លោកដូណាល់ ត្រាំ ចេញបញ្ជាឲ្យសង់ជញ្ជាំងនៅព្រំដែនអាមេរិក-ម៉ិចស៊ិក
ចុះផ្សាយនៅថ្ងៃ៖
ប្រធានាធិបតីអាមេរិក នៅថ្ងៃពុធទី ២៥មករា បានចុះហត្ថលេខាលើក្រឹត្យ មួយស្តីពីការសាងសង់ជញ្ជាំង នៅតាមបណ្តោយព្រំដែនជាមួយប្រទេសម៉ិចស៊ិក។ ក្រឹត្យប្រធានាធិបតីមានទិសដៅ ទប់ស្កាត់ លំហូរជនអន្តោប្រវេសន៍ខុសច្បាប់ ក្រុមជួញដូរថ្នាំញៀន និងក្រុមភេរវនិយម មកពីប្រទេសជិតខាង។ ប្រធានាធិបតីម៉ិចស៊ិកបានប្រតិកម្មថ្កោលទោសការសម្រេចរបស់ប្រធានាធិបតីអាមេរិក និងប្រកាសថា ម៉ិចស៊ិកនឹងមិនឲ្យលុយ សូម្បីមួយសេន ទៅក្នុងគម្រោងសាងសង់ជញ្ជាំង ទៅតាមការទាមទាររបស់ប្រធានាធិបតីអាមេរិក។
ទៅតាមក្រឹត្យប្រធានាធិបតី ចុះហត្ថលេខានៅថ្ងៃពុធម្សិលមិញ លោកដូណាល់ ត្រាំបានបញ្ជាឲ្យគេសាងសង់ឲ្យបានឆាប់បំផុតជញ្ជាំង នៅលើបណ្តោយព្រំដែនរបស់អាមេរិក ជាមួយប្រទេសម៉ិចស៊ិក ដែលមានប្រវែង៣២០០គីឡូម៉ែត្រ។ សម្រាប់លោកត្រាំ ប្រទេសមួយដែលគ្មានព្រំដែន គឺគេមិនហៅថា ប្រទេសទេ។ “ពីពេលនេះតទៅ អាមេរិកនឹងចាប់ត្រួតពិនិត្យព្រំដែនរបស់ខ្លួនឡើងវិញ”។
អាមេរិកមានរួចហើយ ជញ្ជាំង ប្រវែង ១០៥០គីឡូម៉ែត្រ នៅលើព្រំដែនម៉ិចស៊ិក-អាមេរិក។ ដូច្នេះ ជញ្ជាំងដែលរដ្ឋបាលលោកដូណាល់ ត្រាំ បញ្ជាឲ្យសង់បន្ថែម មានតែ ជាង ២០០០គីឡូម៉ែត្រតែប៉ុណ្ណោះ។ ជញ្ជាំងដែលលោកត្រាំចង់បាន គឺ ជញ្ជាំងដែលធ្វើឡើងពីថ្មបេតុង កំពស់ជាង១០ម៉ែត្រ និងដាក់កប់ជ្រៅ ទៅក្នុងដី ដើម្បីទប់ស្កាត់កុំឲ្យជនអន្តោរប្រវេសន៍ អាចជីករូងក្រោមដី ឆ្លងចូលក្នុងទឹកដីអាមេរិកបាន។
នៅក្នុងក្រឹត្យ ប្រធានាធិបតី លោកដូណាល់ ត្រាំបានសម្រេចផងដែរឲ្យគេជ្រើសរើសបន្ថែម ឆ្មាំការពារព្រំដែន ចំនួន ៥ពាន់នាក់ទៀត ដើម្បីត្រួតពិនិត្យ ទប់ស្កាត់កុំឲ្យមានមនុស្សលួចឆ្លងចូលខុសច្បាប់ ក្នុងទឹកដីអាមេរិក។ ដើម្បីសម្រួលដល់ការចាប់បញ្ជូនចេញជនអន្តោប្រវេសន៍ខុសច្បាប់ គេនឹងបង្កើតផងដែរ មណ្ឌលឃុំខ្លួនបណ្តោះអាសន្ន ជាច្រើន នៅតាមព្រំដែនអាមេរិក ជាមួយម៉ិចស៊ិក។ ក្រឹត្យរបស់លោកដូណាល់ ត្រាំសំដៅផងដែរកាត់បន្ថយប្រាក់ឧបត្ថម្ភរដ្ឋាភិបាល ដល់បណ្តារដ្ឋ ទីក្រុងណា ដែលការពារជនអន្តោប្រវេសន៍ខុសច្បាប់។ អាមេរិក មានជនអន្តោប្រវេសន៍រស់នៅខុសច្បាប់ប្រមាណ ១១លាននាក់ ដែលនៅក្នុងនោះ ពាក់កណ្តាលជាជនជាតិម៉ិចស៊ិក។
វិធានការរបស់លោកដូណាល់ ត្រាំ នឹងជានិមិត្តរូប ជាជាងដើរតួនាទី ពិតប្រាកដដើម្បីទប់ស្កាត់លំហូរជនអន្តោប្រវេសន៍ខុសច្បាប់។ ទោះជាជញ្ជាំងរបស់លោកដូណាល់ ត្រាំ មានកំពស់ខ្ពស់ និងវែងប៉ុណ្ណាក៏ដោយ ក៏វាមិនអាចទប់ស្កាត់ការហូរចូល ជនអន្តោប្រវេសន៍ខុសច្បាប់ ឬការជួញដូរគ្រឿងញៀន បានដែរ។ បើតាមក្រុមអ្នកជំនាញខាងជនអន្តោប្រវេសន៍ មនុស្សនៅតែអាចរកមធ្យោបាយ ដូចជាប្រើ ជណ្តើរកាន់តែខ្ពស់ ដើម្បី ដាក់ផ្លោះជញ្ជាំងចូលក្នុងទឹកដីអាមេរិក។ ចំណែក ក្រុមជួញដូរមកពីខាងម៉ិចស៊ិក វិញ គឺមានបទពិសោធន៍យូរឆ្នាំ មកហើយ ខាងបោះ រំលងថ្នាំញៀន ពីលើជញ្ជាំងដែលធ្លាប់ខណ្ឌព្រំដែនម៉ិចស៊ិក-អាមេរិក។
ការសិក្សាមួយនៅឆ្នាំ ២០០៦ ក៏បានបង្ហាញដែរថា ជនអន្តោប្រវេសន៍ខុសច្បាប់ ប្រមាណ ពាក់កណ្តាល នៅអាមេរិក តាមពិត មិនមែនចូលមកអាមេរិក តាមព្រំដែនគោកជាមួយម៉ិចស៊ិកទេ។ ពួកគេបានចូលទៅអាមេរិកតាមផ្លូវធម្មតា គឺព្រលានយន្តហោះ។ ពោលគឺ អ្នកដំណើរទាំងនោះ បានបន្តរស់នៅ អាមេរិក បន្ទាប់ពីទិដ្ឋាការ ហួស អស់សុពលភាពតែប៉ុណ្ណោះ។
លោកប្រធានាធិបតីEnrique Pena Nieto៖ ម៉ិចស៊ិកនឹងមិនចូលលុយសង់ជញ្ជាំងនោះទេ
ប្រធានាធិបតីម៉ិចស៊ិកបានប្រតិកម្មថ្កោលទោស ការសម្រេចរបស់ប្រធានាធិបតីអាមេរិក។ លោកEnrique Pena Nietoនៅបានបញ្ជាក់ថា ម៉ិចស៊ិកនឹងចូលលុយ ដើម្បីសង់ជញ្ជាំងដែលម៉ិចស៊ិកចាត់ទុកថា បានបំបែកបំបាក់ ជាជាងបង្រួបបង្រួម ប្រជាជាតិទាំងពីរ។ នៅក្នុងស្រុក លោកប្រធានាធិបតីម៉ិចស៊ិកត្រូវបានគណបក្សនយោបាយអំពាវនាវឲ្យលុបចោលទស្សនកិច្ចរបស់លោកទៅវ៉ាស៊ីនតោន នៅថ្ងៃទី៣១មករាខាងមុខ។ តាមគម្រោង លោកប្រធានាធិបតីម៉ិចស៊ិកត្រូវជួបលោកដូណាល់ ត្រាំ ដើម្បីនិយាយពីការដោះដូរពាណិជ្ជកម្មរវាងប្រទេសទាំងពីរ ដែលនៅក្នុងនោះ អាមេរិកជាទីផ្សារស្រូបយក៨០ភាគរយនៃផលិតផល នាំចេញ ពីម៉ិចស៊ិក។
ក្រុមការងាររបស់លោកដូណាល់ ត្រាំបានវាយតម្លៃថា តម្លៃ សង់ ជញ្ជាំងនៅលើព្រំដែនម៉ិចស៊ិក-អាមេរិក ជាង ២០០០គីឡូម៉ែត្រ ដែលគេត្រូវសង់បន្ថែម មានតម្លៃ ប្រមាណពី ៤ ទៅ ១០ពាន់លានដុល្លារអាមេរិក។ ប៉ុន្តែ តាមការគន់គូររបស់វិទ្យាស្ថានបច្ចេកវិទ្យាអាមេរិក ហៅកាត់ថា MIT តម្លៃសាងសង់ជញ្ជាំងនៅព្រំដែនម៉ិចស៊ិក អាមេរិក គឺច្រើនជាងតម្លៃដែលលោកដូណាល់ ត្រាំ បានប៉ាន់ស្មានឆ្ងាយណាស់។ គេវាយម្លៃថា គ្រាន់តែ ជញ្ជាំងប្រមាណ១៦០០គីឡូម៉ែត្រ គេត្រូវចំណាយលុយពី ២៧ ទៅ ៤០ពាន់លានដុល្លារអាមេរិក។ ចុះទម្រាំ ជញ្ជាំងដល់ទៅ ជាង ២ពាន់គីឡូម៉ែត្រ នោះ?
លោកដូណាល់ ត្រាំធ្លាប់ បានប្រកាសថា ម៉ិចស៊ិកនឹងចេញថ្លៃជាមួយអាមេរិកដើម្បីសង់ជញ្ជាំង ខ័ណ្ឌចែកព្រំដែនម៉ិចស៊ិក-អាមេរិក។ នៅថ្ងៃម្សិលមិញ បន្ទាប់ពីប្រធានាធិបតីម៉ិចស៊ិកនិយាយថា ម៉ិចស៊ិកនឹងមិនចូលលុយដើម្បីសង់ជញ្ជាំង លោកដូណាល់ ត្រាំដែលបានផ្តល់បទសម្ភាសន៍ដល់ទូរទស្សន៍ អាមេរិកាំង ABC បាននិយាយជាថ្មីថា ម៉ិចស៊ិកត្រូវចូលរួមចំណែកលុយ សង់ជញ្ជាំងជាមួយអាមេរិក។
តាមលោក Paul Ryan ប្រធានក្រុមសាធារណរដ្ឋនៅសភាអ្នកតំណាង អាមេរិកអាចចេញលុយមុនដើម្បីសង់ជញ្ជាំង បន្ទាប់មក គឺម៉ិចស៊ិកដែលនឹងត្រូវចេញលុយសងលើជញ្ជាំងដែលសង់រួច។ អាមេរិក គឺ មានមធ្យោបាយច្រើន ដើម្បីចាប់បង្ខំ គាបយកលុយពីម៉ិចស៊ិក នោះបើទោះជាម៉ិចស៊ិកមិនចូលរួមលុយជាផ្លូវការក្នុងគម្រោងសង់ជញ្ជាំងក៏ដោយ។ អាមេរិកអាចដំឡើងតម្លៃសំបុត្រចូល នៅច្រកព្រំដែនម៉ិចស៊ិក និងអាមេរិក ឬមួយស្រួលជាងនេះ ទៅទៀត អាមេរិកអាចរឹបអូសយកលុយទាំងប៉ុន្មាន ដែលប្រជាជនម៉ិចស៊ិកធ្វើការនៅអាមេរិក បានផ្ញើទៅសាច់ញាតិរបស់ខ្លួន ក្នុងប្រទេសម៉ិចស៊ិក ដែលគេបានវាយតម្លៃថា មានប្រមាណ ២៥ពាន់លានដុល្លារ ក្នុងមួយឆ្នាំៗ។
ការសាងសង់ជញ្ជាំងដែលត្រូវឆ្លងកាត់ដំណាក់កាលដ៏ស្មុគស្មាញខាងផ្លូវច្បាប់
លោកដូណាល់ ត្រាំ ចង់ឲ្យគេសង់ជញ្ជាំងឲ្យបានឆាប់ៗ ប៉ុន្តែ វាមិនងាយស្រួលធ្វើនោះទេ។ នៅពេលនេះ គេនៅមិនទាន់ដឹងកាលកំណត់ ដែលត្រូវសង់ជញ្ជាំង ហើយគេនៅមិនទាន់ដឹងថា តើរដ្ឋបាលលោកត្រាំ នឹងបានយកលុយមកពីណា មកសង់ជញ្ជាំងនោះ? ថ្វីត្បិតលោកត្រាំ និយាយថា តម្លៃសង់ជញ្ជាំងគឺមានតិចជាតម្លៃខាតបង់របស់ប្រជាជនអាមេរិកាំង ដែលគ្មានការងារធ្វើដោយសារតែជនអន្តោប្រវេសន៍ខុសច្បាប់ ប៉ុន្តែ លុយសង់ជញ្ជាំងគឺច្រើនណាស់ បើប្រៀបធៀបនឹងសារៈប្រយោជន៍របស់វា។
មួយវិញទៀត ដើម្បីសង់ជញ្ជាំង គេត្រូវឆ្លងកាត់ដំណាក់កាលប្តឹងផ្តល់នៅតុលាការច្រើន ព្រោះថា នៅត្រង់ចំណុចព្រំដែនខ្លះ ដែនដី ស្ថិតនៅក្រោមកម្មសិទ្ធិឯកជន។ រដ្ឋដែលមិនអាចសម្រេចសង់ជញ្ជាំង លើដីឯកជន ត្រូវចរចាទិញយកមកធ្វើជាសម្បត្តិរដ្ឋ។ ចំណុចចោទជាបញ្ហាមួយទៀត គឺ ទឹកស្ទឹង ដែលជាខ្សែបន្ទាត់ ធម្មជាតិ កំណត់ព្រំដែនរបស់ប្រទេសទាំងពីរ។ ច្បាប់ និងកិច្ចព្រមព្រៀងរបស់ម៉ិចស៊ិក និងអាមេរិកបានចែងហើយថា គេមិនអាចពុះខ័ណ្ឌចែកព្រំដែន ខ្សែទឹកមកប្រើតែម្នាក់ឯងនោះទេ។ មើលទៅលើថវិកា និងដំណាក់កាលផ្លូវច្បាប់ ជញ្ជាំងដែលលោកដូណាល់ ត្រាំ ចង់ខណ្ឌ បិទជិតព្រំដែនអាមេរិក និងម៉ិចស៊ិក គឺត្រូវការពេលវេលាយូររាប់ឆ្នាំ ទម្រាំអាចលេចចេញរូបរាងឡើងបាន។
លោកដូណាល់ ត្រាំ ការពារគម្រោងហាមឃាត់អ្នកកាន់សាសនាចូលក្នុងទឹកដីអាមេរិក
នៅក្នុងបទសម្ភាសន៍ជាមួយទូរទស្សន៍ លោកដូណាល់ ត្រាំ បាននិយាយថា គម្រោងរបស់លោកមិនមែន ហាមរាល់អ្នកកាន់សាសនាអ៊ីស្លាមមិនឲ្យចូលក្នុងទឹកដីអាមេរិកទេ។ គឺលោកគ្រាន់តែចង់កាត់បន្ថយ ចំនួនមនុស្សដែលមកពីប្រទេសកាន់សាសនាអ៊ីស្លាម ដែលអាចជាប្រភព ជង្រុកក្រុមភេរវនិយមតែប៉ុណ្ណោះ។
តាមកាសែតWashington Post ដែលបានចុះផ្សាយសេចក្តីព្រាងក្រឹត្យប្រធានាធិបតី រដ្ឋបាលលោកត្រាំ ដែលចង់ការពារជាតិពីការវាយប្រហាររបស់ភេរវជនបរទេស មានគម្រោងកាត់បន្ថយការផ្តល់ទិដ្ឋាការទៅឲ្យមនុស្សដែលចេញមកពីប្រទេសកាន់សាសនាអ៊ីស្លាម ចំនួន ៧ ដែលមានដូចជា អ៊ីរ៉ាក់ អ៊ីរ៉ង់ ស៉ូម៉ាលី ស៊ូដង់ ស៊ីរី ហើយនិងយេម៉ែន ដែលអាមេរិករបស់លោកត្រាំ ចាត់ទុកជាប្រទេសសំបូរដោយក្រុមភេរវនិយម។ ឆ្លើយទៅកាន់អ្នកកាសែត លោកដូណាល់ ត្រាំបាននិយាយថា លោកមិនខ្វល់ថា វិធានការរបស់លោកនឹងបង្កឲ្យមានការខឹងសម្បារអ្វីនោះទេ ព្រោះថាពិភពលោកសព្វថ្ងៃ កំពុងតែជួប”រឿងរញ៉េរញ៉ៃ”។ លោកដូណាល់ត្រាំ បានលើកឡើងពីកំហុសរបស់អាល្លឺម៉ង់ និងអឺរ៉ុប ដែលបានទទួលជនភៀសខ្លួនស៊ីរី រាប់លាននាក់ នៅឆ្នាំ ២០១៦។ លោកដូណាល់ ត្រាំបានបញ្ជារផងដែរឲ្យគេគិតគូរបង្កើតតំបន់សន្តិសុខពិសេស ក្នុងទឹកដីស៊ីរី ដើម្បីទទួលជនភៀសខ្លួន ស៊ីរី។
សម្រាប់ក្រុមការពារសិទ្ធិមនុស្ស វិធានការរបស់លោកត្រាំ ដែលនឹងរឹតបន្តឹងលើអ្នកកាន់សាសនាអ៊ីស្លាម មិនឲ្យចូលទឹកដីអាមេរិក នឹងមិនជួយដោះស្រាយវិបត្តិជនភៀសខ្លួននោះទេ។ ផ្ទុយទៅវិញ វានឹងទៅបំផុសឲ្យមានចលនាស្អប់អាមេរិក កាន់តែខ្លាំង។ ក្រុមជីហាត អង្គការភេរវនិយម នឹងទាញយកប្រយោជន៍ពីការដែលអាមេរិកបែរខ្នងដាក់ជនភៀសខ្លួន។ ក្រុមភេរវនិយម នឹងឃោសនាទាក់ទាញអ្នកគាំទ្ររបស់ខ្លួន ក្នុងហេតុផលថា ប្រធានាធិបតីអាមេរិក បានប្រកាសធ្វើសង្រ្គាម ជាមួយអ្នកកាន់សាសនាអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ