីតំបូងគេបង្អស់ ដែលទទួលតំណែងជាប្រធានដឹកនាំយុទ្ធនាការឃោសនាបោះឆ្នោតតំណាងឲ្យគណបក្សមួយ។ លោក Donald Trump ក៏បានតែងតាំងមនុស្សសំខាន់ម្នាក់ទៀតជាអគ្គលេខាធិការក្រុមការងារឃោសនានេះ។ មនុស្សម្នាក់នោះ គឺលោក Steve Bannon ប្រធានវេបសាយ៍ព័ត៌មាន Breitbart News តំណាងឲ្យចលនាមហាអភិរក្សនិយមនៅក្នុងជួរគណបក្សសាធារណរដ្ឋ។
ស្របពេលគ្នានេះផងដែរ លោកស្រី Hillary Clinton កំពុងតែរៀបចំក្រុមបន្តវេនពីលោក អូបាម៉ា។ នៅក្នុងសេចក្តីប្រកាសព័ត៌មានមួយផ្សព្វផ្សាយកាលពីដើមសប្តាហ៍មុន លោកស្រី Hillary Clinton បានអះអាងថាកំពុងរៀបចំសមាសភាពក្រុមការងារបន្តវេនដឹកនាំប្រទេស ក្នុងករណីដែលលោកស្រីឈ្នះឆ្នោតប្រធានាធិបតីអាមេរិក នាខែវិច្ឆិការខាងមុខនេះ។
ការរៀបចំក្រុមការងារទទួលអំណាចដឹកនាំប្រទេស គឺជាប្រពៃណីនៅក្នុងដំណើរការបោះឆ្នោតនៅសហរដ្ឋអាមេរិក។ បេក្ខជនប្រធានាធិបតីតំណាងគណបក្សនិមួយៗមានសិទ្ធិរៀបចំសមាសភាពសមាជិករដ្ឋាភិបាលស្រមោលរបស់ខ្លួន ដើម្បីទទួលការផ្ទេរអំណាចនៅតាមមន្ទីរក្រសួងនានាក្នុងរយៈពេលអន្តរកាល ពោលគឺ ចន្លោះពីការប្រកាសលទ្ធផលបោះឆ្នោតនាខែវិច្ឆិការរហូតដល់ការផ្ទេរតំណែងប្រធានាធិបតីផ្លូវការនាខែមករា។ ដូចនេះ រយៈពេលអន្តរកាលនេះមានតែប៉ុន្មានសប្តាហ៍ប៉ុណ្ណោះ។
ចាប់តាំងពីឆ្នាំ ២០១០ មកម្ល៉េះ រដ្ឋាភិបាលសហព័ន្ធអាមេរិកបានបង្កើតកញ្ចប់ថវិការពិសេសមួយសំរាប់ឧបត្ថម្ភដល់ក្រុមការងាររបស់បេក្ខជនតំណាងឲ្យគណបក្សនិមួយៗ។ ចាប់ពីខែវិចិ្ឆការនៃឆ្នាំបោះឆ្នោតប្រធានាធិបតី ក្រុមការងារនោះមានការិយាល័យធ្វើការរៀងៗខ្លួននៅរដ្ឋធានីវ៉ាស៊ីងតោន។ ហើយ រចនាសម្ព័ន្ធរបស់ក្រុមការងារបន្តវេនដឹកនាំប្រទេសនោះ គឺត្រូវបង្កើតក្រោមទំរង់លក្ខន្តិកៈជាអង្គការ ឬសមាគម ដែលមានគោលដៅមិនរកប្រាក់កំរៃ។
សំរាប់ភាគីគណបក្សប្រជាធិបតេយ្យរបស់លោកស្រី Hillary Clinton អ្នកទទួលខុសត្រូវដឹកនាំក្រុមការងារបន្តវេននេះ គឺមានមនុស្សពីររូបសំខាន់ៗ។ ទីមួយ គឺលោក Tom Donilon អតីតៈទីប្រឹក្សាសន្តិសុខជាតិរបស់លោកប្រធានាធិបតី បារ៉ាក់ អូបាម៉ា។ ហើយទីពីរ គឺលោកស្រី Neera Tanden មនុស្សជំនិតម្នាក់របស់លោកស្រី Hillary Clinton ហើយក៏មានតួនាទីជាប្រធានាមជ្ឈមណ្ឌលពិចារណាដើម្បីការអភិវឌ្ឈន៍អាមេរិក (Center for American Progress)។ មជ្ឈមណ្ឌលត្រូវបានគេចាត់ទុកថាជាស្ថាប័នសំខាន់មួយ ដែលប្រៀបដូចជាឃ្លាំងគំនិតក្នុងការផ្តល់អនុសាសន៍ផ្សេងៗដល់គណបក្សប្រជាធិបតេយ្យ។
ចំណែកភាគីគណបក្សសាធារណរដ្ឋរបស់លោក Donald Trump វិញ រហូតមកដល់ពេលនេះ គេនៅពុំទាន់ទទួលបានព័ត៌មានក្បោះក្បាយជុំវិញសមាសភាពក្រុមបន្តវេនដឹកនាំប្រទេសនេះឡើយ។ ប៉ុន្តែ កាលពីខែឧសភាកន្លងទៅនេះ លោក Donald Trump បានតែងតាំងលោក Christ Christie អតីតៈអភិបាលរដ្ឋ New Jersey គឺ ជាប្រធានក្រុមការងារពិសេសនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ