លោកស្រី Hillary Clinton កំពុងស្វែងរកសម្លេងឆ្នោតពីក្រុមយុវជន
ចុះផ្សាយនៅថ្ងៃ៖
ស្តាប់ - ០៤:១១
ក្រោយពីទទួលជោគជ័យយកឈ្នះលោក Donald Trump នាវេទិការពិភាក្សាតទល់គ្នាកាលពីសប្តាហ៍មុន ឥឡូវនេះ លោកស្រី Hillary Clinton កំពុងតែសកម្មចុះទៅជួបក្រុមយុវជន។ បើតាមការស្ទង់មតិនានា លោកស្រីហាក់ពុំសូវទទួលបានប្រជាប្រិយភាពខ្លាំងក្លាឡើយពីសំណាក់ពលរដ្ឋអាមេរិកក្រោមអាយុ ៣០ ឆ្នាំ។ បើតាមអ្នកជំនាញបានឲ្យដឹងថា ប្រសិនបើគ្មានការគាំទ្រពីក្រុមយុវជនទេ លោកស្រី Hillary Clinton អាចចាញ់ឆ្នោតនៅតាមបណ្តារដ្ឋសំខាន់ៗមួយចំនួន។ ដើម្បីទទួលបានសម្លេងគាំទ្រពីក្រុមអ្នកបោះឆ្នោតវ័យក្មេងទាំងនោះ លោក Bernie Sanders ត្រូវបានអញ្ជើញឲ្យមកជួយឃោសនា។
អតីតគូបដិបក្ខ គឺលោកស្រី Hillary Clinton និងលោក Bernie Sanders ចុះឃោសនាជាមួយគ្នា។ ចាប់តាំងពីទទួលបានការតែងតាំងជាបេក្ខនារីផ្លូវការតំណាងឲ្យបក្ស នេះជាលើកទីពីរហើយ ដែលលោកស្រី Hillary Clinton បានចេញមុខជាសាធារណៈជាមួយលោក Bernie Sanders។ កាលពីសប្តាហ៍មុន អ្នកទាំងពីរបានថ្លែងសារនយោបាយទៅកាន់ក្រុមអ្នកគាំទ្រវ័យក្មេងចំនួន ១ ២០០នាក់នាសាកលវិទ្យាល័យរដ្ឋ New Hampshire។
បរិយាកាសនៃជំនួបនេះហាក់ដូចជាអាប់អួបន្តិច។ ម៉្យាងដោយសារតែក្រុមយុវជនពុំសូវចូលចិត្តលោកស្រី Hillary Clinton។ ពួកគេតែងបន្ទោសថាលោកស្រីមិនចាប់អារម្មណ៍បញ្ហាយុវជន។ សំរាប់ពួកគេ លោកស្រីគ្រាន់តែជានិមិត្តរូបតំណាងផលប្រយោធន៍បក្សតែប៉ុណ្ណោះ។ ហើយលោកស្រីក៏មិនអាចផ្លាស់ប្តូរអ្វីឲ្យបានដុំកំភួនឡើយ។ ក្នុងអារម្មណ៍ក្រុមយុវជន លោក Bernie Sanders គឺជានិមិត្តរូបនៃការតស៊ូមតិ ដែលហ៊ានរិះគន់គម្លាតរវាងអ្នកមាន និងអ្នកក្រក្នុងសង្គមអាមេរិក។ ហើយលោកក៏ជាអ្នកហ៊ានចេញមុខរិះគន់ធនាគារ និងផ្សារហ៊ុនក្នុងសង្កាត់ Wall Street ដែលចំណេញប្រាក់កប់ក្តោងរាប់រយលានដុល្លារក្នុងមួយឆ្នាំ។
ម៉្យាងទៀត បរិយាសកាសអាប់អួនេះក៏ដោយសារតែចំហាយប្រជែងគ្នាក្នុងបក្សកាលពីការបោះឆ្នោតបឋមរវាងលោកស្រី Hillary Clinton និងលោក Bernie Sanders ហាក់ពុំទាន់សាបរលាបអស់។ ប៉ុន្តែ ចង់មិនចង់ អ្នកទាំងពីរត្រូវបង្ខំចិត្តញញឹមញញែមទៅកាន់អ្នកគាំទ្រ។ បើទោះបីជាទស្សនៈនយោបាយរបស់អ្នកទាំងពីរផ្ទុយគ្នា ប៉ុន្តែ អ្នកទាំងពីរមានគោលដៅរួមគ្នាមួយ។ នោះគឺ យកឈ្នះគូបដិបក្ខមកពីគណបក្សសាធារណរដ្ឋឈ្មោះ Donald Trump ឲ្យខានតែបាននាថ្ងៃបោះឆ្នោត គឺថ្ងៃទី ៨ វិច្ឆិកាខាងមុខនេះ។
បើទោះបីជាកម្មវិធីនយោបាយមិនដូចគ្នា ១០០% យ៉ាងហោចណាស់ក៏លោក Bernie Sanders សុខចិត្តគាំទ្រកម្មវិធីអប់រំថ្នាក់ឧត្តមសិក្សារបស់លោកស្រី Hillary Clinton។ កម្មវិធីនោះ គឺផ្តល់ការសិក្សាឥតគិតថ្លៃសំរាប់សាកលវិទ្យាល័យរដ្ឋ។ បើតាមតួលេខ ៨០% នៃនិសិត្សដែលចេញពីគ្រួសារក្រីក្រអាចទទួលបានការលើកលែងពិសេសនេះ។ សំរាប់យុវជនអាមេរិក ថ្លៃសិក្សាគឺ ជាប្រធានបទសំខាន់។ ឧទាហរណ៍នៅសាកលវិទ្យាល័យរដ្ឋ New Hampshire និសិត្សអាមេរិកម្នាក់ៗត្រូវចំណាយប្រាក់ ២៨ ០០០ ដុល្លារក្នុងមួយឆ្នាំសំរាប់បង់ថ្លៃសិក្សា។
កាលពីខែកញ្ញា ក្រុមហ៊ុន Quinnipiac បានធ្វើការស្ទង់មតិមួយក្នុងចំណោមយុវជនអាមេរិកដែលមានអាយុចន្លោះពី ១៨ ទៅ ៣៤ ឆ្នាំ ដើម្បីចង់ដឹងពីបំណងបោះឆ្នោតគាំទ្របេក្ខជនមួយណា។ លទ្ធផលនៃការស្ទង់មតិនោះបានឲ្យដឹងថា លោកស្រី Hillary Clinton ទទួលបានការគាំទ្រចំនួន ៣១% ខណៈដែលលោក Donald Trump ទទួលបានសម្លេង ២៦%។ ទន្ទឹមគ្នានេះ ទំនោរនៃសម្លេងឆ្នោតកំពុងតែងាកទៅរកបេក្ខជនពីរនាក់ផ្សេងទៀតមកពីគណបក្សតូចៗ ដែលគេមិនសូវស្គាល់ឈ្មោះ។ នោះគឺ គណបក្សសេរីនិយមជ្រុល ដែលជាចរន្តនយោបាយមួយគាំទ្រសេរីភាពបុគ្គលពេញទំហឹង ហើយការដឹកនាំប្រទេសពុំចាំបាច់មានរដ្ឋាភិបាល ឬក្រសួងមន្ទីរឡើយ។ បេក្ខជនប្រធានាធិបតីតំណាងឲ្យគណបក្សនេះ គឺលោក Gary Johnson ទំនងទទួលបានការគាំទ្រពីយុវជនចំនួន២៩%។ នេះក៏ព្រោះតែលោក Gary Johnson ជាអ្នកគាំទ្រអាពាហ៍ពិពាហ៍មនុស្សស្រលាញ់ភេទដូចគ្នា និងគាំទ្រការបង្កើតច្បាប់អនុញ្ញាតការប្រើប្រាស់កញ្ឆាដោយស្របច្បាប់។
ចំណែកឯលោកស្រី Jill Stein បេក្ខនារីប្រធានាធិបតីតំណាងឲ្យគណបក្សបៃតង (ក្រុមអ្នកបរិស្ថាននិយម) ក៏ទទួលការគាំទ្រចំនួន ១៥% ពីក្រុមយុវជន។ ប៉ុន្តែ នេះគ្រាន់តែជាលទ្ធផលនៃស្ទាបស្ទង់មតិតែប៉ុណ្ណោះ។ ចំណែកការស្ទង់មតិមួយទៀតរបស់ស្ថានីយ៍ទូរទស្សន៍ CBS និងសារព័ត៌មាន New York Times បានបង្ហាញឲ្យដឹងថា យុវជនចំនួន ២១% បានអះអាងថា ពួកគេនឹងនៅផ្ទះមិនចេញទៅបោះឆ្នោត ឬពួកគេនឹងបោះឆ្នោតជូនបេក្ខជនផ្សេងទៀតក្រៅពីលោកស្រី Clinton និងលោក Trump។ ដូចនេះ កិច្ចការបន្ទាន់របស់លោកស្រី Clinton គឺត្រូវប្រមែប្រមូលសម្លេងឆ្នោតពីក្រុមយុវជនទាំងនោះ។ ហេតុដូចនេះហើយបានជាលោកស្រីអំពាវនាវឲ្យពួកគេទៅចុះឈ្មោះបោះឆ្នោត និងចលនាគ្នាដើម្បីបំរើការស្ម័គ្រចិត្តជាមួយក្រុមការងារឃោសនារបស់លោកស្រី។
សូមបញ្ជាក់ផងដែរ កាលពីឆ្នាំ ២០០៨ ពីរភាគបីនៃពលរដ្ឋអាមេរិកក្រោមអាយុ ៣០ ឆ្នាំបានបោះឆ្នោតជូនលោក បារ៉ាក់ អូបាម៉ា។ ហើយសំរាប់ឆ្នាំ ២០១៦ នេះ បើតាមការស្ទង់មតិ យុវជនតែជាងមួយភាគបីប៉ុណ្ណោះគ្រោងបោះឆ្នោតជូនលោកស្រី Hillary Clinton។ ហើយកាលពីឆ្នាំ ២០១២ មានយុវជនអាមេរិកក្រោមអាយុ ៣០ ឆ្នាំចំនួន ២០ លាននាក់បានចេញទៅបោះឆ្នោត។ បើតាមតួលេខជំរឿនអាមេរិក ចំនួននេះស្មើនឹង ៤៥% ប៉ុណ្ណោះនៃចំនួនពលរដ្ឋសរុប ដែលស្ថិតក្នុងចន្លោះអាយុនេះ។
អ្វីដែលគណបក្សប្រជាធិបតេយ្យព្រួយបារម្ភបំផុតនោះ គឺខ្លាចយុវជនមិនចេញទៅបោះឆ្នោត។ កាលពីឆ្នាំ២០១២ ៧៥% នៃក្រុមមនុស្សវ័យចំណាស់អាយុលើស ៦៥ ឆ្នាំបានចេញទៅបោះឆ្នោត។ ហើយភាគច្រើនបំផុតនៃអ្នកទាំងនោះសុទ្ធសឹងតែជាអ្នកអភិរក្សនិយមគាំទ្រគណបក្សសាធារណរដ្ឋ។ នេះហើយជាគ្រោះថា្នក់ដែលលោកស្រី Hillary Clinton មិនអាចមើលរំលងបានឡើយ។ បើតាមអ្នកជំនាញ ប្រសិនបើគ្មានការគាំទ្រពីក្រុមយុវជនទេ លោកស្រី Hillary Clinton អាចចាញ់ឆ្នោតនៅរដ្ឋយុទ្ធសាស្រ្តសំខាន់ៗ។ មានអាទិដូចជា រដ្ឋ Carolina ខាងជើង, រដ្ឋ Florida និងរដ្ឋ Ohio ជាដើម។ សំរាប់ពួកយុវជន លោក Bernie Sanders នៅតែមានប្រជាប្រិយភាពដដែល។ កាលពីបោះឆ្នោតបឋមក្នុងបក្ស នៅតាមរដ្ឋមួយចំនួន លោកទទួលបានសម្លេងរហូតទៅ ៨០% ឯណោះពីក្រុមយុវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ