លោកត្រាំបរិហារការបន្លំសន្លឹកឆ្នោតនិងការបន្លំទៅបោះឆ្នោតខុសច្បាប់
ប្រធានាធិបតីអាមេរិកទើបជាប់ឆ្នោតថ្មី លោក ដូណាល់ ត្រាំ បានធ្វើការបរិហារនៅថ្ងៃអាទិត្យម្សិលមិញ ថា មានការលួចបន្លំសន្លឹកឆ្នោត ដ៏ធ្ងន់ធ្ងរ នៅក្នុងសម័យបោះឆ្នោតប្រធានាធិបតី ថ្ងៃទី ៨ វិច្ឆិកា ២០១៦។ លោក ត្រាំ ថែមទាំងបានអះអាង ដោយគ្មាននាំអ្វីជាភស្តុតាង ថា មានមនុស្សរាប់លាននាក់បានទៅបោះឆ្នោតដោយខុសច្បាប់ ក្នុងការបោះឆ្នោតដែលលោកជាឈ្នះ !
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
លោក ដូណាល់ ត្រាំ បានឈ្នះដាច់ ក្លាយជាប្រធានាធិបតីអាមេរិកទី៤៥ នៅក្នុងសម័យបោះឆ្នោត ថ្ងៃទី ៨ វិច្ឆិកា ដែលជាការបោះឆ្នោតដោយសកល មិនផ្ទាល់ ដោយយោងលើចំនួនប្រតិភូអ្នកបោះឆ្នោតតំណាង (២៩០នាក់សម្រាប់លោក ត្រាំ ទល់នឹង២៣២សម្រាប់លោកស្រី គ្លីនតុន)។ ប៉ុន្តែបើគិតអំពីចំនួនសន្លឹកឆ្នោតពលរដ្ឋវិញ គឺលោកស្រី គ្លីនតុន ទេ ជាអ្នកបានទទួលការគាំទ្រច្រើន ដោយនាំមុខលើសលោក ត្រាំ ដល់ទៅ ជាង២លាន២សែនសំឡេង។
ប៉ុន្តែពេញមួយចុងសប្តាហ៍នេះ ក្នុងបរិបទអន្តរកាល ដែលប្រធានាធិបតីថ្មីមិនទាន់ស្បថចូលកាន់តំណែងជាផ្លូវការផង រឿងអាស្រូវបន្លំសន្លឹកឆ្នោតបានផុសឡើងយ៉ាងខ្លាំង។ បេក្ខជនប្រធានាធិបតីឯករាជ្យនៃបក្សបរិស្ថាន បានទាមទារឱ្យមានការរាប់សន្លឹកឆ្នោតឡើងវិញ នៅក្នុងរដ្ឋបី Wisconsin Pennsylvanie Michigan។ ខាងលោកស្រីគ្លីនតុន ដ៏បានប្រកាសចូលរួមក្នុងការរាប់សន្លឹកឆ្នោតនេះដែរ កាលពីថ្ងៃសៅរ៍។
ហេតុដូច្នេះហើយបានជាលោក ដូណាល់ ត្រាំ ផ្ទុះសំដី ធ្វើការបរិហារតាមប្រព័ន្ធTwitter បកវិញថា មានការលួចបន្លំសន្លឹកឆ្នោតដ៏ធ្ងន់ធ្ងរនៅរដ្ឋ Virginia New Hampshire California ដែលលោកស្រីគ្លីនតុនជាឈ្នះ ហេតុអ្វីសារព័ត៌មានមិនចុះផ្សាយផង ?! លោកឈ្នះ មិនមែនត្រឹមមានចំនួនប្រតិភូច្រើនទេ តែសំឡេងប្រជាពលរដ្ឋគាំទ្រលោកក៏ច្រើនដែរ ប្រសិនបើគេដកចំនួនអ្នកទៅបោះឆ្នោតដោយខុសច្បាប់រាប់លាននាក់ចេញនោះ។
ជាមួយនឹងការចោទប្រកាន់ លោក ដូណាល់ ត្រាំ ក៏ដូចជាក្រុមប្រឹក្សាជំនិតៗរបស់លោក មិនបានបញ្ចេញអ្វីដែលជាភស្តុតាងបញ្ជាក់អំពីភាពមិនប្រក្រតីក្នុងសម័យបោះឆ្នោតឡើយ។ ក្រុមអ្នកសង្កេតការណ៍បោះឆ្នោត មិនដែលលើកឡើងសោះអំពីករណីបន្លំសន្លឹកឆ្នោត។ សូមបញ្ជាក់ថា ក្នុងពេលធ្វើយុទ្ធនាការឃោសនា និងក្នុងពេលដែលការស្ទង់មតិផ្តល់ប្រជាប្រិយភាពឱ្យលោកស្រីគ្លីនតុន លោក ដូណាល់ ត្រាំ ធ្លាប់បានព្រមានជាញយដងអំពីគ្រោះមានការបន្លំឆ្នោត តែលោកលែងចេញស្តីសោះអំពីបញ្ហានេះ តាំងពីបានជាប់ឆ្នោតដ៏គួរឱ្យភ្ញាក់ផ្អើលមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ