តើអាមេរិកប្រើយុទ្ធសាស្រ្តអ្វី ឆ្លើយតបនឹងចោរអ៊ីនធ័រនែតរុស្ស៊ី?
ចុះផ្សាយនៅថ្ងៃ៖
ស្តាប់ - ០៥:២៨
អាមេរិកបានរងការវាយប្រហារជាថ្មី ពីចោរអ៊ីនធ័រនែតរុស្ស៊ី។ តាមបណ្តាញសារព័ត៌មានអាមេរិក ចុះផ្សាយថ្ងៃសុក្រទី ៣០ធ្នូ ចោរអ៊ីនធ័រនែតរុស្ស៊ីបានប្រើកម្មវិធីលួចចូលទៅក្នុងកុំព្យូរទ័រគ្រប់គ្រងរោងចក្រអគ្គិសនីរដ្ឋអាមេរិកមួយកន្លែង។ ដំណឹងនេះកើតឡើង នៅតែមួយថ្ងៃក្រោយលោកប្រធានាធិបតីអាមេរិក បារ៉ាក់ អូបាម៉ា ប្រកាសដាក់ទណ្ឌកម្ម លើរុស្ស៊ី ដោយបានបណ្តេញចេញ មន្ត្រីទូត និងបិទការិយាល័យ ស៊ើបការណ៍សម្ងាត់រុស្ស៊ីក្នុងទឹកដីអាមេរិក ដែលជាប់ពាក់ព័ន្ធនឹងការវាយប្រហារអ៊ីនធ័រនែតទៅលើអ្នកនយោបាយអាមេរិក នៅក្នុងពេលបោះឆ្នោតប្រធានាធិបតីកន្លងទៅ។
តាមកាសែតអាមេរិក Washington post ចុះផ្សាយថ្ងៃសុក្រម្សិលមិញ អាមេរិកបានរកឃើញថា ចោរអ៊ីនធ័រនែតរុស្ស៊ី បានប៉ុនប៉ងជ្រៀតចូលទៅក្នុងបណ្តាញគ្រប់គ្រងរោងចក្រអគ្គិសនី មួយកន្លែងរបស់អាមេរិក។ ជាថ្មីម្តងទៀត រុស្ស៊ីត្រូវបានអាមេរិកចោទប្រកាន់ថា ជាអ្នកនៅពីក្រោយការវាយប្រហារអ៊ីនធ័រនែតនៅ អាមេរិក។
ការវាយប្រហារអ៊ីនធ័រនែតទៅលើរោងចក្រអគ្គសិនីអាមេរិក មិនបានបង្កឲ្យមានការខូចខាតអ្វីនោះទេ។ គេមិនដឹងថា តើចោរអ៊ីនធ័រនែតរុស្ស៊ីមានគោលបំណងអ្វីពិតប្រាកដ ដែលបានលួចចូលទៅគ្រប់គ្រងបណ្តាញរោងចក្រអគ្គិសនីអាមេរិក។ តើពួកគេចង់ធ្វើតេស្តសាកល្បង ប្រព័ន្ធការពារអ៊ីនធ័រនែត ឬមួយក៏សំងំចាំយកពិស ដើម្បីធ្វើសកម្មភាពនៅថ្ងៃណាមួយខាងមុខ?
ការវាយប្រហារទៅលើប្រព័ន្ធគ្រប់គ្រងរបស់រោងចក្រអគ្គិសនី ធ្លាប់កើតមានម្តង នៅប្រទេសអ៊ុយក្រែន នៅកាលអំឡុងសង្រ្គាម ឆ្នាំ ២០១៥ ដែលកាលណោះ បណ្តាញផ្គត់ផ្គង់អគ្គិសនីមួយផ្នែកធំ ត្រូវបានកាត់ផ្តាច់ ដោយការវាយប្រហារតាមប្រព័ន្ធអ៊ីនធ័រនែត ដែលគេចោទទម្លាក់ទៅលើរុស្ស៊ី ថា ជាអ្នកនៅពីក្រោយ។
ទោះជា ការវាយប្រហាររបស់ចោរអ៊ីនធ័រនែតលើកនេះ មិនបានបង្កការខូចខាតអ្វីមែន ដល់រោងចក្រអគ្គិសនីអាមេរិក ប៉ុន្តែ វាបញ្ជាក់ពីចំណុចខ្សោយនៃប្រព័ន្ធការពារអាមេរិក នៅចំពោះមុខការវាយប្រហារតាមអ៊ីនធ័រនែត។
កាលពីថ្ងៃព្រហស្បតិ៍ លោកអូបាម៉ា ទើបតែបណ្តេញចេញមន្រ្តីទូតអាមេរិក ៣៥នាក់ ដែលលោកចោទថា បានជាប់ពាក់ព័ន្ធ ជ្រៀតជ្រែកក្នុងការបោះឆ្នោតប្រធានាធិបតីអាមេរិក។ ក្រៅតែពីបណ្តេញមន្រ្តីទូតរុស្ស៊ី លោកអូបាម៉ាអះអាងថា នៅមានវិធានការមួយចំនួនទៀត ដែលលោកនឹងប្រើដើម្បី សងសឹករុស្ស៊ី។ លោកអូបាម៉ាមិនបានបញ្ជាក់លម្អិតវិធានការផ្សេងទៀត ដែលលោកនឹងប្រើដើម្បីប្រឆាំងនឹងរុស្ស៊ីនោះទេ។ លោកគ្រាន់តែនិយាយថា អាជ្ញាធរអាមេរិកនឹងចាត់វិធានការមួយ ដ៏សមគួរ និងក្នុងពេលវេលាសមរម្យមួយ។ “វិធានការទាំងនោះអាចមានផងដែរ ប្រតិបត្តិការសម្ងាត់ ដែលគេមិនបង្ហើបឲ្យសាធារណជនបានដឹងទេ” នេះបើតាមប្រសាសន៍របសល់លោកអូបាម៉ា។
តាមអ្នកជំនាញជាច្រើន ប្រតិបត្តិការសម្ងាត់ដែលលោកអូបាម៉ាលើកឡើង អាចមានតាំងពីការសងសឹករុស្ស៊ី វិញ តាមរយៈប្រព័ន្ធព័ត៌មានវិទ្យា។ ទីភ្នាក់ងារស៊ើបការណ៍សម្ងាត់របស់អាមេរិក NSA ដែលមានបណ្តាញ តាមដាន គ្រប់កន្លែង ក្នុងពិភពលោក មានសមត្ថភាពចូលទៅវាយប្រហារប្រព័ន្ធអ៊ីនធ័រនែតនៅក្នុងទឹកដីរុស្ស៊ី។ អ្នកខ្លះហ៊ានទាំងនិយាយថា ក្រៅតែពីវាយប្រហារតាមអ៊ីនធ័រនែត លើស្ថាប័នរុស្សី ដើម្បីបង្កការរាំងស្ទះ ឬឧបសគ្គដល់ការងារចាត់ចែងរបស់រដ្ឋអំណាចរុស្ស៊ីហើយនោះ អាមេរិកនៅអាចលួចជ្រៀតចូលទៅក្នុងបណ្តាញគ្រប់គ្រងអ៊ីនធ័រនែតរបស់ធនាគារ ដែលទុកដាក់ ទ្រព្យសម្បត្តិរបស់លោកប្រធានាធិបតីពូទីន ដែលគេវាយតម្លៃថា មានប្រមាណ៨៥ពាន់លានដុល្លារអាមេរិក។
តើអាមេរិកនឹងធ្វើសង្រ្គាមអ៊ីនធ័រនែតជាមួយរុស្ស៊ី
មន្ទីរបញ្ចកោន ឬប្រព័ន្ធផ្សព្វផ្សាយអាមេរិក ដូចជាCNN ឬ The New York Times ជាដើម ធ្លាប់ត្រូវរងការវាយប្រហារតាមអ៊ីនធ័រនែត ដែលមួយផ្នែកអាមេរិកបានចោទថា មានប្រភពមកពីរុស្ស៊ី។ ឥលូវនេះ ទីភ្នាក់ងារស៊ើបការណ៍សម្ងាត់អាមេរិក CIA ទើបរកឃើញទៀតថា រុស្ស៊ី ដែលដឹកនាំដោយលោកពូទីន ជាអ្នកនៅពីក្រោយ ប្រតិបត្តិការវាយប្រហារអ៊ីនធ័រនែតដើម្បី ជ្រៀតជ្រែក លូកដៃ ក្នុងកិច្ចការបោះឆ្នោតប្រធានាធិបតីនៅអាមេរិក។ នេះជារឿងមួយដ៏ឈឺក្បាល។ រដ្ឋាភិបាលអាមេរិកត្រូវប្រឈមមុខនឹងជម្រើសដ៏ស្មុគស្មាញមួយគឺមិនដឹងថា តើត្រូវឆ្លើយតបបែបណាទៅវិញទេ។
តាមអ្នកជំនាញមួយចំនួន អាមេរិករបស់លោកអូបាម៉ាទំនងមិនឆ្លើយតប សងសឹកអាមេរិក ដោយការវាយប្រហារតាមព័ត៌មានវិទ្យា តបទៅរុស្ស៊ីនោះទេ ឧទាហរណ៍ ដូចជា ប្រព័ន្ធការពារជាតិរុស្ស៊ី ឬរោងចក្រនុយក្លេអ៊ែរជាដើម។ បើអាមេរិកធ្វើដូច្នេះ គឺមិនខុសអី ពីការប្រកាសធ្វើសង្រ្គាមអ៊ីនធ័រនែតជាមួយរុស្ស៊ីនោះទេ។ សង្រ្គាមអ៊ីនធ័រនែត ដែលមិនត្រឹមធ្វើឲ្យភាគីទាំងសងខាង ត្រូវបំផ្លាញ និងខាតបង់ទេតែប៉ុណ្ណោះទេ ប៉ុន្តែ វានឹងអាចបណ្តាលឲ្យផ្ទុះសង្រ្គាមប្រយុទ្ធគ្នា មិនខាន។
អាមេរិករបស់លោកអូបាម៉ាចង់ជៀសឲ្យផុតពីការប្រឈមមុខ ធ្វើសង្រ្គាមជាមួយរុស្ស៊ី។ លោកអូបាម៉ាបានលើកឡើងម្តងម្កាលពីការប្រើប្រព័ន្ធព័ត៌មានវិទ្យាធ្វើជាអាវុធសងសឹក ប៉ុន្តែ លោកមិនដែលប្រើអនុវត្តវាម្តងណាទេ។ ផ្ទុយទៅវិញ បើតាមលោកJames Lewis អ្នកជំនាញ ខាងសន្តិសុខអ៊ីនធ័រនែត នៅវិទ្យាសា្ថនដើម្បីយុទ្ធសាស្រ្ត និងស្រាវជ្រាវអន្តរជាតិ ដើម្បីសងសឹករុស្ស៊ី លោកអូបាម៉ា ប្រហែលធ្វើតាមរុស្ស៊ី ដែលមានជំនាញខាងការចាប់បង្ខំ ចារកម្ម ឬនយោបាយការទូត។ ប៉ុន្តែ លោកនឹងមិនវាយបក ដោយវាយប្រហារតាមអ៊ីនធ័រនែតទៅលើរដ្ឋាភិបាលរុស្ស៊ីនោះទេ។
ម្យ៉ាងទៀត ការដែលលោកអូបាម៉ា និយាយថា នឹងមានវិធានការផ្សេងទៀត ដើម្បីប្រឆាំងនឹងរុស្ស៊ី គឺលោកគ្រាន់តែចង់ផ្ញើសារ ទៅកាន់ប្រមុខរដ្ឋាភិបាលរុស្ស៊ី ឬរបស់ប្រទេសផ្សេងទៀត ដែលចង់វាយប្រហារតាមអ៊ីនធ័រនែតទៅលើអាមេរិក ឲ្យប្រយ័ត្នខ្លួន ព្រោះថា បើគេវាយប្រហារអាមេរិក នោះ អាមេរិក មានសមត្ថភាព ហើយនិងចាត់វិធានការភ្លាម ដើម្បីវាយបកទៅវិញភ្លាមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ