បោះឆ្នោតអាមេរិក៖លោកស្រីគ្លីនតុនផ្តើមយុទ្ធនាការដើម្បីសភា ចំណែកលោកត្រាំកំពុងព្យាយាមស្រោចស្រង់ប្រជាប្រិយភាព
ចុះផ្សាយនៅថ្ងៃ៖
ស្តាប់ - ០៦:០៨
នៅសហរដ្ឋអាមេរិក ការបោះឆ្នោតជ្រើសរើសប្រធានាធិបតីថ្មីនឹងចាប់ផ្តើមនៅថ្ងៃទី៨ វិច្ឆិកាខាងមុខ។ បន្ទាប់ពីវេទិកាដេញដោលគ្នាយ៉ាងតឹងសរសៃ ក ចំនួន ៣ដងរវាងបេក្ខនារីគ្លីនតុនមកពីគណបក្សប្រជាធិបតេយ្យ និងបេក្ខជនដូណាល់ ត្រាំមកពីគណបក្សសាធារណរដ្ឋមក បេក្ខជនប្រធានាធិបតីទាំងពីររូបក៏កំពុងបន្តយុទ្ធនាការឃោសនាយ៉ាងសកម្មនាចុងសប្តាហ៍នេះ។ នៅថ្ងៃសៅរ៍ ទី២២ តុលា លោកស្រីគ្លីនតុនបានចុះធ្វើយុទ្ធនាការនៅក្នុងរដ្ឋ Ohio ហើយលោកត្រាំនៅក្នុងរដ្ឋ Pennsylvania។ អ្វីជាការកត់សម្គាល់ លោកស្រីគ្លីនតុនបានផ្តើមយុទ្ធនាការដើម្បីសភា ចំណែកលោកត្រាំកំពុងព្យាយាមស្រោចស្រង់ប្រជាប្រិយភាព។
នៅថ្ងៃទី៨ វិច្ឆិកាខាងមុខ ពលរដ្ឋអាមេរិកត្រូវចូលរួមបោះឆ្នោតជ្រើសរើសប្រធានាធិបតីថ្មី បោះឆ្នោតជ្រើសរើសតំណាងរាស្រ្តថ្មីសម្រាប់អាណត្តិ ២ឆ្នាំ និងក៏ចូលរួមបោះឆ្នោតជ្រើសរើសសមាជិកព្រឹទ្ធសភាថ្មីចំនួន ១ភាគ៣ សម្រាប់អាណត្តិ ៦ឆ្នាំ។ ដូច្នេះវាពិតជារឿងសំខាន់ខ្លាំងណាស់ដែលបេក្ខជននីមួយៗមិនអាចមើលរំលងបានទេ ពោលមិនអាចខ្វល់តែពីរឿងកៅអីប្រធានាធិបតីនៅសេតវិមានមួយគត់បានឡើយ។
នៅក្នុងប្រវត្តិសាស្រ្តនយោបាយអាមេរិកនាពេលកន្លងមក គណបក្សមួយដែលទទួលបានកៅអីប្រធានាធិបតីនៅសេតវិមានមិនប្រាកដថានឹងទទួលបានសម្លេងភាគច្រើននៅក្នុងសភា ឬនៅក្នុងព្រឹទ្ធសភាទេ ឬមួយក៏ថា ទទួលបានពីដំបូង តែក៏ស្រាប់បាត់បង់ទៅវិញនាការបោះឆ្នោតពាក់កណ្តាលអាណត្តិ ឬការបោះឆ្នោតថ្មី។ ជាក់ស្តែងនៅក្នុងជំនាន់លោកប្រធានាធិបតីបារ៉ាក់ អូបាម៉ាមកពីគណបក្សប្រជាធិបតេយ្យសព្វថ្ងៃ គណបក្សរបស់លោកដែលទទួលបានសម្លេងភាគច្រើនពីដំបូង តែបានបាត់បង់ទៅវិញក្នុងពេលបច្ចុប្បន្ន។
នៅក្នុងន័យនេះ ការលំបាក និងឧបសគ្គមានច្រើនសម្រាប់លោកអូបាម៉ាក្នុងការធ្វើកំណែទម្រង់ និងការអនុម័តច្បាប់មួយចំនួន។ អ៊ីចឹងហើយបានជាលោកស្រីគ្លីនតុនបានសម្រេចចិត្តយកឱកាសយុទ្ធនាការរយៈពេល ១៧ថ្ងៃខាងមុខដើម្បីពង្រឹងឯកភាពផ្ទៃក្នុងបក្សដោយធ្វើយ៉ាងណា លើកស្ទួយ និងជំរុញគណបក្សប្រជាធិបតេយ្យឲ្យទទួលបានសម្លេងភាគច្រើននៅក្នុងសភា និងព្រឹទ្ធសភា។ ការធ្វើយ៉ាងនេះដើម្បីប្រយោជន៍បក្សផង និងក៏ដើម្បីប្រយោជន៍លោកស្រីគ្លីនតុនដែរ ព្រោះបើលោកស្រីជាប់ឆ្នោត ហើយគណបក្សមានសម្លេងភាគច្រើននៅសភា និងនៅព្រឹទ្ធសភាទៀតនោះ លោកស្រីងាយនឹងសម្រេចលើគម្រោងកំណែទម្រង់ដែលបានសន្យាក្នុងពេលឃោសនា។
លោកស្រីគ្លីនតុនឈប់តបនឹងសម្តីដៀមដាម អុជអាលពីគូប្រជែង
ការដែលលោកស្រីគ្លីនតុនមានបំណងឈប់ឆ្លើយតបនឹងពាក្យសម្តីដៀមដាម អុជអាលរបស់លោកដូណាល់ ត្រាំត្រូវបានគេមើលឃើញថា មកពីលោកស្រីមានសុទិដ្ឋិនិយមឈ្នះការបោះឆ្នោតខាងមុខ។ កន្លងមក លទ្ធផលស្ទង់មតិសឹងតែទាំងអស់បានផ្តល់ឲ្យលោកស្រីគ្លីនតុនឈ្នះលោកដូណាល់ ត្រាំជាច្រើនពិន្ទុ។ នៅក្នុងវេទិកាដេញដោលចំនួន ៣លើកកន្លងមក លោកស្រីគ្លីនតុនក៏មានប្រៀបជាងលោកដូណាល់ ត្រាំ។ តែទោះជាយ៉ាងនេះក្តី លោកស្រីគ្លីនតុនមានការប្រយ័ត្នប្រយែងខ្លាំងណាស់លើលទ្ធផលស្ទង់មតិ។
នៅចំពោះមុខហ្វូងអ្នកចូលរួមជាង ៨ ០០០នាក់ក្នុងរដ្ឋ Pennsylvania នាថ្ងៃសៅរ៍ ទី២២ តុលា លោកស្រីគ្លីនតុនបានគូសបញ្ជាក់ថា មានពលរដ្ឋអាមេរិកជាង ២០០លាននាក់បានចុះឈ្មោះបោះឆ្នោត។ គឺជាចំនួនដ៏ច្រើនសម្បើមមិនធ្លាប់មាននៅក្នុងប្រវត្តិសាស្រ្តអាមេរិក។ ទន្ទឹមគ្នានេះ លោកស្រីគ្លីនតុនក៏បានបញ្ជាក់ពីបំណងឈប់ឆ្លើយតបនឹងសម្តីដៀមដាម អុជអាលដែលលោកស្រីយល់ឃើញថា ការឆ្លើយតបរយៈពេល ៤ម៉ោងកន្លះនៅក្នុងវេទិកាដេញដោលចំនួន ៣ដងកន្លងមក គឺគ្រប់គ្រាន់ដើម្បីអាចឲ្យពលរដ្ឋអាមេរិកវិនិច្ឆ័យ និងសម្រេចចិត្តជ្រើសរើសរវាងលោកស្រី និងលោកដូណាល់ ត្រាំ។
លោកដូណាល់ ត្រាំបន្តយុទ្ធនាការស្រោចស្រង់ប្រជាប្រិយភាព
ខុសពីលោកស្រីគ្លីនតុន លោកដូណាល់ ត្រាំកំពុងបន្តយុទ្ធនាការឃោសនាបោះឆ្នោតដូចទម្លាប់សព្វមួយដង និងដែលនៅក្នុងរយៈពេល ២សប្តាហ៍ខាងមុខត្រូវបានគេមើលឃើញថា លោកព្យាយាមលុបលាងរឿងអាស្រូវ និងព្យាយាមស្រោចស្រង់ប្រជាប្រិយភាពឡើងវិញ។ លុបលាងរឿងអាស្រូវទាក់ទងនឹងស្រីញីដែលពីមួយថ្ងៃទៅមួយថ្ងៃ មានស្រ្តីបន្តបន្ទាប់គ្នាបានចេញមុខសារភាពថា រូបគេត្រូវបានលោកដូណាល់ ត្រាំរំលោភបំពាន និងប្រើពាក្យមិនសមរម្យ។ គឺជារឿងអាស្រូវនៅក្នុងអតីតកាលយូរឆ្នាំ តែបាន និងកំពុងជះឥទ្ធិពលអាក្រក់ ព្រមទាំងធ្វើឲ្យប៉ះពាល់ខ្លាំងដល់រូបភាពលោកដូណាល់ ត្រាំដែលជាបេក្ខជនប្រធានាធិបតីនៅក្នុងប្រទេសបិតាប្រជាធិបតេយ្យ និងជាប្រទេសមហាអំណាចក្នុងលោក។
នៅក្នុងយុទ្ធនាការនាថ្ងៃសៅរ៍ ទី២២ តុលាក្នុងរដ្ឋ Ohio មហាសេដ្ឋីក្នុងជំនួញអចលនទ្រព្យរូបនេះមិនបានឆ្លើយតបត្រង់នឹងសម្តីរបស់លោកស្រីគ្លីនតុនទេ តែបានបង្ហាញចេញនូវកម្មវិធីដែលលោកត្រូវអនុវត្តន៍ក្នុងរយៈពេល ១០០ថ្ងៃនៃការកាន់តំណែងប្រធានាធិបតី ប្រសិនបើលោកជាប់ឆ្នោត។ កម្មវិធីទាំងនោះរួមមាន កម្រិតចំនួនអាណត្តិរបស់សមាជិកសភា និងព្រឹទ្ធសភា បង្កើតការងារឲ្យបាន ២៥លានការងារក្នុងរយៈពេល ១០ឆ្នាំ បញ្ចុះតម្លៃពន្ធ ៣៥% សម្រាប់គ្រួសារអាមេរិកាំងដែលមានជីវភាពមធ្យម ឬមួយក៏សាងសង់ជញ្ជាំងព្រំដែនជាមួយប្រទេសម៉ិចស៊ិកដើម្បីទប់លំហូរជនអន្តោប្រវេសន៍ជាដើម។
តែទន្ទឹមគ្នានេះ លោកដូណាល់ ត្រាំមិនភ្លេចនិយាយរឿងអាស្រូវបែកធ្លាយកន្លងមក ហើយក៏មិនអាចទប់កំហឹងបានដែរ។ ជាមួយនឹងសម្តីថ្លោសៗដូចទម្លាប់សព្វមួយដង លោកដូណាល់ ត្រាំបានចាត់ទុកស្រ្តីដែលចោទលោកថាជាក្រុមមនុស្សភូតកុហក និងព្រមានប្តឹងទៅតុលាការនៅក្រោយការបោះឆ្នោត។ ទន្ទឹមគ្នានេះ លោកត្រាំក៏បានបញ្ជាក់ជាថ្មីម្តងទៀតពីការសង្ស័យលើការបោះឆ្នោតដែលនឹងអាចមានការកេងបន្លំ និងគ្មានតម្លាភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ