នុយក្លេអ៊ែរអ៊ីរ៉ង់៖លោកTrump និងព្រះចៅ Salmane គាំទ្រការអនុវត្តន៍យ៉ាងតឹងរឹងបំផុតកិច្ចព្រមព្រៀងនុយក្លេអ៊ែរអ៊ីរ៉ង់
លោក Donald Trump ប្រធានាធិបតីអាមេរិកនិងព្រចៅ Salmane នៃរាជាណាចក្រអារ៉ាប៊ីសាអ៊ូឌីត បានប្រកាសទាមទារឲ្យមានការអនុវត្តយ៉ាងមធ្យ័តជាទីបំផុតនៅលើកិច្ចព្រមព្រៀងនុយក្លេអ៊ែរជាមួយអ៊ីរ៉ង់-នេះបើយោងតាមកិច្ចសន្ទនាមួយតាមទូស័ព្ទរវាងប្រមុខរដ្ឋទាំងពីរប្រទេសដែលផ្សព្វផ្សាយដោយសេតវិមានប្រធានាធិបតីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ខ្លឺមសារនៃកិច្ចសន្ទនាគ្នារវាងព្រះចៅ Arabie saoudite Salmane និងប្រធានាធិបតីអាមេរិក លោក Donald Trump នៅលើការអនុវត្តន៍កិច្ចព្រមព្រៀងនុយក្លេអ៊ែរអ៊ីរ៉ង់ឲ្យបានមធ្យ័តជាទីបំផុតនោះ ហាក់ដូចជាបង្ហាញប្រាប់ដែរថា លោក Donald Trump អាចមានជំហរវិវឌ្ឈន៍នៅលើបញ្ហានុយក្លេអ៊ែរអ៊ីរ៉ង់នេះ។ ពីព្រោះប្រធានាធិបតីថ្មីរបស់អាមេរិក រហូតមកទល់ពេលនេះ មានជំហរយ៉ាងរឹងរូសជាទីបំផុតក្នុងការប្រឆាំងទល់នឹងកិច្ចព្រមព្រៀងដ៏សំខាន់របស់អតីតប្រធានាធិបតីអាមេរិកលោក អូបាម៉ា។ កិច្ចព្រមព្រៀងនុយក្លេអ៊ែរអ៊ីរ៉ង់ដែលមានគោលដៅដើម្បីរារាំង មិនឲ្យអ៊ីរ៉ង់បំពាក់នូវគ្រាប់បែកបរមាណូ។
គួររំលឹកថានៅឱកាសយុទ្ធនាការឃោសនាបោះឆ្នោតប្រធានាធិបតីអាមេរិក លោក Trump បានធ្វើការទិះតៀនឥតឈប់ឈរកិច្ចព្រមព្រៀងនុយក្លេអ៊ែរអ៊ីរ៉ង់។ មិនតែប៉ុណ្ណោះ លោកថែមទាំងបានតែងតាំងថ្នាក់ដឹកនាំដ៏សំខាន់ៗនៅក្នុងជួររដ្ឋបាលរបស់លោកដែលសុទ្ធស៊ឺងជាបុគ្គលចេញមុខប្រឆាំងយ៉ាងចំហទល់នឹងអ៊ីរ៉ង់ ដូចយ៉ាងអនាគតរដ្ឋមន្ត្រីក្រសួងការបរទេសអាមរិកលោកRex Tillerson ជាដើមដែលចង់ឲ្យមានការសើរើពិនិត្យទាំងស្រុងឡើងវិញកិច្ចព្រមព្រៀងនុយក្លេអ៊ែរអ៊ីរ៉ង់នេះ។
នៅក្នុងកិច្ចសន្ទនាគ្នានេះដែរ លោក Donald Trump និងព្រះចៅ Arabie Saoudite ក៏បានទាមទារផងដែរនៅលើភាពចាំបាច់ក្នុងការវាយប្រឆាំងតបតវិញទល់នឹងសកម្មភាពបង្កអសន្តិសុខរបស់អ៊ីរង់នៅក្នុងតំបន់។ គួររំលឹកថា អ៊ីរ៉ង់ គឺជារដ្ឋមួយដែលទីក្រុងវ៉ាស៊ីនតោននិងទីក្រុង Ryad ស្អប់ជាទីបំផុត និង ក៏ជាប្រទេសប្រកួតប្រជែងមួយដ៏ធំរបស់រាជាណាចក្រArabie saoudite នៅក្នុងតំបន់ទៀតផង។
ប្រមុខរដ្ឋអាមេរិកនិង Arabie saoudite ថែមទាំងបានសន្យារួមគ្នានៅក្នុងការប្រយុទ្ធប្រឆាំងទល់នឹងការរីកសាយភាយនៃអំពើភេរវនិយមរបស់អង្គការរដ្ឋអ៊ីស្លាមជីហាតទៀតផង។
ម្យ៉ាងទៀត តាមការស្នើសុំរបស់ប្រធានាធិបតីអាមេរិក ថ្នាក់ដឹកនាំ Arabie saoudite និងអាមេរិក ក៏បានព្រមព្រៀងគ្នាដើម្បីបង្កើតនូវ”តំបន់សន្តិសុខ”នៅក្នុងប្រទេសយេម៉ែននិងនៅស៊ីរី ក៏ព្រមទាំងផ្តល់ការគាំទ្ររបស់ខ្លួននៅលើគំនិតផ្សេងៗទៀត ដើម្បីជួយដល់ជនភៀសខ្លួនដែលបានចាកចោលប្រទេសរបស់ខ្លួនដោយសារតែសង្គ្រាមនៅឆាបឆេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ