លោក អូបាម៉ា ព្រមានលោក ត្រាំ ស្តីពីការប្រយុទ្ធប្រឆាំងនឹងភេរវនិយម ដោយមិនបញ្ចេញឈ្មោះ
ម្សិលមិញ នាឱកាសអញ្ជើញទៅមូលដ្ឋានទ័ព Tampa នៅរដ្ឋFloride លោកបារ៉ាក់ អូបាម៉ា បានបង្ហាញតុល្យការការងារប្រយុទ្ធប្រឆាំងអំពើភេរវនិយមរបស់អាមេរិក។ លោកប្រធានាធិបតីផុតអាណត្តិបានការពារស្នាដៃ និងយុទ្ធសាស្ត្ររបស់លោក ដោយឆ្លៀតព្រមានដល់មេដឹកនាំអាមេរិកណាដែលបានសន្យាកម្ចាត់ពួកភេរវនិយដោយមិនចំណាយពេល។ ជាពាក្យព្រមានដែលសំដៅយ៉ាងច្បាស់ទៅលើសំដីរបស់លោកដូណាល់ ត្រាំ កាលពេលឃោសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
លោកបារ៉ាក់ អូបាម៉ា មានមោទនភាពនឹងការងារដែលលោកបានធ្វើ ! លោកទទួលខុសត្រូវទាំងស្រុងចំពោះយុទ្ធសាស្ត្រដែលលោកបានប្រើ ដូចជា ការដកកងទ័ពអាមេរិកចេញពីអ៊ីរ៉ាក់ ពីអាហ្វហ្កានីស្ថាន ប្រើការទូតមានប្រសិទ្ធិភាពជាងប្រើកម្លាំងទ័ព រកឃើញកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ការប្រើប្រាស់យន្តហោះដ្រូន លែងប្រើវិធីធ្វើទណ្ឌកម្មនៅក្នុងមន្ទីរឃុំឃាំង និងគោរពច្បាប់សង្គ្រាម។ នៅក្នុងពេលលើកបង្ហាញពីតុល្យការការងារនេះ លោកមិនបានបញ្ចេញសូម្បីតែមួយម៉ាត់ ឈ្មោះលោក ដូណាល់ ត្រាំ តែគ្រប់ខ្លឹមសារសុទ្ធតែមានន័យព្រមានអនាគតប្រធានាធិបតីអាមេរិកដែលនឹងត្រូវមកបន្តតំណែងពីលោកទាំងអស់។
លោក អូបាម៉ា បានវាយប្រហារមួយចំណុចម្តងៗ ខ្ទាស់គ្រប់សំដីដេលលោកដូណាល់ ត្រាំ បានស្រែកនៅពេលឃោសនា មានជាអាទិ៍ ពាក្យសន្យាធ្វើបញ្ជីឈ្មោះជនអ៊ីស្លាម បិទទ្វារមិនទទួលជនភៀសខ្លួនស៊ីរី ស្តារឡើងវិញឱ្យមានការធ្វើទារុណកម្មនៅក្នុងពន្ធនាគារ និងមួរខ្ចៅបណ្តឹងផ្នែកសារព័ត៌មាន និងប្រកាសថាការឡើងកម្តៅនៃភពផែនដីជាពាក្យភូតភរ។ លោកបានពន្យល់ថា “ពួកភេរវជនមិនអាចបំផ្លាញសហរដ្ឋអាមេរិកបានឡើយ តែយើងអាចកម្ចាយខ្លួនឯងនៅផ្ទៃក្នុងប្រទេស ប្រសិនបើយើងមិនគោរពតម្លៃរបស់យើង"។
លោកប្រធានាធិបតីបានបន្ថែមទៀតថា “ក្នុងសង្គ្រាមប្រឆាំងនឹងភេរវនិយម យើងត្រូវការពារសេរីភាពរបស់ជនស៊ីវិល។ ពួកភេរវជនចង់ឱ្យឃើញប្រឆាំងគ្នា។ ដូច្នេះបើអាមេរិកចេញមុខធ្វើសង្គ្រាមប្រឆាំងអ៊ីស្លាម នោះអាមេរិកមិនត្រឹមតែខាងបង់ច្រើនទេ តែគឺយើងភ្លេចទាំងស្រុងគោលការណ៍គ្រឹះដែលយើងសន្យាការពារ។" ក្នុងនាមជាអគ្គមេបញ្ជាការប្រទេស លោកអូបាម៉ា បានរំលឹកថា "អាមេរិកមិនមែនជាប្រទេសសាកល្បងសាសនា ដើម្បីជាវិថីនៃសេរីភាព និងមិនមែនជាប្រទេសដែលមានប្រជាពលរដ្ឋនេះត្រូវបានទទួលការគោរពជាងពលរដ្ឋនោះ មានកាន់អត្តសញ្ញាណប័នពិសេស ឬត្រូវធ្វើបទបង្ហាញថាមិនមែនជាសត្រូវផ្ទៃក្នុងទេ។ អាមេរិកគឺជាជាតិមួយដែលតស៊ូប្រឆាំងនឹងការរើសអើង ប្រឆាំងនឹងការប្រើអំណាច។ ពលរដ្ឋអាចបញ្ចេញមតិប្រឆាំងនឹងអាជ្ញាធរ អាចរិះគន់ប្រធានាធិបតីដោយគ្មានផលវិបាក ! នេះហើយភាពខុសគ្នារវាងអាមេរិកនឹងពួកផ្តាច់ការ និងភេរវជន។”
ប៉ុន្តែ គេមិនដឹងថាតើលោក ដូណាល់ ត្រាំ នៅមុនកញ្ចក់ទូរទស្សន៍ស្តាប់ពាក្យវាយប្រហាររបស់លោកអូបាម៉ា ដែរឬអត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ