កូឡុំប៊ី ដំណើរឆ្ពោះទៅរកសន្តិភាពទាំងស្រុង
ជម្លោះប្រដាប់ដ៏ចំណាស់ជាងកន្លះសតវត្សរ៍នៅកូឡុំប៊ីទំនងជាងនឹងអាចបិទបញ្ចប់ទាំងស្រុង ក្នុងពេលឆាប់ៗនេះហើយ ! ពួកឧទ្ទាមប្រដាប់អាវុធមួយក្រុមទៀត ឈ្មោះថា យោធារំដោះជាតិ ELN និង រដ្ឋាភិបាលកូឡុំប៊ី បានប្រកាសរកការព្រមព្រៀងគ្នា នៅថ្ងៃចន្ទទី ១០តុលា នេះ ថានឹងផ្តើមចរចារកសន្តិភាពចាប់ពីចុងខែ តុលាទៅ។ បន្ទាប់ពីបានក្លាយជាជ័យលាភីរង្វាន់ណូបែលសន្តិភាព កាលពីថ្ងៃសុក្រ ចំពោះស្នាដៃប្រឹងប្រែងរកសន្តិភាពជាមួយពួកឧទ្ទាមហ្វាក តែដែលច្រានចោលប្រជាមតិ សេចក្តីប្រកាសព្រមព្រៀងចរចាសន្តិភាពជាមួយពួក ELN គឺជាថ្នាំប៉ូវលើកទឹកចិត្តដល់ប្រធានាធិបតីកូឡុំប៊ី ហ័នម៉ានុយអែល សិនតូស Juan Manuel Santos យ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ក្រោយពីបានសាកល្បងស្វែងរកការចរចាគ្នាដោយស្ងាត់ៗអស់រយៈពេលជិតបីឆ្នាំ ពួកឧទ្ទាមយោធារំដោះជាតិ និងរដ្ឋាភិបាលកូឡុំប៊ី បានប្រកាសព្រមព្រៀងពី ប្រទេសវេណេស៊ុយអេឡា នៅថ្ងៃនេះ ថានឹងចាប់បើកកិច្ចចរចាសន្តិភាព ជាសាធារណៈ ចាប់ពីថ្ងៃទី ២៧ តុលា ឆ្នាំ២០១៦នេះទៅ នៅក្រុង គីតូ ប្រទេសអេក្វាទ័រ។
នៅក្នុងជំនួបប្រជុំលើកដំបូង ភាគីទាំងពីរបានព្រមព្រៀងគ្នាថា សង្គមកូឡុំប៊ីក៏មានចំណែកមកចូលរួមក្នុងដំណើរការស្វែងរកសន្តិភាព ជាមួយក្រុមឧទ្ទាមទីពីររបស់ប្រទេស។
សេចក្តីប្រកាសនេះ ធ្លាក់មកចំពេលល្អណាស់ សម្រាប់លោកប្រធានាធិបតី ហ័នម៉ានុយអែល សិនតូស។ ៨ថ្ងៃក្រោយលទ្ធផលដ៏ភ្ញាក់ផ្អើលបំផុតនៃប្រជាមតិច្រានចោលកិច្ចព្រមព្រៀងសន្តិភាពជាមួយពួកឧទ្ទាមហ្វាក កងកម្លាំងប្រដាប់អាំវុធបដិវត្តកូឡុំប៊ី លោក សិនតូស អាចញញឹមចេញវិញជាថ្មី។
ដោយគ្មានបង្អង់ លោកប្រធានាធិបតី បានបញ្ចេញប្រតិកម្មភាពអបអរ និងរំពឹងថាកូឡុំប៊ី នឹងបានស្គាល់សន្តិភាពពេញលេញជូនប្រទេស។ ពេញលេញ ព្រោះ យោធារំដោះជាតិ និងពួកហ្វាក គឺជាក្រុមឧទ្ទាមចំបងរបស់កូឡុំប៊ី។ កកើតឡើងតាំងពីឆ្នាំ១៩៦០ តាមគំរូបដិវត្តនៅគុយបា ក្រុមឧទ្ទាមយោធារំដោះជាតិ មានយុទ្ធជនកាន់អាវុធប្រមាណ១៥០០នាក់ (ហ្វាក៥៧៦៥នាក់) នាពេលបច្ចុប្បន្ននេះ។
បើតាមអត្ថបទព្រមព្រៀងបង្ហាញនៅថ្ងៃចន្ទម្សិលមិញ ចំណុចគ្រឹះជាមូលដ្ឋាននៃគ្រប់រាល់ការចរចា នាថ្ងៃមុខ គឺ ក្រុមឧទ្ទាមយោធារំដោះជាតិ សន្យាផ្តើមដំណើរការដោះលែងចំណាប់ខ្មាំង ឱ្យបានមុនថ្ងៃទី ២៧ តុលា។ ចំណាប់ខ្មាំងម្នាក់ ត្រូវបានដោះលែង ប្រគល់ដល់ដៃក្រុមកាកបាទក្រហមនៅតាមបណ្តោយព្រំដែនវេណេស៊ុយអេឡាហើយ តាំងពីមុនសេចក្តីប្រកាសព្រមព្រៀងចូលចរចាទៅទៀត។ បើតាមប៉ាន់ស្មានជាផ្លូវការ នេះគឺជាចំណាប់ថ្នូរទីបី ដែលពួកឧទ្ទាមយោធារំដោះជាតិកូឡុំប៊ី បានដោះលែង ក្នុងរយៈពេលតែពីរសប្តាហ៍នេះ ហើយទំនងជានៅមានមនុស្សម្នាក់ទៀត ជាប់ជាចំណាប់ខ្មាំងនៅឡើយ។
ក្រុមឧទ្ទាមហ្វាក ក៏មិនបង្អង់នឹងបញ្ចេញប្រតិកម្មដែរ ! ប្រមុខដឹកនាំចរចារបស់ចលនាប្រដាប់អាវុធបដិវត្តកូឡុំប៊ី បានសម្តែងការស្វាគមន៍សេចក្តីប្រកាសដែលជាដំណឹងដ៏ល្អបំផុតសម្រាប់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ