FBI សង្ស័យប្រទេសរុស្សីស្ថិតនៅពីក្រោយការលួចបញ្ជីអ្នកចុះឈ្មោះបោះឆ្នោតអាមេរិក
ចុះផ្សាយនៅថ្ងៃ៖
ស្តាប់ - ០៤:១៧
កាលពីសប្តាហ៍មុននេះ លោក Harry Reid បានប្រធានក្រុមសមាជិកគណបក្សប្រជាធិបតេ្យប្រចាំព្រឹទ្ធសភាបានស្នើសុំទីភ្នាក់ងារ FBI ឲ្យដឹកនាំការស៊ើបអង្កេតមួយជុំវិញការព្យាយាមរបស់ប្រទេសរុស្សីក្នុងចេតនារំខានការបោះឆ្នោតប្រធានាធិបតីអាមេរិក ដែលនឹងប្រព្រឹត្តនាដើមខែវិច្ឆិការខាងមុខនេះ។ តាមរយៈរបាយការណ៍មួយ ទីភ្នាក់ងារ FBI កំពុងសង្ស័យថា ក្រុមចោរព័ត៌មានវិទ្យាមានទីតាំងនៅប្រទេសរុស្សីប្រហែលជានៅពីក្រោយការលួចបញ្ជីទិន្នន័យអ្នកចុះឈ្មោះបោះឆ្នោតអាមេរិក។
នៅសល់តែពីរខែទៀតប៉ុណ្ណោះ ពោលគឺ ថ្ងៃទី ៨ ខែវិច្ឆិការខាងមុខនេះ សហរដ្ឋអាមេរិកនឹងរៀបចំការបោះឆ្នោតប្រធានាធិបតី។ កាលពីសប្តាហ៍មុននេះ បើយោងតាមការចុះផ្សាយរបស់វេបសាយ៍ Yahoo News បានឲ្យដឹងថា ទីភ្នាក់ងារ FBI បានប្រកាសអាសន្នដល់នាយកគណៈកម្មាធិការជាតិបោះឆ្នោតនៅតាមបណ្តារដ្ឋនិមួយៗឲ្យប្រុងប្រយ័ត្នចំពោះការព្យាយាមវាយលុកតាមអ៊ិនធើណេតចូលលួចយកឯកសារគ្រប់គ្រងបញ្ជីបោះឆ្នោតនៅតាមរដ្ឋនិមួយៗ។
បើតាមការផ្សាយរបស់ស្ថានីយ៍ទូរទស្សន៍ NBC ដែលបានដកស្រង់សំដីមន្រ្តីជាន់ខ្ពស់ផ្នែកចារកម្មអាមេរិកម្នាក់សុំមិនបញ្ចេញឈ្មោះបានរាយការណ៍ឲ្យដឹងថា ការវាយប្រហារក្នុងទ្រង់ទ្រាយបែបនេះទំនងជាស្នាដៃរបស់ក្រុមចារកម្មរុស្សី។ មន្រ្តីរូបនេះក៏បានបន្ថែមថា ការប៉ុនប៉ងចូលលួចឯកសារបោះឆ្នោតនេះ គឺជារឿងមួយគួរឲ្យបារម្ភយ៉ាងខ្លាំង ព្រោះវាអាចបង្កបញ្ហាដល់ដំណើរការរៀបចំបោះឆ្នោតប្រធានាធិបតីអាមេរិក។ ប៉ុន្តែ ការដាក់មន្ទិលសង្ស័យលើប្រទេសរុស្សីបែបនេះគ្រាន់តែជាសម្មតិកម្មប៉ុណ្ណោះ។
របាយការណ៍របស់ទីភ្នាក់ងារ FBI ពុំបានបញ្ជាក់ថា ការិយាល័យរៀបចំការបោះឆ្នោតនៅរដ្ឋណាមួយក្នុងសហរដ្ឋអាមេរិក ដែលរងផលប៉ះពាល់ពីការវាយប្រហារព័ត៌មានវិទ្យានេះទេ។ ប៉ុន្តែ វេបសាយ៍ Yahoo News បានបង្ហើបឲ្យដឹងថា មានរដ្ឋចំនួនពីរ គឺរដ្ឋ Illinois និងរដ្ឋ Arizona។ សារព័ត៌មាន Chicago Times នៅក្នុងរដ្ឋ Illinois បានបញ្ជាក់លំអិតឲ្យដឹងថា ការចូលលួចបញ្ជីគ្រប់គ្រងអ្នកចុះឈ្មោះបោះឆ្នោតនោះ គឺត្រូវបានធ្វើឡើងកាលពីខែកក្កដាកន្លងទៅនេះ ក្រោយពីដំណើរការចុះឈ្មោះបោះឆ្នោតត្រូវបានបិទបញ្ចប់សព្វគ្រប់។ ទិន្នន័យផ្ទុកព័ត៌មានអ្នកចុះឈ្មោះបោះឆ្នោតនៅរដ្ឋ Illinois ចំនួន ២ សែននាក់ត្រូវបានលួច ដោយឯកសារទាំងនោះពុំត្រូវបានលប់ចោល ឬផ្លាស់ប្តូរអ្វីទាំងអស់នៅក្នុងប្រព័ន្ធកុំព្យូទ័រ។
ចំណែកនៅរដ្ឋ Arizona វិញ ក្រុមចោរព័ត៌មានវិទ្យាបានវាយប្រហារប្រព័ន្ធចុះឈ្មោះបោះឆ្នោត ដោយបានដាក់បញ្ចូលកម្មវិធីកុំព្យូទ័រមានមេរោគ ដើម្បីអាចជ្រៀតចូលក្នុងប្រព័ន្ធកុំព្យូទ័របាន។ ដោយសារតែបញ្ហាបែបនេះហើយទើបការិយាល័យរៀបចំការបោះឆ្នោតប្រចាំរដ្ឋ Arizona បានបិទការទទួលចុះឈ្មោះបោះឆ្នោតចំនួន ៨ ថ្ងៃ កាលពីចុងខែមិថុនាកន្លងទៅនេះ។ ប៉ុន្តែ ក្រោយពីបានត្រួតពិនិត្យល្អិតល្អន់ គ្មានទិន្នន័យណាមួយត្រូវបានលួចយកទេ។
ក្រោយឧប្បត្តិហេតុនេះ កាលពីដើមខែសីហាកន្លងទៅនេះ លោក Jeh Johnson រដ្ឋមន្រ្តីក្រសួងមហាផ្ទៃអាមេរិកបានដាក់បទបញ្ជាឲ្យនាយកគណៈកម្មាធិការរៀបចំការបោះឆ្នោតប្រចាំរដ្ឋនិមួយៗពង្រឹងសន្តិសុខប្រព័ន្ធគ្រប់គ្រងការចុះឈ្មោះបោះឆ្នោតរបស់ខ្លួន។ គួររំលឹកផងដែរថា ស្ថានីយ៍ទូរស្សន៍ CNN ទើបបានរាយការណ៍ឲ្យដឹងថា ប៉ុន្មានថ្ងៃចុងក្រោយនេះក៏មានក្រុមចោរព័ត៌មានវិទ្យាស្និតនឹងប្រទេសរុស្សីបានដឹកនាំប្រតិបត្តិការវាយប្រហារវេបសាយ៍សារព័ត៌មានអាមេរិក។ ក្នុងនោះការសែត The New York Times ក៏ត្រូវបានក្លាយជាផ្ទាំងស៊ីបផងដែរ។
បើតាមលោក David Kennedy ទីប្រឹក្សាប្រចាំក្រុមហ៊ុនជំនាញសន្តិសុខព័ត៌មានវិទ្យា TrustedSec បានវិភាគឲ្យដឹងថា ទ្រង់ទ្រាយនៃការប៉ុនប៉ងចូលលួចទិន្នន័យនេះបង្ហាញឲ្យដឹងថា ក្រុមចោរគ្រាន់តែកំពុងចាប់ផ្តើមជំហានតំបូងក្នុងការសិក្សាស្រាវជ្រាវស្ថានភាពតែប៉ុណ្ណោះ។ ប៉ុន្តែ ប្រសិនបើអាជ្ញាធរអាមេរិកធ្វេសប្រហែស ការវាយប្រហារទ្រង់ទ្រាយធំនឹងអាចកើតឡើងនៅថ្ងៃណាមួយ។ ហើយការវាយប្រហារព័ត៌មានវិទ្យាដោយផ្តោតគោលដៅលើទិន្នន័យអ្នកបោះឆ្នោតនេះ គឺជាការផ្ញើរសារមួយដល់សហរដ្ឋអាមេរិកឲ្យបង្កើនការប្រុងប្រយ័ត្នកាន់តែខ្លាំង។ ផ្នែកចារកម្មអាមេរិកបានសំដែងក្តីបារម្ភយ៉ាងខ្លាំង ដោយខ្លាចប្រទេសរុស្សី ឬប្រទេសមួយផ្សេងទៀតរំខានដល់ដំណើរការរៀបចំការបោះឆ្នោតប្រធានាធិបតីអាមេរិក។
សូមបញ្ជាក់ថា កាលពីថ្មីៗនេះ ក្រុមការងារដឹកនាំយុទ្ធនាការឃោសនារបស់លោកស្រី Hillary Clinton ក៏បានថ្អូញថ្អែរផងដែរពីការចូលលួចទិន្នន័យសារឆ្លើយឆ្លងតាមអ៊ីម៊ែលរបស់គណៈកម្មាធិការជាតិគណបក្សប្រជាធិបតេ្យ។ ការលួចឯកសារនេះ គឺបានប្រព្រឹត្តទៅកាលពីចុងខែកក្កដាកន្លងទៅនេះ ពោលគឺ ៣ ថ្ងៃមុនការបើកសមាជតែងតាំងបេក្ខជនផ្លូវការគណបក្សប្រជាធិបតេយ្យ។ វេបសាយ៍ WikiLeaks បានផ្សព្វផ្សាយឯកសារផ្ទៃក្នុងបក្សចំនួន ២ ម៉ឺនច្បាប់។ អ្នកជំនាញសង្ស័យថា ក្រុមចោរព័ត៌មានវិទ្យារុស្សីជាអ្នកប្រគល់ឯកសារទាំងនោះទៅឲ្យ WikiLeaks ។
ឯកសារទាំងនោះសុទ្ធតែជាសារឆ្លើយឆ្លងតាមអ៊ីម៊ែលរបស់មន្រ្តីជាន់ខ្ពស់បក្សប្រជាធិបតេយ្យចំនួន ៧ នាក់ ដែលមានតំណែងនៅក្នុងគណៈកម្មាធិការជាតិគណបក្សប្រជាធិបតេយ្យ។ សារឆ្លើយឆ្លងទាំងនោះ គឺមានកាលបរិច្ឆេទចន្លោះពីខែមករា ឆ្នាំ២០១៥ ដល់ខែឧសភា ឆ្នាំ២០១៦។ ខ្លឹមសារនៃសារទាំងអស់នោះបានបង្ហាញឲ្យដឹងថា មន្រ្តីជាន់ខ្ពស់គណបក្សប្រជាធិបតេយ្យមានភាពលំអៀងកាន់ជើងលោកស្រី Hillary Clinton។
ហើយពួកមន្រ្តីបក្សទាំងនោះស្វែងរកវិធីសាស្រ្តបង្ខូចឈ្មោះលោក Bernie Sanders ដែលជាគូប្រជែងរបស់លោកស្រី Hillary Clinton ក្នុងយុទ្ធនាការបោះឆ្នោតបឋមក្នុងបក្ស ដើម្បីក្លាយជាបេក្ខជនប្រធានាធិបតីផ្លូវការតំណាងឲ្យបក្ស។ គេសង្ស័យថា ការទម្លាយឯកសារសម្ងាត់បែបនេះ គឺជាចេតនារបស់រុស្សី ក្នុងការរំខានដំណើរការឃោសនាបោះឆ្នោតប្រធានាធិបតីអាមេរិក។ ហើយរុស្សីទំនងជាចង់ជួយលោក Donald Trump បេក្ខជនដ៏ចម្រូងចម្រាសរបស់គណបក្សសាធារណរដ្ឋ។
នៅក្នុងបទសម្ភាសន៍មួយជាមួយនឹងទីភ្នាក់ងាយព័ត៌មាន Bloomberg កាលពីថ្ងៃសុក្រ ទី២ កញ្ញាកន្លងទៅនេះ លោកប្រធានាធិបតីរុស្សី Vladimir Poutine បានបដិសេធច្រានចោលការចោទប្រកាន់ពីសំណាក់ថ្នាក់ដឹកនាំគណបក្សប្រជាធិបតេយ្យ។ លោក Poutine យល់ឃើញថាការចោទប្រកាន់លើរុស្សីបែបនេះ គឺជាយុទ្ធសាស្រ្តក្នុងការបង្វែងបញ្ហាដើម្បីកុំឲ្យមតិសាធារណៈជនចាប់អារម្មណ៍លើខ្លឹមសារឯកសារដែលក្រុមចោរព័ត៌មានវិទ្យាបានលួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ