នៅសល់ពេលតែ១០ថ្ងៃទៀតប៉ុណ្ណោះ ដែលលោកអូបាម៉ា នឹងត្រូវលាចេញពីតំណែងប្រធានាធិបតីអាមេរិក។ នៅថ្ងៃអង្គារទី ១០ មករានេះ លោកអូបាម៉ា នឹងធ្វើពិធីជួបជុំមួយ ដើម្បីថ្លែងសារ លាប្រជាជនអាមេរិកទាំងអស់ ពីទីក្រុងឈីកាហ្គោ។ ធ្វើជាប្រធានាធិបតី ប្រទេសមហាអំណាចធំបំផុតលើលោក រយៈពេល៨ឆ្នាំ លោកអូបាម៉ា បានបន្សល់ទុកនូវកេរតំណែលនយោបាយយ៉ាងច្រើន ព្រមទាំងគំរូនយោបាយបែបថ្មី ដែលអ្នកនយោបាយជំនាន់ក្រោយ គួរយកគំរូតាម។ ក៏ប៉ុន្តែយ៉ាងណា ក៏ដោយ គ្មានអ្វីមួយដែលល្អឥតខ្ចោះនោះទេ។ រដ្ឋាភិបាលលោកអូបាម៉ា ក៏ត្រូវបានគេរិះគន់ផងដែរ ថាជារដ្ឋាភិបាលដែលកំសាក មិនហ៊ានតតាំងដើម្បីរក្សាសន្តិភាពពិភពលោក។
គេនៅចាំមិនភ្លេចទេ នៅឆ្នាំ២០០៨ ពិភពលោកទាំងមូល បានអបអរសាទរចំពោះជោគជ័យរបស់លោកអូបាម៉ា ដែលបានជាប់ឆ្នោតក្លាយជាប្រធានាធិបតីអាមេរិក។ ក្នុងប្រវត្តិសាស្ត្រអាមេរិក លោកគឺជាមនុស្សស្បែកខ្មៅទីមួយ ដែលបានចូលកាន់តំណែងកំពូលនេះ។ មនុស្សម្នាជាច្រើន បានផ្ញើរក្តីសង្ឃឹមនៅនឹងលោក។
អូបាម៉ា ប្រធានាធិបតី មិនធម្មតា!
ជាទូទៅអ្នកវិភាគនយោបាយ ក៏ដូចជាអ្នកស្រាវជ្រាវវិទ្យាសាស្ត្រនយោបាយ បានចាត់ទុកថា លោកអូបាម៉ា គឺជា ប្រធានាធិបតីមិនធម្មតា។ មិនធម្មតា មានន័យថាមិនដូចអ្នកមុនៗ ប្លែក ហើយអស្ចារ្យរកអ្នកណាមកប្រៀបជាមួយមិនបាន។ ទាំងអស់នេះ គឺយើងអាចយល់បានតាមរយៈស្នាដៃ ដែលលោកអូបាម៉ាបានសម្រេចបាន បើទោះបីជាស្ថិតក្នុងកាលៈទេសៈលំបាកសព្វបែបយ៉ាង។ ហើយមួយទៀត គឺលោកអូបាម៉ា មិនដូចគេ ត្រង់របៀបធ្វើការ រឺរបៀបធ្វើនយោបាយរបស់លោក។ ៨ឆ្នាំមកនេះ លោកអូបាម៉ា មិនមែនគ្រាន់តែជាប្រធានាធិបតីនៃប្រទេសមហាអំណាចនោះទេ តែលោកអូបាម៉ា គឺជាតារាកំពូល ដែលមនុស្សម្នាតែងតែតាមដាន ដោយយកចិត្តទុកដាក់ និងដោយក្តីស្រលាញ់។
តើលោកអូបាម៉ា បានធ្វើអ្វីខ្លះសម្រាប់សហរដ្ឋអាមេរិក។ ដើម្បីងាយយល់ យើងគួរត្រូវរំលឹកអំពីស្ថានភាពរបស់សហរដ្ឋអាមេរិក នៅមុនពេលដែលលោកអូបាម៉ា ជាប់ឆ្នោតក្នុងឆ្នាំ២០០៨។ ពេលនោះជាពេលដែលសហរដ្ឋអាមេរិក ស្ថិតក្នុងរណ្តៅនៃវិបត្តិសឹងតែគ្រប់វិស័យ។ វិបត្តិធ្ងន់ជាងគេ គឺវិបត្តិសេដ្ឋកិច្ច បន្ទាប់ពីទីផ្សារហិរញ្ញវត្ថុ ធនាគារអាមេរិក រលំបះជើងសឹងតែទាំងអស់។ មនុស្សអត់ការងារធ្វើរាប់លានអ្នក។ វិបត្តិខាងក្រៅវិញ គឺអាមេរិកកំពុងវីវក់ធ្វើសង្រ្គាមនៅអាហ្វហ្កានីស្ថាន និងអ៊ីរ៉ាក់ ដែលជាសង្រ្គាមបរាជ័យ ដ៏អម៉ាស ដែលរដ្ឋាភិបាលរបស់លោកប៊ូស បានចាប់ផ្តើម។
ដូច្នេះ យើងអាចយល់បានថា ក្នុងពេលនោះ លោកអូបាម៉ា បានទទួលថ្ម ដែលមានទំងន់ធ្ងន់កំរិតណា ហើយជាការទទួលខុសត្រូវកំរិតណា។ តែ៨ឆ្នាំមកនេះ គ្រប់គ្នាអាចសន្មត់បានថា អាមេរិកមានកំលាំងពលំឡើងវិញ។ នេះហើយជាលទ្ធផលរួមនៃរដ្ឋាភិបាលលោកអូបាម៉ា។
កំណែទម្រង់ធំៗទាំង៣ ៖
កម្មវិធីកំណែទម្រង់៣ធំៗ របស់លោកអូបាម៉ា ដែលយើងអាចលើកមកនិយាយបាន គឺទីមួយកំណែទម្រង់ប្រព័ន្ធធានារ៉ាប់រងសុខភាព តាមរយៈច្បាប់ថ្មី ដែលមានឈ្មោះថា Obamacare។ គឺកម្មវិធីនេះហើយ ដែលអាចជួយប្រជាជនអាមេរិក ដែលមានជីវភាពក្រីក្រ អាចមានលទ្ធភាពព្យាបាលជំងឺ ក្រោមការជួយជ្រោមជ្រែងរបស់រដ្ឋ។ កំណែទម្រង់ទីពីរ គឺការរំដោះសេដ្ឋកិច្ចឲ្យមានសន្ទុះដើម្បីបង្កើតការងារ។ ជាលទ្ធផល ចំនួនអ្នកអត់ការងារធ្វើនៅអាមេរិក បានថយចុះជាលំដាប់ ហើយសេដ្ឋកិច្ចមានសន្ទុះកាន់តែប្រសើរ។ កំណែទម្រង់ចុងក្រោយ គឺកំណែទម្រង់ស៊ីជំរៅ នៅក្នុងប្រព័ន្ធហិរញ្ញវត្ថុនិងធនាគារ។ គឺវិស័យហិរញ្ញវត្ថុនេះហើយ ដែលជាដើមហេតុនៃវិបត្តិសេដ្ឋកិច្ចពិភពលោក។ លោកអូបាម៉ា បានមានៈធ្វើកំណែទម្រង់ក្នុងវិស័យនេះឲ្យបាន ដើម្បីធានាឲ្យទីផ្សារហិរញ្ញវត្ថុមានលំនឹង លែងស្ថិតតែនៅលើកម្មវត្ថុនៃការចំណេញ ដែលមិនខ្វល់ពីផលវិបាកនៃបំណុល ហើយកុំឲ្យ Wall Street ចេះតែធ្វើអ្វីបានតាមចិត្តដូចមុន។
ជារួម គឺលោកអូបាម៉ា បានសម្រេចនូវគោលបំណងរបស់លោក ដែលលោកចង់កសាងអំណាចរដ្ឋឲ្យបានរឹងមាំឡើងវិញ រដ្ឋដែលមានលទ្ធភាពអាចធ្វើអន្តរាគមន៍ ដោះស្រាយបញ្ហា អាចជួយប្រជាពលរដ្ឋដែលគ្មានលទ្ធភាព មិនមែនបណ្តោយឲ្យវិស័យឯកជន ធ្វើអ្វីបានតាមតែចិត្តទេ។
លោកអូបាម៉ា មានរបៀបធ្វើនយោបាយបែបថ្មី៖
និយាយពីរបៀបធ្វើការរបស់លោកអូបាម៉ាវិញ លោកអូបាម៉ា ត្រូវបានគេស្រលាញ់ គាំទ្រ ដោយសារតែលោកជាមនុស្សដែលយល់ពីការចង់បានរបស់យុវជនក្មេងៗ។ លោកជាមនុស្សសាមញ្ញ ដែលធ្វើឲ្យមនុស្សគ្រប់វ័យ មាននិស្ស័យចូលចិត្តលោក។ ការពិត វាជានិស្ស័យពីកំណើតរបស់លោក ព្រោះថាគ្រប់គ្នាមើលដឹងថា គ្រប់កាយវិការ ពាក្យសម្តីទាំងអស់ មិនមែនលោកសំដែងទេ តែជាការពិតដែលស្តែងពីអត្តចរិកពិត។ ក្នុងប្រវត្តិសាស្ត្រអាមេរិក ក្រៅពីលោក រូហ្សឺវែល និងលោកកេណឺឌី មិនមានប្រធានាធិបតីណា ដែលពូកែវោហារ និយាយថ្លែងសុន្ទរកថាអាចអន្ទងចិត្ត និងស្មារតីអ្នកស្តាប់ ដូចលោកអូបាម៉ាទេ។
អត្តចរិកពិតរបស់លោក គឺជាមនុស្សដែលសណ្តោសគ្នា ជាមនុស្សដែលចូលចិត្តផ្តល់ឱកាស ផ្តល់តំលៃឲ្យអ្នកដ៏ទៃ។ ជាក់ស្តែង បើយើងក្រលេកទៅមើលមនុស្សម្នា ដែលធ្វើការជាមួយគាត់ គឺសុទ្ធជាមនុស្សចំរុះជាតិសាសន៍ មានក្មេងមានចាស់។ លោកអូបាម៉ា ស្តាប់យោបល់គេឯងគ្រប់គ្នា។ របៀបធ្វើនយោបាយរបស់លោក មិនមែនបែបកំរោលចូល ចង់បានអ្វី ក៏ធ្វើភ្លាមទេ។ លោកអូបាម៉ា យល់ថាបើចង់ធ្វើកំណែទម្រង់ត្រូវធ្វើសន្សឹមៗ បែបទន់ភ្លន់ម្តងបន្តិចៗ។
បរាជ័យក្នុងសំណុំរឿងស៊ីរី ជាកំហុសយុទ្ធសាស្ត្រ៖
ក៏ប៉ុន្តែ ក៏ដោយសារនយោបាយបែបសន្សឹមៗ ឬក៏បែបទន់ភ្លន់នេះដែរ ដែលលោកអូបាម៉ា ត្រូវបានគេរិះគន់ ទាក់ទិននឹងនយោបាយការបរទេស របស់លោក ជាពិសេសទាក់ទិន ទៅហ្នឹងវិបត្តិនៅស៊ីរី។ ជាការពិត គ្មាននរណាម្នាក់ ដែលល្អឥតខ្ចោះ ហើយមេដឹកនាំប្រទេសណាមួយ ដែលធ្វើទៅត្រូវរហូតដែរ។ មួយវិញទៀត យើងក៏មិនអាចតម្រូវចិត្តមនុស្សគ្រប់គ្នាដែរ។
ក្នុងសំណុំរឿងស៊ីរី លោកអូបាម៉ា បានធ្វើរឿងមួយ ដែលគ្រប់គ្នាយល់ថា អាចជាភាពកំសាក។ លោកអូបាម៉ា កំសាក ដោយមិនចង់ធ្វើសង្រ្គាមដោយផ្ទាល់នៅស៊ីរី ដូចដែលអាមេរិក ធ្លាប់ធ្វើនៅអ៊ីរ៉ាក់ និងអាហ្វហ្កានីស្ថាន។ ការនេះ បានធ្វើឲ្យរុស្ស៊ីឆក់ឱកាស ជួយរដ្ឋាបាឆា អាល់អាសាដ ឲ្យមានប្រៀបឡើងវិញ។ ទីបំផុត ស្ថានការណ៍ប្រែប្រួលទាំងស្រុង ហើយអ្នកដែលរងគ្រោះ គឺប្រជាជនស៊ីរី ព្រោះត្រូវបន្តស្ថិតក្រោមអំណាចផ្តាច់ការរបស់បាឆា។
គ្រប់គ្នាទទួលស្គាល់ថា បើលោកអូបាម៉ា សម្រេចចិត្តបញ្ជូនទ័ពថ្មើរជើង ទៅវាយកងទ័ពបាឆា អាល់អាសាដ ទាន់ពេលវេលា ម្លេះស្ថានភាពនៅស៊ីរី មិនដុនដាបដូចសព្វថ្ងៃនេះទេ។ ក៏ប៉ុន្តែ យើងក៏គួរយល់ដែរថា វាជាការលៈទេសៈមួយលំបាកណាស់ សម្រាប់លោកអូបាម៉ា។ ក្នុងនាមជាប្រធានាធិបតីអាមេរិក លោកបានសន្យាថានឹងដកទ័ពចេញពីអ៊ីរ៉ាក់ និងអាហ្វហ្កានីស្ថាន។ ប្រជាជនអាមេរិក នឿយណាយ មិនចង់ឃើញប្រទេសខ្លួន បញ្ជូនកូនបញ្ជូនចៅទៅស្លាប់នៅស្រុកអ្នកដ៏ទៃនោះទេ។ ម្យ៉ាងវិញទៀត ការធ្វើសង្រ្គាមនៅបរទេស ចំនាយប្រាក់ច្រើនណាស់។ ទាំងអស់នេះហើយដែលលោកអូបាម៉ា ត្រូវថ្លឹងថ្លែង។ វាអាចជាកំហុសយុទ្ធសាស្ត្ររបស់លោកអូបាម៉ា តែយ៉ាងណាវាមិនមែនជាកំហុសរបស់លោកតែម្នាក់ឯងទេ ក្នុងវិបត្តិនៅស៊ីរី។
ស្មារតីកសាងសន្តិភាព៖
បើនិយាយពីស្នាដៃផ្សេងទៀត ក្នុងអាណត្តិលោក ទាក់ទិននឹងនយោបាយការបរទេស គឺមានច្រើនណាស់។ លោកអូបាម៉ា មានស្មារតីមួយដែលគួរកោតសរសើរ គឺស្មារតីបង្រួបបង្រួម ចាប់ដៃគ្នា កសាងសន្តិភាពនឹងគ្នា។ ស្មារតីនេះ បានចេញជាផ្លែផ្កា តាមរយៈការផ្លាស់ប្តូរជានាគ្នាឡើងវិញរវាងសហរដ្ឋអាមេរិក និងគុយបា។ នេះគឺជាទំព័រប្រវត្តិសាស្ត្រមួយធំណាស់ ដែលលោកអូបាម៉ា បានសរសេរ។ ផ្លែផ្កាមួយទៀតនោះ គឺកិច្ចព្រមព្រៀងស្តីពីកម្មវិធី នុយក្លេអ៊ែរអ៊ីរ៉ង់។ អ៊ីរ៉ង់ និងអាមេរិក មើលមុខគ្នាមិនត្រង់ ជាង២០ឆ្នាំ ដោយសារតែបញ្ហានេះ។ ការចរចាគ្នា បានអូសបន្លាយរាប់ឆ្នាំ ទំរាំសម្រេចបានកាលពីឆ្នាំ២០១៥។ បើបន្តឲ្យអ៊ីរ៉ង់ នៅឯកោ គឺមិនខុសពីបន្តឲ្យខ្លាសំងំសន្សំកំលាំងនោះទេ។ វិធីដែលល្អបំផុតដែលលោកអូបាម៉ាយល់ឃើញ គឺនិយាយជាមួយអ៊ីរ៉ង់ ដោយស្មោះត្រង់ ក្នុងនាមជាមិត្ត មិនមែនជាសត្រូវ។
ទន់ភ្លន់ តែមិនទន់ជ្រាយ៖
ក្នុងសំណុំរឿងអ៊ីស្រាអែល ប៉ាឡេស្ទីន រដ្ឋាភិបាលលោកអូបាម៉ា មិនមែនជាអាយ៉ងរបស់អ៊ីស្រាអែល ដូចដែលគេតែងតែនិយាយថាឲ្យរដ្ឋាភិបាលអាមេរិកកន្លងមកនោះទេ។ លោកអូបាម៉ា មិនខ្លាចនឹងរិះគន់អ៊ីស្រាអែល ទេ ទាក់ទិននឹងទៅនឹងការធ្វើទុក្ខបុកម្នេញ រឺការទន្ទ្រានធ្វើអាណានិគមលើដីប៉ាឡេស្ទីន។
លោកអូបាម៉ាសាមញ្ញ ទន់ភ្លន់ ស្លូតពិតមែន តែមិនទន់ជ្រាយទេ។ ពេលណាត្រូវម៉ឺងម៉ាត់ គឺម៉ឺងម៉ាត់។ ជាក់ស្តែង ក្នុងសំណុំរឿងចោរព័ត៌មានវិទ្យាលួចទិន្ន័យរបស់គណបក្សប្រជាធិបតេយ្យ ក្នុងពេលឃោសនាបោះឆ្នោត។ រដ្ឋាភិបាលលោក បើទោះបីជាជិតផុតអាណត្តិ តែបានចាត់វិធានការ ដាក់ទណ្ឌកម្មរុស្ស៊ី ឲ្យរុស្ស៊ីបាក់មុខ លើឆាកអន្តរជាតិ។ ឱកាសចុងក្រោយនេះ លោកអូបាម៉ា ចង់បង្ហាញថា លោកមិនដែលខ្លាចពូទីនទេ បើសិនជាពូទីន មិនគោរពលោក និងសហរដ្ឋអាមេរិក។
ក្នុងវិស័យបរិស្ថាន រដ្ឋាភិបាលលោកអូបាម៉ា បានចូលរួមជ្រោមជ្រែង ឲ្យមានកិច្ចព្រមព្រៀងទីក្រុងប៉ារីស ស្តីពីអាកាសធាតុ។ អាមេរិក និងចិន គឺជាកំពូលប្រទេសបញ្ចេញឧស្ម័នពុល តែប្រទេសទាំងពីរ បានចាប់ដៃគ្នា សន្យាកាត់បន្ថយវា។ ជាក់ស្តែង លោកអូបាម៉ា គឺជាប្រធានាធិបតីអាមេរិកតែម្នាក់គត់ ដែលបានធ្វើច្បាប់បង្កើតតំបន់អភិរក្សធម្មជាតិ និងជីវចំរុះច្រើនជាងគេបង្អស់។ គ្មាននរណាម្នាក់ធ្វើបានស្មើនឹងលោកអូបាម៉ាទេ ក្នុងវិស័យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ