តើលោក បារ៉ាក់ អូបាម៉ា អាចធ្វើសេចក្តីសំរេចអ្វីបានខ្លះមុនពេលជិតផុតអាណត្តិប្រធានាធិបតី
ចុះផ្សាយនៅថ្ងៃ៖
ស្តាប់ - ០៤:០២
នៅសល់ប្រមាណតែបីសប្តាហ៍ទៀតប៉ុណ្ណោះ លោក បារ៉ាក់ អូបាម៉ា នឹងបញ្ចប់អាណត្តិប្រធានាធិបតីអាមេរិក។ ជាទ្រឹស្តី លោក បារ៉ាក់ អូបាម៉ា មានពេលរហូតដល់ថ្ងៃទី២០ មករា ក្នុងការចាត់វិធានការណ៍ ឬធ្វើសេចក្តីសំរេចសំខាន់ៗ។ នៅសហរដ្ឋអាមេរិក ពេលជិតចប់អាណត្តិបែបនេះ គេចាត់ទុកអ្នកនយោបាយនោះថាកំពុងស្ថិតក្នុងស្ថានភាពឯកកោពុំសូវមានគេចាប់អារម្មណ៍ឡើយ។ ប៉ុន្តែ ផ្ទុយទៅវិញ ក្នុងរយៈពេលចុងក្រោយនេះ លោក អូបាម៉ា មិនបានសំងំលាក់ខ្លួនពួនអាត្មាឡើយ។ តើគាត់អាចឆ្លៀតធ្វើសេចក្តីសំរេចអ្វីខ្លះបានទៀតនាប៉ុន្មានសប្តាហ៍ខាងមុខនេះ? តើគាត់មានមធ្យោបាយគ្រប់គ្រាន់ដែរឬទេ?
ទី២០ មករាខាងមុខនេះ លោក បារ៉ាក់ អូបាម៉ា នឹងបញ្ចប់អាណត្តិប្រធានាធិបតីជាផ្លូវការ។ ប៉ុន្តែ មុននឹងចាកចេញពីមុខតំណែង ថ្មីៗនេះ លោក អូបាម៉ា បានបណ្តេញមន្រ្តីទូតរុស្សី និងបិទការិយាល័យស៊ើបការណ៍សម្ងាត់រុស្សីក្នុងទឹកដីអាមេរិក។ នេះបង្ហាញអោយឃើញពីវិធានការណ៍ក្តៅ ដែលលោក អូបាម៉ា ហ៊ានធ្វើពេលជិតអស់អំណាច។ យើងនឹងចោទសំណួរមួយចំនួន ដើម្បីស្វែងយល់ពីសេណារីយោមួយចំនួននៃសេចក្តីសំរេចចិត្តនយោបាយដែលលោក អូបាម៉ា អាចធ្វើបាន ឬធ្វើមិនបាន ក្នុងរយៈពេលប៉ុន្មានថ្ងៃទៀត។
តើលោក បារ៉ាក់ អូបាម៉ា អាចធ្វើកំណែទម្រង់ថ្មីបន្ថែមទៀតបានដែរឬទេ?
ចម្លើយ គឺមិនអាចធ្វើបានទេ! ជាទ្រឹស្តី រាល់ពង្រាងច្បាប់ថ្មីក្នុងន័យធ្វើកំណែទម្រង់សង្គមត្រូវឆ្លងកាត់សភាទាំងពីរថ្នាក់ ឬគេហៅថាសភាកុងគ្រែ (Congrès)។ ដូចយើងដឹងហើយថា រយៈពេលកន្លងមកនេះ រាល់គម្រោងកំណែទម្រង់ធំៗរបស់លោក អូបាម៉ា ត្រូវជាប់កកស្ទះនៅសភា។ នេះក៏ដោយសារតែ គណបក្សគូបដិបក្ខ គឺបក្សសាធារណរដ្ឋកំពុងតែគ្រប់គ្រងសភាទាំងពីរនេះ។ ហើយគណបក្សនេះតែងតែជំទាស់រាល់គម្រោងធំៗរបស់លោក អូបាម៉ា។ សូមរំលឹកជូនថា ចាប់តាំងពីការបោះឆ្នោតពាក់កណ្តាលអាណត្តិមកម្ល៉េះ ពោលកាលពី ២ ឆ្នាំមុន គណបក្សសាធារណរដ្ឋបានកាន់កាប់ព្រឹទ្ធសភាអាមេរិក។ ហើយចាប់តាំងពីឆ្នាំ២០១០ គណបក្សសាធារណរដ្ឋបានគ្រប់គ្រងសភាតំណាងរាស្រ្ត។
តើលោក អូបាម៉ា អាចដើរបង្វែរផ្លូវគេចវេសចេញពីសភាទាំងពីរបានដែរឬទេ?
ចម្លើយ គឺអាចធ្វើបានទេ ក្នុងករណីមួយចំនួន! ជាធម្មតា លោក អូបាម៉ា មានឧបករណ៍ច្បាប់ចំនួន ៣ សំខាន់ៗ ក្នុងការអនុវត្តសិទ្ធិអំណាចប្រតិបត្តិក្នុងឋានៈជាប្រធានាធិបតី។ ទីមួយ គឺក្រឹត្យប្រធានាធិបតី ។ ទីពីរ គឺអនុស្សរណៈប្រធានាធិបតី។ កន្លងមក លោកបានប្រើប្រាស់អំណាចពិសេសនេះ ក្នុងការធ្វើសេចក្តីសំរេចលើសំណុំរឿងធំៗ។ មានជាអាទិ៍ដូចជាវិធានការណ៍ទាក់ទងនឹងការប្រើប្រាស់អាវុធ ការលើកតំកើងតួនាទីស្រ្តីនៅក្នុងជួរកងទ័ព និងការអភិរក្សមួយផែ្នកនៃដែនសមុទ្រ Bering។ លក្ខណៈពិសេសរបស់ក្រឹត្យប្រធានាធិបតី និងអនុស្សរណៈប្រធានាធិបតី គឺជាការជំរុញ និងបញ្ជាក់បន្ថែមលើការអនុវត្តន៍ច្បាប់ណាមួយ ដែលមានរួចស្រាប់ទៅហើយ។ ប៉ុន្តែ លក្ខណៈខុសគ្នារវាងសេចក្តីសំរេចទាំងពីរ គឺក្រឹត្យប្រធានាធិបតីចាំបាច់ត្រូវតែយោងបញ្ជាក់ឈ្មោះច្បាប់ណាមួយអោយបានច្បាស់លាស់។
ចំណែកឧបករណ៍ច្បាប់ទីបី គឺកិច្ចព្រមព្រៀងប្រធានាធិបតី។ លោក អូបាម៉ា បានប្រើប្រាស់សិទ្ធិពិសេសនេះក្នុងនយោបាយការបរទេសរបស់លោក។ តួយ៉ាងដូចជាការចុះហត្ថលេខាលើកិច្ចព្រមព្រៀងទីក្រុងប៉ារីសស្តីពីបម្រែបម្រួលអាកាសធាតុ និងកិច្ចព្រមព្រៀងកម្មវិធីនុយក្លេអ៊ែរជាមួយប្រទេសអ៊ីរ៉ង់។ បើយោងវតាមសារព័ត៌មាន USA Today លោក អូបាម៉ា គឺជាប្រធានាធិបតីដែលបានប្រើប្រាស់ក្រឹត្យប្រធានាធិបតីតិចជាងលោក Ronald Reagan និងលោក George W. Bush។ ប៉ុន្តែ លោក អូបាម៉ា បានប្រើប្រាស់អនុស្សរណៈប្រធានាធិបតីច្រើនជាងគេ។
តើសេចក្តីសំរេចប្រធានាធិបតីចូលជាធរមានជាអចិន្រ្តៃយ៍?
ចម្លើយ គឺមិនមែនទេ! តាមពិត ការប្រើប្រាស់ឧបករណ៍ច្បាប់សំរាប់បង្កើតសេចក្តីសំរេចចិត្តប្រធានាធិបតីពុំមានចែងច្បាស់លាស់ក្នុងរដ្ឋធម្មនុញ្ញអាមេរិកឡើយ។ កន្លងមក គណបក្សសាធារណរដ្ឋធ្លាប់បានរិះគន់ថា ការប្រើប្រាស់សេចក្តីសំរេចចិត្តប្រធានាធិបតីនេះជាទង្វើបំពានច្បាប់ ឬអធម្មនុញ្ញភាព។ ប៉ុន្តែ មែនទែនទៅ ស្របច្បាប់ ឬមិនស្រប វាអាស្រ័យលើតុលាការសហព័ន្ធអាមេរិកជាអ្នកសំរេចចុងក្រោយ ក្នុងករណីមានអ្នកប្តឹងជំទាស់ណាមួយចំពោះសេចក្តីចិត្តប្រធានាធិបតី។
ដូចនេះ ចង់មិនចង់ សេចក្តីសំរេចទាំងប៉ុន្មានរបស់លោកប្រធានាធិបតី អូបាម៉ា អាចត្រូវលោក ដូណាល់ ត្រាំ ប្រធានាធិបតីថ្មីប្តឹងជំទាស់ពេលណាក៏បាន។ កន្លងមក លោក ត្រាំ ក៏ធ្លាប់បានថ្លែងថា កិច្ចការតំបូងគេរបស់គាត់ក្រោយពេលចូលកាន់កាប់មុខតំណែង គឺកែប្រែសេចក្តីសំរេចមួយចំនួនរបស់លោក អូបាម៉ា ដែលលោកគិតថាមិនស្របរដ្ឋធម្មនុញ្ញអាមេរិក។
តើសេចក្តីសំរេចមួយចំនួនរបស់លោក អូបាម៉ា អាចចងជើងប្រធានាធិបតីបន្ទាប់បានដែរឬទេ?
ចម្លើយ គឺអាចចងបាន! ជាក់ស្តែង លោក បារ៉ាក់ អូបាម៉ា បានចេញសេចក្តីហាមឃាត់មិនអោយជីកខួងធ្វើអាជីវកម្មប្រេង និងឧស្ម័នក្រោមដីនៅតំបន់មហាសមុទ្រអាកទិក និងអាត្លង់ទិក។ សេចក្តីសំរេចនេះ គឺផ្អែកលើច្បាប់ស្តីពីការអភិរក្សដែនដីនៅក្រោមសមុទ្រជុំវិញសហរដ្ឋអាមេរិក។ ហើយច្បាប់នេះទៀតសោតបានទុកសិទ្ធិអំណាចអោយប្រធានាធិបតីក្នុងមុខតំណែងជាអ្នកសំរេច។ ហើយការសំរេចចិត្តនេះនឹងមានលក្ខណៈអចិន្រ្តៃយ៍មិនអាចកែប្រែបានវិញឡើយ។
ក្រុមអ្នកសង្កេតការណ៍បានចាត់ទុកសេចក្តីសំរេចនេះជា គឺជាចេតនារបស់លោក អូបាម៉ា ក្នុងការបង្កើតឧបសគ្គមុនពេលដែលលោក ដូណាល់ ត្រាំ ចូលកាន់កាប់មុខតំណែង។ សូមបញ្ជាក់ថា ក្នុងកំឡុងពេលឃោសនាស្វែងរកសម្លេងឆ្នោត លោក ដូណាល់ ត្រាំ ធ្លាប់បានប្រកាសសន្យាក្តែងៗហើយថា ដើម្បីបង្កើតការងារដល់ពលរដ្ឋអាមេរិក គាត់នឹងអនុញ្ញាតអោយមានសកម្មភាពជីករុករកធនធានប្រេងកាត និងឧស្ម័នក្រោមដី។ ហើយក្នុងរយៈពេលប៉ុន្មានថ្ងៃខាងមុខនេះ លោក អូបាម៉ា អាចចេញសេចក្តីសំរេចថ្មីៗបន្ថែមទៀត ដើម្បីទប់ស្កាត់គោលនយោបាយថ្មីរបស់រដ្ឋាភិបាលលោក ដូណាល់ ត្រាំ។
តើលោក អូបាម៉ា មានអំណាចអ្វីបន្ថែមទៀតដែរឬទ?
តាមពិតទៅ លោកប្រធានាធិបតីកំពុងផុតអាណត្តិរូបនេះមានសិទ្ធិសំរេចលើកិច្ចការធំៗមួយចំនួនទៀតក្នុងនោះមានដូចជា៖ ព្យួរតួនាទី ឬបញ្ចប់មុខតំណែងមន្រ្តីជាន់ខ្ពស់នៅក្នុងរដ្ឋាភិបាល ឬកងទ័ព, សំរេចបញ្ចេញឯកសារ ឬកម្មវិធីសម្ងាត់ជាសាធារណៈ និងលើកលែងទោសដល់អ្នកជាប់ពន្ធាគារ ឬជនជាប់ចោទដែលបានទម្លាយឯកសារសម្ងាត់អាមេរិកដូចជាករណី Chelsea Manning និង Edward Snowdenជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ