គ្រោះមហន្តរាយធម្មជាតិជំរុញឲ្យប្រជាជនចំនួន២៦លាននាក់រស់នៅក្នុងភាពក្រីក្រជារៀងរាល់ឆ្នាំ
គ្រោះមហន្តរាយធម្មជាតិ បង្កើតការខាតបង់ទឹកប្រាក់ចំនួន៥២០ ០០០លានដុល្លារក្នុង១ឆ្នាំនិងជំរុញឲ្យប្រជាជន២៦លាននាក់រស់នៅក្នុងភាពក្រីក្របំផុត-នេះបើយោងតាមរបាយការមួយរបស់ធនាគារពិភពលោកដែលចេញផ្សាយនៅថ្ងៃចន្ទ១៤វិច្ឆិកាម្សិលមិញ។
ចុះផ្សាយនៅថ្ងៃ៖
ស្តាប់ - ០២:១១
ការវាយតម្លៃលើការខាតបង់ខាងលើនេះ មានកំរិតខ្ពស់ជាង ៦០% លើសការប៉ាន់ស្មានរបស់អង្គការសហប្រជាជាតិទៅទៀតដែលមានត្រឹមតែ៣០០ ០០០ លានដុល្លារប៉ុណ្ណោះ -នេះជាការគូសបញ្ជាក់របស់ធនាគារពិភពលោក។ ធនាគារពិភពលោក បានពន្យល់ថា ខ្លួនចង់គិតគូរឲ្យបានប្រសើរជាងមុននៅលើការខូចខាតនានាដែលប្រជាជនក្រីក្រជាងគេ ជាអ្នកត្រូវទទួលរងគ្រោះមុនគេ-នេះបើយោងតាមរបាយការណ៍មួយរបស់ធនាគារពិភពលោកដែលបានចេញផ្សាយនាថ្ងៃចន្ទម្សិលមិញនៅក្រៅសន្និសីទអង្គការសហប្រជាជាតិស្តីពីអាកាសធាតុដែលប្រព្រឹត្តទៅនៅក្រុង Marrakech។
របាយការណ៍ដដែលបានលើកបញ្ជាក់ទៀតថា “ផលប៉ះពាល់សេដ្ឋកិច្ចនិងមនុស្សដោយគ្រោះមហន្តរាយធម្មជាតិ មានកំរិតខ្ពស់ជាងការដែលគេបានគិតស្មានរហូតមកដល់ពេលនេះ»។ របាយការណ៍នេះ បានវាយតម្លៃដោយពុំផ្អែកទាំងស្រុងតែទៅលើការខាតបង់សម្ភារៈតែមួយមុខគត់នោះទេ (ដែលមានដូចជា អាគារផ្ទះ,ផ្លូវ, លនិងល។) ក៏ប៉ុន្តែបូករួមទាំងការបាត់បង់ “នៅលើផ្នែកសុខុមាលភាព" របស់មនុស្សផងដែរដូចជា (បញ្ហាអសមត្ថភាពក្នុងការធានាក្នុងការចំណាយលើផ្នែកសុខភាព, អាហារ, ការអប់រំ, លនិងល។) ។
បើគេពិចារណាទៅលើ "ការបាត់បង់នៃសុខុមាលភាពនេះវិញ " របាយការណ៍របស់ធនាគារពិភពលោក បានពន្យល់ប្រាប់ទៀតថា "ប្រជាជនដែលក្រីក្រជាងគេបំផុត ចំនួន២០% បានខាតបង់សម្ភារៈតែចំនួន ១១%ប៉ុណ្ណោះ ក៏ប៉ុន្តែនៅលើផ្នែកសុខុមាលភាពវិញ ពួកគេបានបាត់បង់រហូតដល់ទៅ ៤៧%ឯណោះ"។
យោងតាមរបាយការណ៍ធនាគារពិភពលោកដែរ :«ខ្យល់ព្យុះNargis ដែលបានវាយប្រហារនៅក្នុងប្រទេសភូមាកាលពីឆ្នាំ ២០០៨ បានបង្ខំឲ្យពាក់កណ្តាលនៃប្រជាកសិករដ៏ក្រីក្រជាងគេ ធ្វើការលក់ទ្រព្យសកម្ម របស់ខ្លួនរួមទាំងដីធ្លីផងដែរដើម្បីសងបំណុលគេ»។
ម្យ៉ាងទៀត សម្រាប់ប្រជាជន២៦លាននាក់ ផលប៉ះពាល់នៃគ្រោះមហន្តរាយធម្មជាតិទាំងនេះ បានជម្រុញឲ្យពួកគេកាន់តែធ្លាក់ខ្លួនក្នុងជីវភាពក្រីក្រថែមមួយកំរិតទៀត គឺពួកគេត្រូវបង្ខំចិត្តរស់នៅក្រោមបន្ទាត់នៃភាពក្រីក្រដោយមានប្រាក់ចំណូលកំណត់ត្រឹមតែ១ដុល្លាប៉ុណ្ណោះក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ