អគ្គលេខាធិការអង្គការសហប្រជាជាតិថ្មីថ្លែងសុន្ទរកថាដំបូងបង្ហាញទិសដៅដឹកនាំ
លោក អង់តូនីញ៉ូ ហ្គូទែរស្ហ៍ Antonio Guterres ត្រូវថ្លែងសុន្ទរកថាជាលើកដំបូង ក្នុងឋានៈជាអគ្គលេខាធិការអង្គការសហប្រជាជាតិ នៅថ្ងៃអង្គាទី ១០ មករានេះ។ នៅចំពោះមុខក្រុមប្រឹក្សាសន្តិសុខអង្គការសហប្រជាជាតិ លោកអគ្គលេខាធិការថ្មី នឹងសង្កត់ធ្ងន់អំពីដំណើរការរបស់ស្ថាប័នមួយនេះ ដោយធ្វើឱ្យមានភាពរស់រវើកឡើងវិញ និងបានទទួលការគាំទ្រខ្លាំងពីសំណាក់មហាអំណាច។ លោក ក៏ត្រូវបង្ហាញអំពីទិសដៅការទូតវិញ ដែលទំនងជាផ្តោតជាពិសេសទៅលើការប្រកាន់យុទ្ធសាស្ត្រណាដែលនាំដំណោះស្រាយឱ្យស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ចូលកាន់តំណែងបន្តពីលោកបាន គីមូន ជាផ្លូវការនៅថ្ងៃទី ១មករា ២០១៧ លោក អង់តូនីញ៉ូ ហ្គូទែរស្ហ៍ធ្លាប់បានបង្ហើបអំពីឆន្ទៈចង់ធ្វើកំណែទម្រង់ស្ថាប័នអង្គការសហប្រជាជាតិ ដោយត្រួសៗខ្លះៗមកហើយ។ តែនៅថ្ងៃនេះ លោកត្រូវថ្លែងសុន្ទរកថាជាលើកដំបូង ក្នុងនាមជាអគ្គលេខាធិការអង្គការប្រជាជាតិ យ៉ាងពិតប្រាកដ។
នៅក្នុងសុន្ទរកថាលើកដំបូងនេះ លោក ហ្គូទែរស្ហ៍ នឹងត្រូវសង្កត់ធ្ងន់អំពីដំណើរការរបស់ស្ថាប័ន ក្រុមប្រឹក្សាសន្តិសុខអង្គការសហប្រជាជាតិ ដែលកំពុងប្រេះឆាយ៉ាងខ្លាំង និងដែលអសមត្ថភាពក្នុងការចេញសេចក្តីសម្រេចព្រមព្រៀងរួម លើជម្លោះដ៏រ៉ាំរ៉ៃជាង៦ឆ្នាំនៅស៊ីរី។ សម្រាប់លោកអគ្គលេខាធិការ បរាជ័យរបស់សហគមន៍អន្តរជាតិពេលនេះគឺមកពីមិនអាចទប់ស្កាត់វិបត្តិ និងរក្សាសន្តិសុខឱ្យពិភពលោក។ ដំណោះស្រាយដ៏ប្រសើរគ្មានអ្វីក្រៅអីក្រៅពីត្រូវការមានអន្តរការី អាជ្ញាកណ្តាល និងការទូតថ្មី គាំទ្រដោយគ្រប់ប្រទេសដែលមានឥទ្ធិពលឡើយ។
តែផែនការចង់ផ្តល់ជីវិតថ្មីដល់ស្ថាប័នអង្គការសហប្រជាជាតិ អាចនឹងជួបភាពស្មុគស្មាញ ដោយហេតុតែអនាគតប្រធានាធិបតីអាមេរិកថ្មី មាននយោបាយការបរទេសមិនជាក់លាក់។ ក្នុងជំនួបតាមទូរស័ព្ទ ជាមួយលោកហ្គូទែរស្ហ៍ លោក ត្រាំ ចាត់ទុកថាក្លឹបណាត់ជួបគ្នានិងលំហែ ហើយធ្លាប់បានព្រមានថា អង្គការសហប្រជាជាតិនឹងប្តូរ ក្រោយថ្ងៃ២០មករា ថ្ងៃដែលលោកចូលកាន់តំណែងជាផ្លូវការ។ សង្ឃឹមថាសុន្ទរកថារបស់លោក ហ្គូទែរស្ហ៍ ដែលផ្តោតលើភាពចាំបាច់នៃការធ្វើកំណែទម្រង់អង្គការសហប្រជាជាតិ អាចទាក់ចិត្តលោកប្រធានាធិបតីអាមេរិកថ្មី ដូណាល់ ត្រាំបាន។
សេចក្តីសម្រេចដំបូង របស់លោកអគ្គលេខាធិការ ដែលប្រកាសបង្កើតគណៈកម្មការទទួលបន្ទុកដោះស្រាយបញ្ហារំលោភផ្លូវភេទរបស់ទាហានមួកខៀវ ក៏បានទទួលការស្វាគមន៍ពេញចិត្តពីសំណាក់អ្នកសាធារណរដ្ឋអាមេរិកដែរ។
បន្ទាប់ពីថ្លែងសុន្ទរកថាដំបូងនៅក្រុមប្រឹក្សាសន្តិសុខ លោកអគ្គលេខានឹងធ្វើដំណើរទៅហ្ស៊ឺណែវ និងជួបជាមួយប្រធានាធិបតីចិន ស៊ីជីនពីង ព្រោះថាចិនបានចូលវិភាគទានកាន់តែច្រើនឡើងក្នុងផ្នែករក្សាសន្តិសុខ និងពង្រឹងចំណែកក្នុងអង្គការសហប្រជាជាតិឥតឈប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ