សហភាពអ៊ឺរ៉ុបនិងគុយបាចុះកិច្ចព្រមព្រៀងមួយដើម្បីរៀបចំទំនាក់ទំនងជាប្រក្រតីរវាងគ្នាឡើងវិញ
សហភាពអឺរ៉ុបនិងប្រទេសគុយបា កាលពីថ្ងៃចន្ទម្សិលមិញ បានចុះហត្ថលេខាលើកិច្ចព្រមព្រៀងនយោបាយនិងសហប្រតិបត្តិការនៅទីក្រុងព្រុចសែល។ គឺជាលើកតំបូងបង្អស់ដែលប្លុកអឺរ៉ុបនិងគុយបា បានចុះហត្ថលេខារួមគ្នាដើម្បីរៀបចំទំនាក់ទំនងប្រក្រតីជាមួយគ្នាឡើងវិញ។ ការចុះកិច្ចព្រមព្រៀង ត្រូវបានធ្វើឡើងតែ២សប្តាហ៍ប៉ុណ្ណោះបន្ទាប់ពីមរណៈភាពរបស់អតីតប្រធានាធិបតីគុយបាលោក Fidel Castro ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
កិច្ចព្រមព្រៀងរវាងសហភាពអឺរ៉ុបនិងគុយបា ត្រូវបានចុះហត្ថលេខាដោយរដ្ឋមន្ត្រីក្រសួងការបរទេសគុយបានិងប្រមុខការទូតសហភាពអឺរ៉ុបលោកស្រី Federica Moghrini នៅសម័យប្រជុំរបស់បណ្តារដ្ឋមន្ត្រីការបរទេសទាំង២៨ប្រទេសរបស់សហភាពអឺរ៉ុប។
រហូតមកទល់ពេលនេះ គុយបា គឺជាប្រទេសអាមេរិកឡាទីនតែមួយគត់ដែលពុំបានចុះកិច្ចព្រមព្រៀងសហប្រតិបត្តិការអន្តរជាតិជាមួយសហភាពអឺរ៉ុប។
ម្យ៉ាងទៀតការចុះហត្ថលេខានេះ ក៏ជាការចាប់បើកទំព័រប្រវត្តិសាស្ត្រជាផ្លូវការថ្មីមួយដែរនៅក្នុងទំនាក់ទំនងទ្វេភាគីអឺរ៉ុប-គុយបា។
ការរៀបចំទំនាក់ទំនងជាប្រក្រតីរវាងសហភាពអឺរ៉ុបនិងគុយបា ត្រូវបានប្រពឹ្រត្តទៅបន្ទាប់ពីសហរដ្ឋអាមេរិកក្រោមការដឹកនាំរបស់លោកប្រធានាធិបតី អូបាម៉ា បានងាកទៅចាប់ដៃជាមួយទីក្រុងឡាហាវ៉ានវិញដែលបានបិទបញ្ចប់ផងដែរកាលពីខែកក្កដាឆ្នាំ២០១៥ ការផ្តាច់ទំនាក់ទំនងរវាងសហរដ្ឋអាមេរិក-គុយបាតាំងពី ៦០ឆ្នាំកន្លងមក។ ហើយក្រោយមកទៀត លោកអូបាម៉ា បានអញ្ជើញទៅបំពេញទស្សនៈកិច្ចជាប្រវត្តិសាស្រ្តនៅគុយបាកាលពីខែមីនា២០១៦កន្លងទៅនេះ។
គួររំលឹកថា ប្រមុខការទូតសហភាពអឺរ៉ុប ធ្លាប់បានជូនដំណឹងដែរកាលពីចុងខែកញ្ញាមុនថា លោកស្រីនឹងដាក់សំណើរបស់លោកស្រីជូនដល់ប្រទេសអឺរ៉ុបទាំង២៨ ដើម្បីលុបចោលអត្ថបទមួយចុះនៅឆ្នាំ១៩៩៦ដែលទាមទារឲ្យគុយបាគោរពសិទ្ធមនុស្សឲ្យបានល្អត្រឹមត្រូវមុននឹងអាចរៀបចំទំនាក់ទំនងជាធម្មតាឡើងវិញជាមួយសហភាពអឺរ៉ុប។ អត្ថបទនេះ ត្រូវបានប្រមុខការទូតសហភាពអឺរ៉ុប វាយតម្លៃថាជាចំណុចខ្លាំងបំផុតមួយនៅក្នុងការខ្វែងគំនិតគ្នារវាងទីក្រុងព្រុចសែលនិងទីក្រុងឡាហាវ៉ាន។
សូមបញ្ជាក់ថា កិច្ចព្រមព្រៀងនយោបាយនិងពាណិជ្ចកម្មនេះដែលនឹងក្លាយទៅជាក្របខ័ណ្ឌច្បាប់ថ្មីនៃទំនាក់ទំនងរវាងសហភាពអឺរ៉ុបនិងប្រទេសគុយបា។ យោងតាមទីក្រុងព្រុចសែល គេត្រូវរង់ចាំការយល់ព្រមព្រៀងពីសំណាក់សភាអឺរ៉ុបនិងសភាជាតិក៏ព្រមទាំងសភាតំបន់នៃប្រទេសអឺរ៉ុបទាំង២៨សិន មុននឹងអាចអនុវត្តកិច្ចព្រមព្រៀងខាងលើនេះឲ្យបានពេញលេញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ