ក្រុមហ៊ុនបច្ចេកវិទ្យាជាន់ខ្ពស់អាមេរិកព្រួតដៃគ្នាប្រឆាំងលោក Donald Trump
ចុះផ្សាយនៅថ្ងៃ៖
ស្តាប់ - ០៣:៤៧
Silicon Valley គឺជាទីក្រុងបច្ចេកវិទ្យាដ៏តូចមួយនៅរដ្ឋកាលីហ្វ័រញ៉ា។ ក្រុមហ៊ុនឯកជនអាមេរិកជំនាញផែ្នកបច្ចេកវិទ្យាជាន់ខ្ពស់ និងព័ត៌មានវិទ្យាស្ទើរតែទាំងអស់តែងប្រមូលផ្តុំគ្នាបង្កើតទីស្នាក់ការកណ្តាលរបស់ខ្លួននៅទីក្រុងនេះ។ ចាប់តាំងពីយុទ្ធនាការឃោសនាបោះឆ្នោតប្រធានាធិបតីអាមេរិកបានចាប់ផ្តើម ក្រុមហ៊ុនឯកជនទាំងនោះបានចេញមុខរិះគន់ឥតសំចៃលើលោក Donald Trump។ ហើយពួកគេបានបង្ហាញជំហរគាំទ្រលោកស្រី Hillary Clinton។ លើសពីនេះ ក្រុមហ៊ុនទាំងនោះបានចំណាយប្រាក់ចំនួនរាប់រយលានដុល្លារ ដើម្បីជួយជ្រោមជ្រែងដល់ការឃោសនាស្វែងរកសម្លេងឆ្នោតឲ្យលោកស្រី Hillary Clinton។
កាលពីប៉ុន្មានខែមុន សហស្ថាបនិកក្រុមហ៊ុនល្បីៗបានចេញលិខិតចំហរួមគ្នាមួយដើម្បីបង្ហាញពីក្តីព្រួយបារម្ភរបស់ពួកគេចំពោះបេ ក្ខភាពរបស់លោក Donald Trump។ ហើយពួកគេក៏បានព្រមានពីគ្រោះថ្នាក់ជាយថាហេតុណាមួយសំរាប់វិស័យបច្ចេកវិទ្យា និងការបង្កើតថ្មី ក្នុងករណីដែលលោក Trump ឡើងកាន់អំណាចជាប្រធានាធិបតីអាមេរិក។ ក្នុងចំណោមអ្នកចុះហត្ថលេខាលើលិខិតចំហនោះ ក្នុងនោះមានមនុស្សល្បីៗមួយចំនួនដូចជា៖ លោក Steve Wozniak (សហស្ថាបនិកក្រុមហ៊ុន Apple), លោក Evan Williams (ប្រធានក្រុមហ៊ុន Twitter), លោក Jimmy Wales (សហស្ថាបនិកវេបសាយ៍ Wikipedia) និងលោក Pierre Omidyar (ស្ថាបនិកក្រុមហ៊ុន eBay)។
សូមបញ្ជាក់ថា ក្នុងយុទ្ធនាការឃោសនាកន្លងមក លោក Donald Trump តែងថ្លែងសារនយោបាយប្រឆាំងជនអន្តោរប្រវេសន៍ និងចង់បិទមួយផ្នែកនៃលំហូរទាក់ទងតាមអ៊ិនធ័រណេត។ លើសពីនេះ លោក Trump ធ្លាប់បានរិះគន់ក្រុមហ៊ុន Apple ថាមិនមានមនសិការជាតិនិយមគ្រប់គ្រាន់ ដោយផលិតមុខទំនិញរបស់ខ្លួននៅប្រទេសចិនជាដើម។ យោងតាមការវិភាគរបស់លោក Geoffrey Skelley សាស្រ្តាចារ្យប្រចាំសាកលវិទ្យាល័យ Virginia បានឲ្យដឹងថា ទស្សនៈរបស់លោក Trump បង្ហាញពីភាពផ្ទុយគ្នាទាំងស្រុងប្រឆាំងនឹងចក្ខុវិស័យរបស់ក្រុមហ៊ុនបច្ចេកវិទ្យានៅ Silicon Valley។
ជាទូទៅ ក្រុមអ្នកបច្ចេកវិទ្យាមានជំនឿលើជនអន្តោរប្រវេសន៍ ដែលពួកគេគិតថាអាចនាំប្រយោធន៍ និងទេពកោសល្យថ្មីៗសំរាប់សហរដ្ឋអាមេរិក។ ហើយម៉្យាងទៀត ក្រុមហ៊ុនទាំងនោះភ័យខ្លាចលោក Trump បង្កសង្រ្គាមពាណិជ្ជកម្មជាមួយប្រទេសដ៏ទៃ ដែលអាចក្លាយជាបច្ច័យអាក្រក់ដល់ការរីកលូតលាស់វិស័យបច្ចេកវិទ្យា និងការបង្កើតថ្មី។
ដូចគ្នានេះផងដែរ លោកស្រី Melinda Jackson សាស្រ្តាចារ្យវិទ្យាសាស្រ្តនយោបាយប្រចាំសាកលវិទ្យាល័យ San José បានយល់ឃើញថា ទស្សនៈនយោបាយរបស់លោក Trump គឺជាឆ្អឹងទទឹង-កសំរាប់វិស័យបច្ចេកវិទ្យាជាន់ខ្ពស់អាមេរិក។ ខណៈដែលបណ្តាក្រុមហ៊ុននៅ Silicon Valley កំពុងរិះរកគំនិតច្នៃប្រឌិតបច្ចេកវិទ្យាថ្មីៗសំរាប់ថ្ងៃអនាគត ផ្ទុយទៅវិញ លោក Trump មានគំរោងចង់ទប់ស្កាត់មិនឲ្យវិស័យនេះរីកលូតលាស់។ ខណៈក្រុមហ៊ុន Google មានមហិច្ឆតាចង់ដាក់ព័ត៌មានទាំងអស់នៅលើពិភពលោកឲ្យអាចស្វែងរកបាននៅតាមអ៊ិនធ័រណេត ហើយក្រុម Facebook ស្រមៃចង់ឲ្យគ្រប់ទីកន្លែងទាំងអស់នៅលើភពផែនដីអាចភ្ជាប់អ៊ិនធ័រណេតបានទាំងអស់គ្នា ផ្ទុយទៅវិញ លោក Trump មានគំរោងសង់ជញ្ជាំងតាមបណ្តោយព្រំដែនម៉ិចស៊ិក ដើម្បីទប់ស្កាត់មិនឲ្យជនអន្តោរប្រវេសន៍ខុសច្បាប់ចូលទឹកដីអាមេរិក។
កន្លងមក លោក Mark Zuckerberg ស្ថាបនិកបណ្តាញសង្គម Facebook បានសរសេរសារមួយនៅលើទំព័ររបស់ខ្លួន ដោយបាននិយាយរិះគន់ដោយប្រយោលសំដៅលើលោក Trump។ ខ្លឹមសារនៃការទិតៀននោះ គឺអំពាវនាវឲ្យអ្នកបង្កើតកម្មវិធីបណ្តាញអ៊ិនធ័រណេត និងវិស្វករព័ត៌មានវិទ្យាទាំងអស់ជ្រើសរើសយកសេចក្តីសង្ឃឹម ជាជាងការភ័យខ្លាច ហើយត្រូវចេះជួយគ្នាបង្កើតស្ពានភ្ជាប់គ្នាទៅវិញទៅមក ជាជាងបង្កើតជញ្ជាំងកាត់ផ្តាច់គ្នា។ ទន្ទឹមគ្នានោះផងដែរ សហស្ថានិក Facebook ម្នាក់ទៀត គឺលោក Dustin Moskovitz បានសន្យាបរិច្ចាកថវិកាចំនួន ២០ លានដុល្លារជូនលោកស្រី Hillary Clinton និងគណបក្សប្រជាធិបតេយ្យ។
ចំណែកក្រុមហ៊ុន Apple វិញធ្លាប់បានបដិសេធឧបត្ថម្ភជាថវិការ ឬសម្ភារៈដល់សមាជតែងតាំងរបស់គណបក្សសាធារណរដ្ឋកាលពីខែកក្កដាកន្លងទៅនេះ។ ក្រុមហ៊ុនស្លាកសញ្ញាផ្លែប៉ោមនេះមិនពេញចិត្តចំពោះពាក្យសំដីរើសអើងប្រកាន់ពូជសាសន៍ និងពាក្យអសុរសចំពោះមនុស្សស្រីរបស់លោក Trump។ លើសពីនេះ លោក Tim Cook ប្រធានក្រុមហ៊ុន Apple និងភរិយាលោក Steve Jobs បានរួមគ្នារៀបចំកម្មវិធីរៃអង្គាសថវិការជួយជ្រោមជ្រែងការឃោសនារបស់លោកស្រី Hillary Clinton។
ក្រៅពីនោះ យើងក៏ឃើញមានឥស្សរជនល្បីឈ្មោះផ្សេងទៀត ដែលចេញមុខប្រឆាំងនឹងលោក Donald Trump។ តួយ៉ាងលោក Reid Hoffman សហស្ថាបនិកបណ្តាញសង្គម LinkedIn បានសន្យាបរិច្ចាកថវិកាចំនួន ៥ លានដុល្លារដល់សមាគមអតីតៈយុទ្ធជនអាមេរិក ប្រសិនបើលោក Trump ហ៊ានបញ្ចេញឯកសារប្រកាសប្រាក់ចំណូលប្រចាំឆ្នាំរបស់ខ្លួនជាសាធារណៈ។ ចំណែកលោក Jeff Bezos ម្ចាស់ក្រុមហ៊ុន Amazone ក៏ធ្លាប់ឆ្លើយឆ្លងពាក្យសំដីដាក់គ្នាជាមួយលោក Trump ផងដែរ។ លោក Trump បានរិះគន់ម្ចាស់ក្រុមហ៊ុន Amazone ដែលជាម្ចាស់សារព័ត៌មាន Washington Post ដែរផងនោះថាបានយកសារព័ត៌មាននេះជាឧបករណ៍វាយប្រហារខ្លួន ហើយលំអៀងទៅរកលោកស្រី Hillary Clinton។
ហើយលោក Trump ក៏ថែមទាំងចោទថាម្ចាស់ក្រុមហ៊ុន Amazone ធ្វើបែបនេះ គឺដើម្បីអែបអបពួកអ្នកកាន់អំណាចនៅរដ្ឋធានីវ៉ាស៊ីងតោន ដើម្បីទទួលបានការអនុគ្រោះមិនបង់ពន្ធប្រាក់ចំណេញក្រុមហ៊ុនជូនរដ្ឋ។ សង្គ្រាមពាក្យសំដីនេះបានធ្វើឲ្យម្ចាស់ក្រុមហ៊ុនលក់ទំនិញអនឡាញ Amazone មិនសប្បាយចិត្តឡើយ។ ជាការឆ្លើយតបបែបកំប្លែងផង និងខឹងច្រឡោតផង លោក Jeff Bezos បានព្រលយពាក្យថាចង់ដាក់លោក Trump ឲ្យនៅឆ្ងាយពីគេឯង ដើម្បីកុំឲ្យរំខានអ្នកដទៃ។ ប្រធានក្រុមហ៊ុន Amazone នេះក៏មានក្រុមហ៊ុនមួយទៀត គឺក្រុមហ៊ុន Blue Origin ដែលផ្តល់សេវាកម្មផែ្នកដឹកជញ្ជូនតាមយានអវកាស។ លោក Jeff Bezos ចង់ចាប់បញ្ជូនលោក Trump ទៅកាន់ទីអវកាស ដោយលោកសន្យាថានឹងកក់កន្លែងពិសេសមួយជូនលោក Trump នៅលើយានចម្លងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ