មនុស្សជំនិតនឹងលោក ដូណាល់ ត្រាំ កំពុងបំបែកបំបាក់គ្នាជុំវិញបេក្ខភាពរបស់លោក Mitt Romney
ចុះផ្សាយនៅថ្ងៃ៖
ស្តាប់ - ០៤:២៧
បច្ចុប្បន្ននេះ សមាជិករដ្ឋាភិបាលរបស់លោកប្រធានាធិបតីជាប់ឆ្នោតថ្មី ដូណាល់ ត្រាំ កំពុងលេចរូបរាងជាបណ្តើរៗហើយ។ សប្តាហ៍កន្លងទៅនេះ លោក ដូណាល៉ ត្រាំ ក៏បានតែងតាំងស្រ្តីពីររូបអោយកាន់កាប់តំណែងខ្ពស់ផងដែរ។ ម្នាក់ជាស្រ្តីវ័យក្មេងជនជាតិអាមេរិកដើមកំណើតឥណ្ឌាទទួលមុខងារជាឯកអគ្គរដ្ឋទូតអាមេរិកប្រចាំអង្គការសហប្រជាជាតិ។ ម្នាក់ទៀតជាស្រ្តីអ្នកជំនួយ និងមហាសេដ្ឋីទទួលមុខងារជារដ្ឋមន្រ្តីក្រសួងអប់រំ។ ប៉ុន្តែ ភាពស្រពិចស្រពិលនៅតែបន្តមានជុំវិញការតែងតាំងរដ្ឋមន្រ្តីការបរទេសអាមេរិក។ រវាងបេក្ខភាពលោក Rudy Giuliani និងលោក Mitt Romney តើនរណាគេនរណាគេនឹងក្លាយជារដ្ឋមន្រ្តីក្រសួងការបរទេសអាមេរិក?
ភាពប្រទាញប្រទង់គ្នាកំពុងតែបន្តមានជុំវិញតំណែងរដ្ឋមន្រ្តីការបរទេសអាមេរិក។ លោក John Kerry រដ្ឋមន្រ្តីការបរទេសអាមេរិកបច្ចុប្បន្ននឹងបញ្ចប់អាណត្តិការងារ ក្រោយពីលោកប្រធានាធិបតី បារ៉ាក់ អូបាម៉ា នឹងបញ្ចប់តំណែងប្រធានាធិបតីរយៈពេល ២ អាណត្តិ។ នៅក្នុងពិធីការរដ្ឋបាលអាមេរិក រដ្ឋមន្រ្តីការបរទេស គឺជាឥសរ្សជនសំខាន់ទី ៣ បន្ទាប់ពីប្រធានាធិបតី និងអនុប្រធានាធិបតី។ តំណែងនេះត្រូវបានគេចាត់ទុកថា មានលក្ខណៈយុទ្ធសាស្រ្តសំរាប់នយោបាយការបរទេសអាមេរិកជុំវិញពិភពលោក។ ហើយក្រសួងការបរទេសអាមេរិក គឺជាស្ថាប័នកំពូលមួយ ដែលមានបុគ្គលិកសរុបចំនួន ៧ ពាន់នាក់។ ស្ថាប័ននេះមានបណ្តាញស្ថានទូត និងស្ថានកុងស៊ុលធំជាងគេបំផុតក្នុងពិភពលោក។
បច្ចុប្បន្ននេះ បើទោះបីជាសមាសភាពសមាជិករដ្ឋាភិបាលរបស់លោក ដូណាល់ ត្រាំ កំពុងលេចចេញរូបរាងខ្លះៗហើយក៏ដោយ ប៉ុន្តែ អត្តសញ្ញាណ ប្រមុខការទូតអាមេរិកនៅពុំទាន់ដឹងនៅឡើយទេ។ កាលពីថ្ងៃព្រហស្បត្តិ៍សប្តាហ៍មុន សារព័ត៌មាន New York Times បានផ្សព្វផ្សាយអត្ថបទមួយជុំវិញការតែងតាំងមុខតំណែងកំពូលនេះ។ សារព័ត៌មាននេះបានដកស្រង់ប្រភពអនាមិកពីក្រុមការងារផ្ទេរអំណាចរបស់លោក ដូណាល់ ត្រាំ ។ ខ្លឹមសារអត្ថបទរបស់សារព័ត៌មាននេះបានអោយដឹងថា មនុស្សជំនិតជុំវិញលោក ដូណាល់ ត្រាំ កំពុងតែខ្វែងគំនិតគ្នារវាងបេក្ខភាពរបស់លោក Rudolph Giuliani និងលោក Mitt Romney។
លោក Rudolph Giuliani ឬមានឈ្មោះហៅកាត់ថា Rudy Giuliani មានអាយុ ៧២ ឆ្នាំ។ គាត់ជាអ្នកនយោបាយក្នុងជួរគណបក្សសាធារណរដ្ឋ ដែលបានចេញមុខតំបូងគេបង្អស់សំដែងការគាំទ្រលោក ដូណាល់ ត្រាំ។ លោក Giuliani ធ្លាប់បានកាន់កាប់តំណែងជារដ្ឋអាជ្ញាអមតុលាការក្រុងញ៉ូវយក។ ហើយគាត់មានឈ្មោះបោះសំលេងនៅពេលកាន់កាប់តំណែងជាចៅហ្វាយក្រុងញ៉ូវយក ចន្លោះពីឆ្នាំ១៩៩៤ ដល់ឆ្នាំ២០០១។ គាត់បានប្រាប់ពីបំណងចង់បានមុខតំណែងប្រមុខការទូតនេះតាំងដើមតំបូងនៃយុទ្ធនាការឃោសនាបោះឆ្នោតម្ល៉េះ។ ប៉ុន្តែ គាត់ពុំមានបទពិសោធន៍ក្នុងកិច្ចការនយោបាយការបរទេសឡើយ។ បើទោះបីជាយ៉ាងណា គាត់ត្រូវបានគេគិតថា ជាមនុស្សមានគោលជំហរតឹងរឹងនិយមការពារប្រយោធន៍អាមេរិកដាច់ខាត។ គំនិតនេះ គឺវាស្របគ្នាបេះបិទទៅនឹងគំនិតនយោបាយរបស់ក្រុមអ្នកស្និទស្នាលនឹងលោក ដូណាល់ ត្រាំ។
ចំណែកលោក Mitt Romney វិញ លោកជាមហាសេដ្ឋីប្រកបមុខជំនួញនៅរដ្ឋ Utah។ ហើយគាត់បានប្រឡូកចូលក្នុងឆាកនយោបាយ ដោយបានជាប់ឆ្នោតកា្លយជាអភិបាលរដ្ឋ Massachusetts ចន្លោះពីឆ្នាំ២០០៣ ដល់២០០៧។ គាត់ក៏ធ្លាប់ជាអតីតៈបេក្ខជនប្រធានាធិបតីឆ្នាំ ២០១២ តំណាងអោយគណបក្សសាធារណរដ្ឋ។ ប៉ុន្តែ លោកបានទទួលបរាជ័យចាញ់លោក បារ៉ាក់ អូបាម៉ា។ មានអាយុ ៦៩ ឆ្នាំ លោក Romney ត្រូវបានគេមើលឃើញថា ជាអ្នកសាធារណរដ្ឋនិយមដែលមានគំនិតនយោបាយរមទមពុំតឹងរឹងជ្រុលនិយម។ គេប្រៀបប្រដូចស្ទីលនយោបាយគាត់ទៅនឹងលោក John Kerry រដ្ឋមន្រ្តីការបរទេសបច្ចុប្បន្ន។ ប៉ុន្តែ មនុស្សជំនិតជុំវិញលោក ដូណាល់ ត្រាំ មិនចូលចិត្តលោក Mitt Romney ឡើយ។ ព្រោះក្នុងកំឡុងពេលឃោសនាបោះឆ្នោតបឋមក្នុងបក្ស លោក Mitt Romney បានចេញមុខជាផ្លូវការប្រឆាំងនឹងលោក ដូណាល់ ត្រាំ។ ហើយគាត់ថែមទាំងបានចាត់ទុកលោក ត្រាំ ថាជាជនកុហកនិយាយបោកប្រាស់។
ថ្វីបើលោក Romney ពុំមានបទពិសោធន៍ក្នុងកិច្ចការ នយោបាយការបរទេសក៏ដោយ ប៉ុន្តែ លោក ដូណាល់ ត្រាំ ចាត់ទុកលោក Romney ជាមនុស្សគន្លឹះមិនអាចរំលងបានឡើយ។ តាមពិតទៅ នេះក៏ដោយសារតែ លោក ដូណាល់ ត្រាំ កំពុងព្យាយាមផ្សះផ្សារអ្នកគាំទ្រគណបក្សសាធារណរដ្ឋ។ លោក Romney អាចដើរតួនារីសំរួបសំរួលជាមួយគណបក្សសាធារណរដ្ឋ។ គាត់ជាមនុស្សមានឥទ្ធិពលអាចរំងាប់ចិត្តអ្នកសាធារណរដ្ឋកណ្តាលនិយម ដែលកំពុងតែភ័យព្រួយចំពោះនយោបាយការបរទេសដ៏ស្រពិលស្រពិលរបស់រដ្ឋាភិបាលលោក ដូណាល់ ត្រាំ។ ម៉្យាងទៀត វត្តមានលោក Romney ជារដ្ឋមន្រ្តីការបរទេសអាមេរិកក៏អាចធានាដល់បណ្តាប្រទេសសម្ព័ន្ធមិត្តទាំងឡាយ ដែលកំពុងតែតាមដានចក្ខុវិស័យនយោបាយការបរទេសរបស់រដ្ឋាភិបាលអាមរិកថ្មី។
បេក្ខភាពរបស់លោក Mitt Romney ក៏ចោទជាចំណោទបញ្ហាផងដែរ ជុំវិញខ្សែបន្ទាត់ទំនាក់ទំនង រវាងសហរដ្ឋអាមេរិកជាមួយប្រទេសរុស្សី។ លោក ដូណាល់ ត្រាំ ចង់អោយសហរដ្ឋអាមេរិកមានទំនាក់ទំនងល្អូកល្អឹនជាមួយប្រទេសរុស្សី ក្នុងការដោះស្រាយបញ្ហាអន្តរជាតិសំខាន់ៗ។ កាលពីឆ្នាំ២០១២ លោក Mitt Romney ធ្លាប់បានប្រកាសក្តែងៗហើយថា រុស្សីជាសត្រូវទីមួយនៃភូមិសាស្រ្តនយោបាយអាមេរិក។ នេះហើយជាចំនុចដែលខ្វែងយោបល់គ្នារវាងលោក ត្រាំ និងលោក Romney។ ចាប់តាំងពីថ្ងៃពុធសប្តាហ៍មុន ក្រុមអ្នកគាំទ្រលោក ដូណាល់ ត្រាំ បានបញ្ចេញប្រតិកម្មប្រឆាំងនឹងលោក Mitt Romney។ ពួកគេបានសំដែងការមិនពេញចិត្តចំពោះទង្វើកន្លងមកដែលលោក Romney បានប្រឆាំងនឹងលោក ដូណាល់ ត្រាំ។
តាមរយៈស្ថានីយ៍ទូរទស្សន៍ Fox News លោក Newt Ginrich បានយល់ឃើញថា មិនខ្វះទេអ្នកមានសមត្ថភាព និងមានគំនិតនយោបាយការបរទេសស្របគ្នានឹងលោក ដូណាល់ ត្រាំ។ មនុស្ស ២០ នាក់ផ្សេងទៀតក្នុងចំណោមអ្នកគាំទ្រក៏សាកសមក្លាយជារដ្ឋមន្រ្តីការបរទេសអាមេរិកផងដែរ។ សូមបញ្ជាក់ថា Newt Ginrich ជាអ្នកនយោបាយជើងចាស់ម្នាក់របស់គណបក្សសាធារណរដ្ឋ។ គាត់ត្រូវបានគេដឹងថា ជាអ្នកប្រកាន់គោលជំហរអភិរក្សនិយមដ៏តឹងរឹង។ ហើយគាត់ក៏អាចក្លាយជារដ្ឋមន្រ្តីការបរទេសអាមេរិកថ្មីផងដែរ។ ចំណែកមនុស្សជំនិតម្នាក់ទៀត គឺលោក Mike Huckabee អតីតៈអភិបាលរដ្ឋ Arkansas ក៏មិនសប្បាយចិត្តឡើយចំពោះបេក្ខភាពនេះ។ គាត់បានលើកអំណះអំណាងថា បេក្ខភាពលោក Mitt Romney គឺប្រៀបដូចជាការមើលងាយ ឬជេរប្រទេចផ្តាសារ ដល់អ្នកបោះឆ្នោតអោយលោក ដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ