អេហ្ស៊ីប-អាមេរិក៖លោកអាល់ស៊ីស៊ីសង្ឃឹមថា លោកត្រាំនឹងយកចិត្តទុកដាក់ខ្លាំងលើសំណុំរឿងមជ្ឈិមបូព៌ា
នៅក្នុងប្រទេសអេហ្ស៊ីប លោកប្រធានាធិបតីអាល់ស៊ីស៊ីបានថ្លែងដោយសង្ឃឹមថា លោកប្រធានាធិបតីអាមេរិកទើបជាប់ឆ្នោតថ្មីដូណាល់ ត្រាំនឹងយកចិត្តទុកដាក់ខ្លាំងជាងលោកអូបាម៉ានៅក្នុងសំណុំរឿងមជ្ឈិមបូព៌ា។ គួរជម្រាបជូនថានៅក្នុងជំនាន់លោកអូបាម៉ា ទំនាក់ទំនងរវាងអាមេរិក និងមជ្ឈិមបូព៌ាមានការធ្លាក់ចុះខ្លាំងនិយាយជារួម និងជាមួយប្រទេសអេហ្ស៊ីប និយាយដោយឡែក។
ចុះផ្សាយនៅថ្ងៃ៖
ស្តាប់ - ០១:៥៥
គឺនៅក្នុងសេចក្តីប្រកាសព័ត៌មានមួយចេញផ្សាយនាថ្ងៃសៅរ៍ ទី១៩ វិច្ឆិកាដែលលោកប្រធានាធិបតីអេហ្ស៊ីបអាល់ស៊ីស៊ីបានថ្លែងដោយសង្ឃឹមថា លោកប្រធានាធិបតីអាមេរិកដែលទើបជាប់ឆ្នោតថ្មីដូណាល់ ត្រាំនឹងយកចិត្តទុកដាក់បន្ថែម និងកាន់តែមានលក្ខណៈផុសផុលចំពោះសំណុំរឿងនៅក្នុងតំបន់មជ្ឈិមបូព៌ា។ សូមជម្រាបជូនថា លោកប្រមុខរដ្ឋអេហ្ស៊ីបអាល់ស៊ីស៊ីដែលកំពុងដឹកនាំប្រទេសដោយកណ្តាប់ដៃដែកកំពុងមានទំនាក់ទំនងតានតឹងជាមួយរដ្ឋបាលអាមេរិកាំងរបស់លោកអូបាម៉ា និយាយជារួម និងជាមួយបុគ្គលអូបាម៉ា និយាយដោយឡែក។
ទីក្រុងវ៉ាស៊ីនតោនថែមទាំងបានព្យួរជំនួយយោធាសម្រាប់អេហ្ស៊ីប បន្ទាប់ពីលោកប្រធានាធិបតីជាប់ឆ្នោតតាមបែបប្រជាធិបតេយ្យម័រស៊ីបានធ្លាក់ពីអំណាចក្នុងខែកក្កដា ឆ្នាំ ២០១៣ ដោយរដ្ឋប្រហារយោធារៀបចំដោយឧត្តមសេនីយអាល់ស៊ីស៊ីជំនាន់នោះ។ ក្រោយពីបានឡើងកាន់ចង្កូតប្រទេស លោកអាល់ស៊ីស៊ីមិនញញើតនឹងវាយបង្រ្កាបលើក្រុមបះបោរដែលជាសកម្មជនរបស់លោកម័រស៊ីទេ។ ក្រុមអង្គការសិទ្ធិមនុស្សជាច្រើនបានចោទលោកអាល់ស៊ីស៊ីពីបទប្រើអំណាចផ្តាច់ការបំបិទសិទ្ធិសេរីភាពក្នុងការបញ្ចេញមតិ និងប្រើប្រព័ន្ធតុលាការប្រឆាំងជនណាដែលហ៊ានរិះគន់ ទិតៀនលើការដឹកនាំរបស់លោក។
ក៏ដូចជាថ្នាក់ដឹកនាំក្នុងប្រទេសអារ៉ាប់ផ្សេងទៀតដែរ លោកអាល់ស៊ីស៊ីបានទូរស័ព្ទទៅសាទរលោកដូណាល់ ត្រាំ។ លោកត្រាំដែលថ្នាក់ដឹកនាំអេហ្ស៊ីបភាគច្រើនយល់ឃើញថា នឹងអាចជួយស្រោចស្រង់ទំនាក់ទំនងរវាងទីក្រុងវ៉ាស៊ីនតោន និងទីក្រុងគែរឲ្យប្រសើរឡើងវិញ។ ដោយឡែក លោកអាល់ស៊ីស៊ីមិនបានសម្តែងក្តីបារម្ភចំពោះការលើកឡើងរបស់លោកដូណាល់ ត្រាំនៅក្នុងយុទ្ធនាការឃោសនាបោះឆ្នោតដែលថា លោកនឹងហាមមិនឲ្យប្រជាជនអ៊ីស្លាមចូលក្នុងទឹកដីអាមេរិកាំងទេ។ មិនព្រួយបារម្ភ ព្រោះលោកអាល់ស៊ីស៊ីបានចែកច្បាស់រវាងទ្រឹស្តីឃោសនា និងការអនុវត្តជាក់ស្តែងនៅពេលទទួលបានអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ