ដើម្បីសង់ជញ្ជាំង អាមេរិកចង់ដំឡើងពន្ធលើទំនិញនាំចូលពីម៉ិចស៊ិក
ចុះផ្សាយនៅថ្ងៃ៖
ស្តាប់ - ០៧:៣៥
រដ្ឋាភិបាលអាមេរិកគ្រោងនឹងដំឡើងពន្ធ ២០ភាគរយលើផលិតផលនាំចូលមកពីប្រទេសម៉ិចស៊ិក ដើម្បីយកលុយទៅសង់ជញ្ជាំងនៅព្រំដែនអាមេរិក និងម៉ិចស៊ិក។ ប្រធានាធិបតីម៉ិចស៊ិក លោកEnrique Pena Nieto ដែលបានថ្កោលទោសជញ្ជាំងរបស់លោកដូណាល់ ត្រាំ បានប្រកាសលុបចោលជំនួប ជាមួយលោកដូណាល់ ត្រាំ ដែលគ្រោងធ្វើនៅទីក្រុងវ៉ាស៊ីនតោន នៅថ្ងៃទី ៣១មករាខាងមុខ។
រដ្ឋបាលអាមេរិកចង់ដំឡើងពន្ធលើទំនិញនាំចូលពីម៉ិចស៊ិក ដល់ទៅ ២០ភាគរយ គឺដើម្បីយកលុយទាំងអស់ហ្នឹងទៅសាងសង់ជញ្ជាំងដែលលោកដូណាល់ ត្រាំបានចេញក្រឹត្យបញ្ជាឲ្យសាងសង់នៅព្រំដែនម៉ិចស៊ិក និងអាមេរិក។ នៅថ្ងៃព្រហស្បតិ៍ នៅក្នុងសន្និសីទកាសែត ក្នុងយន្តហោះប្រធានាធិបតី លោកSean Spicer អ្នកនាំពាក្យរបស់ប្រធានាធិបតីអាមេរិកបាននិយាយថា គ្រាន់តែដំឡើងពន្ធលើទំនិញនាំចូលពីម៉ិចស៊ិក រដ្ឋាភិបាលអាមេរិកនឹងចំណេញបានប្រាក់ប្រមាណ ១០ពាន់លានដុល្លារ ក្នុងមួយឆ្នាំ។ គឺយកលុយបានយ៉ាងស្រួល ពីម៉ិចស៊ិក ដើម្បីទៅសង់ជញ្ជាំង។
ការសង់ជញ្ជាំងនៅព្រំដែនម៉ិចស៊ិក និងអាមេរិក គឺជានយោបាយចំបងរបស់លោកដូណាល់ ត្រាំ ដែល ធ្លាប់បានសន្យាដែរថា នឹងធ្វើឲ្យម៉ិចស៊ិកចេញលុយសង់ជញ្ជាំង។ រដ្ឋាភិបាលម៉ិចស៊ិកដែលថ្កោលទោស ក្រឹត្យបញ្ជាឲ្យសង់ជញ្ជាំង បានថ្កោលទោសជាថ្មី នយោបាយចង់ដំឡើងពន្ធ លើទំនិញម៉ិចស៊ិក នាំចូលទៅអាមេរិក។
នៅថ្ងៃម្សិលមិញ ប្រមុខការបរទេសម៉ិចស៊ិក ដែលកំពុងស្ថិតនៅទីក្រុងវ៉ាស៊ីនតោន ដើម្បីរៀបចំដំណើរទស្សនកិច្ចរបស់លោកប្រធានាធិបតីម៉ិចស៊ិក នៅសប្តាហ៍ក្រោយ បាននិយាយហើយថា ពន្ធលើផលិតផលម៉ិចស៊ិកនាំចូលទៅអាមេរិក មិនមែនជាមធ្យោបាយដើម្បី ចាប់ម៉ិចស៊ិកឲ្យចេញលុយនោះទេ ប៉ុន្តែ ផ្ទុយទៅវិញ វានឹងធ្វើឲ្យទំនិញម៉ិចស៊ិកឡើងថ្លៃ ក្នុងទីផ្សារអាមេរិក។ ប្រជាជនអាមេរិកនឹងចំណាយលុយច្រើនជាងមុនដើម្បីទិញ ផ្លែប័រ ទូរទស្សន៍ ឬម៉ាស៊ីនបោកខោអាវជាដើម ដែលនាំចូលមកពីម៉ិចស៊ិក ដែលនិងដែលធ្លាប់តែលក់ក្នុងតម្លៃថោក។
អ្នករងគ្រោះ ប៉ះពាល់ ដោយនយោបាយរបស់លោកដូណាល់ ត្រាំ គឺប្រជាជនដែលរស់នៅអាមេរិកទៅវិញទេ ដែលត្រូវចំណាយលុយច្រើនជាងមុនដើម្បីទិញទំនិញ។ គឺប្រជាជនអាមេរិកាំងដែលត្រូវបង់ថ្លៃសង់ជញ្ជាំង ដែលនេះ ខុសពីការសន្យារបស់លោកដូណាល់ ត្រាំដែលធ្លាប់អះអាងថា គេនឹងមិនយកលុយរបស់ប្រជាជនអាមេរិក ទៅសង់ជញ្ជាំងនោះ។
ការដំឡើងពន្ធលើទំនិញនាំចូលពីម៉ិចស៊ិកមិនខុសអីពីការប្រកាសធ្វើសង្រ្គាមពាណិជ្ជកម្មនោះទេ ដែលនឹងធ្វើឲ្យទាំងអាមេរិក និងម៉ិចស៊ិក ខាតបង់ដូចគ្នា។ ម៉ិចស៊ិកអាចធ្វើដូចអាមេរិក ដោយដំឡើងពន្ធលើទំនិញនាំចូលពីអាមេរិក ចូលម៉ិចស៊ិក។ ម៉ិចស៊ិកជាទីផ្សារធំទីបី របស់ផលិតផលអាមេរិក ដែលមានតម្លៃ២១១ពាន់លានដុល្លារ។
ដើម្បីរំងាប់មតិរិះគន់ និងការខឹងសម្បារពីខាងភាគីម៉ិចស៊ិក ប្រធានក្រុមការងារនៅសេតវិមាន បានអះអាងថា ការដំឡើងពន្ធលើទំនិញនាំចូលពីម៉ិចស៊ិក គ្រាន់តែជាជម្រើសមួយ ប៉ុណ្ណោះ ក្នុងចំណោមជម្រើសច្រើនដទៃទៀត ដែលរដ្ឋបាលលោកត្រាំ កំពុងគិតគូរ ដើម្បីធ្វើយ៉ាងណា រកលុយទៅសង់ជញ្ជាំង។
យ៉ាងណាក៏ដោយ បើសិនប្រទេសទាំងពីរប្រកាសធ្វើសង្រ្គាមពាណិជ្ជកម្មនឹងគ្នាមែន ទីបញ្ចប់ គឺម៉ិចស៊ិកដែលនឹងខាតបង់ធ្ងន់ធ្ងរ ព្រោះថា ៨០ភាគរយនៃផលិតផលនាំចេញរបស់ម៉ិចស៊ិក ប្រមាណ ៣០០ពាន់លានដុល្លារ ត្រូវនាំចូលទៅក្នុងទីផ្សារអាមេរិក។ កិច្ចព្រមព្រៀងដោះដូរសេរី ជាមួយកាណាដា និងអាមេរិក ម៉ិចស៊ិក បានធ្វើឲ្យម៉ិចស៊ិក ដែលមានតម្លៃពលកម្មថោក ស្រូបបានការវិនិយោគយ៉ាងច្រើនពីក្រុមហ៊ុនអាមេរិក។ ត្រង់ចំណុចនេះ លោកដូណាល់ ត្រាំ បានចុះរួចហើយ ក្រឹត្យដើម្បីចរចាឡើងវិញ ជាមួយកាណាដា និងម៉ិចស៊ិក ដែលលោកចោទថា បានលួចការងារ ពីប្រជាជនអាមេរិកាំង។ លោកដូណាល់ ត្រាំ ដែលចង់ឲ្យក្រុមហ៊ុនអាមេរិក រើចេញពីម៉ិចស៊ិក មកតាំងទីនៅទឹកដីអាមេរិក បានព្រមានថា នឹងដកអាមេរិកចេញពីកិច្ចព្រមព្រៀងជាមួយម៉ិចស៊ិក និងកាណាដា បើសិនការចរចាជាថ្មី មិនធ្វើឲ្យអាមេរិកចំណេញ។
ជញ្ជាំងដ៏ចម្រូងចម្រាស
នៅថ្ងៃព្រហស្បតិ៍ ម្សិលមិញ លោកប្រធានាធិបតីម៉ិចស៊ិកបានប្រកាសលុបចោលទៅវិញ ជំនួបរបស់លោកជាមួយលោកដូណាល់ ត្រាំ ដែលគេគ្រោងធ្វើនៅថ្ងៃអង្គារទី ៣១មករាខាងមុខ។ លោកEnrique Pena Nieto បានប្រកាសលុបចោលដំណើររបស់លោកទៅ ទីក្រុងវ៉ាស៊ីនតោន បន្ទាប់ពី លោកដូណាល់ ត្រាំបានសរសេរនៅក្នុងសារTwitter ឆ្លើយបកទៅ ប្រធានាធិបតីម៉ិចស៊ិក ដែលថ្កោលទោស ក្រឹត្យសង់ជញ្ជាំង និងថា ម៉ិចស៊ិកមិនចេញលុយសង់ជញ្ជាំង។
នៅក្នុងសារTwitter លោកត្រាំបានសរសេរថា បើសិនម៉ិចស៊ិកមិនចេញលុយសង់ជញ្ជាំងទេ ការជួបពិភាក្សា នៅថ្ងៃអង្គារ នៅទីក្រុងវ៉ាស៊ីនតោន ក៏នឹងគ្មានប្រយោជន៍អ្វីដែរ។ លោកដូណាល់ត្រាំ ធ្លាប់បានចោទម៉ិចស៊ិកថា ជាដើមហេតុធ្វើឲ្យប្រជាជនអាមេរិកាំងបាត់បង់ការងារ ហើយនិងការដួលរលំនៃឧស្សាហកម្មផលិតរថយន្ត នៅអាមេរិក។
នៅម៉ិចស៊ិក លោកប្រធានាធិបតីម៉ិចស៊ិកបានទទួលការគាំទ្រ ច្រើនពី អ្នកនយោបាយ ព្រោះថា បើលោកទៅវ៉ាស៊ីនតោន ទាំងលោកដូណាល់ ត្រាំ ទាមទារឲ្យចេញលុយសង់ជញ្ជាំង ដែលម៉ិចស៊ិកចាត់ទុកជាជញ្ជាំងដ៏អាម៉ាស់ នោះ គឺមានន័យស្មើនឹងលោកEnrique Pena Nieto ទៅឲ្យលោកដូណាល់ ត្រាំមើលងាយប្រមាថជាថ្មីម្តងទៀត។
លោក Enrique Pena Nietoធ្លាប់បានរងការរិះគន់ម្តងហើយ នៅពេលលោកបានទទួលជួបលោកដូណាល់ ត្រាំ កាលនៅជាបេក្ខជនប្រធានាធិបតី។ កាលណោះ លោកប្រធានាធិបតីម៉ិចស៊ិកបានទទួលលោកដូណាល់ ត្រាំ បើទោះបីជាលោកដូណាល់ ត្រាំ នៅក្នុងពេលឃោសនាបោះឆ្នោត ធ្លាប់ បានប្រមាថថា រាល់ជនជាតិម៉ិចស៊ិកជាឧក្រិដ្ឋជន និងជនចាប់រំលោភក៏ដោយ។ លើកនេះ ដោយមិនទៅជួបលោកដូណាល់ ត្រាំ ប្រធានាធិបតីម៉ិចស៊ិកចង់ស្តារកិត្តិយសរបស់ខ្លួនវិញ គឺមិនទៅឲ្យលោកដូណាល់ ត្រាំមើលងាយនោះទេ។
ចំណែកលោកដូណាល់ ត្រាំ នៅក្រោយលោក Enrique Pena Nieto ប្រកាសលុបចោលជំនួបជាមួយលោក បាននិយាយថា ប្រធានាធិបតីម៉ិចស៊ិក គួរតែមកនិយាយជាមួយលោក ដោយមើលទៅលើ ឱនភាពពាណិជ្ជកម្មតម្លៃ ៦០ពាន់លានដុល្លារ ដែលអាមេរិកមានជាមួយម៉ិចស៊ិក (ការនាំចេញរបស់អាមេរិក ទៅម៉ិចស៊ិក មានចំនួនតិចជាង ផលិតផលម៉ិចស៊ិកនាំចូលទៅអាមេរិក)។ លោកដូណាល់ ត្រាំ ដូណាល់ ត្រាំ ប្រធានាធិបតី ដែលគិតពិចារណាតាមបែបអ្នកធ្វើជំនួញ ជាជាងប្រើចិត្តសាស្រ្តការទូត កំពុងប្រើស្នៀតជំនួញដាក់គំនាបប្រទេសជិតខាងម៉ិចស៊ិក ដែលរស់ពឹងអាស្រ័យខ្លាំងលើការនាំចូលទៅទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ