អត្រាការប្រាក់នៅសហរដ្ឋអាមេរិកនឹងស្ថិតនៅក្នុងកំរិតទាបដដែល។ នេះជាសេចក្តីសម្រេចចិត្តរបស់ រតនាគារជាតិអាមេរិកកាលពីសប្តាហ៍មុន។ ប្រឈមមុខនឹងសេដ្ឋកិច្ចពិភពលោកដ៏ស្រពិចស្រពិល ជាពិសេសកម្មវិធីនយោបាយផ្តល់សន្ទុះសេដ្ឋកិច្ចដ៏មិនច្បាស់លាស់របស់លោកប្រធានាធិបតី ដូណាល់ ត្រាំ រតនាគារជាតិអាមេរិកសុខចិត្តបន្តរក្សាអត្រាការប្រាក់នេះឲ្យនៅទាបដដែល។ ប៉ុន្តែ ស្ថាប័ននេះគ្រោងដំឡើងកំរិតអត្រាការប្រាក់សន្សឹមៗ ក្នុងរយៈពេលប៉ុន្មានខែខាងមុខនេះ ប្រសិនបើសន្ទុះជាក់ស្តែងនៃកំណើនសេដ្ឋកិច្ចរបស់អាមេរិកអំណោយផលល្អ។
បើយោងតាមសេចក្តីប្រកាសព័ត៌មានរបស់គណៈកម្មការរូបិយប័ណ្ណនៃរតនាគារជាតិអាមេរិក សព្វថ្ងៃនេះ អត្រាការប្រាក់អន្តរធនាគារ (មានន័យថាអត្រាប្រាក់កម្ចីរវាងធនាគារ) គឺស្ថិតក្នុងចន្លោះពី 0,៥០% ទៅ 0,៧៥%។ ដោយសារតែនយោបាយសេដ្ឋកិច្ចមិនទាន់ច្បាស់លាស់របស់រដ្ឋាភិបាលលោកប្រធានាធិបតី ដូណាល់ ត្រាំ គណៈកម្មការជំនាញនេះបានវាយតម្លៃថា រតនាគារជាតិអាមេរិកមិនហ៊ានប្រថុយប្រថានដំឡើងអត្រាការប្រាក់ឲ្យខ្ពស់ឡើយ។
សេចក្តីសម្រេចនេះត្រូវបានធ្វើឡើងជាឯកច្ឆន្ទរវាងសមាជិកទាំង ៧ នាក់របស់គណៈកម្មការ។ សេចក្តីប្រកាសព័ត៌មានក៏បានគូសលំអិតផងដែរថា ហានិភ័យរយៈពេលខ្លីសំរាប់សេដ្ឋកិច្ចអាមេរិកហាក់មិនគួរឲ្យព្រួយបារម្ភឡើយ។ សំរាប់រដ្ឋាភិបាលអាមេរិកថ្មីក្រោមការដឹកនាំរបស់លោក ដូណាល់ ត្រាំ ក៏ដូចជាសំរាប់ពលរដ្ឋអាមេរិក និងក្រុមហ៊ុនក្នុងស្រុកអាមេរិកនានា ព័ត៌មានរបស់រតនាគារជាតិនេះហាក់ធ្វើឲ្យគេធូរស្បើយចិត្តបន្តិច។ មុននេះបន្តិច ម្នាក់ៗមានក្តីព្រួយបារម្ភខ្លាចអត្រាការប្រាក់ឡើងខ្ពស់ដែលវាអាចបង្កឧបសគ្គដល់សមត្ថភាពចំណាយប្រចាំថ្ងៃសំរាប់គ្រួសារពលរដ្ឋអាមេរិកទូទៅដែលកំពុងជាប់បំណុលធនាគារ។
សូមបញ្ជាក់ថា កាលពីថ្ងៃទី១៤ ខែធ្នូ ឆ្នាំ២០១៦ កន្លងទៅនេះ រតនាគារជាតិអាមេរិកបានដំឡើងអត្រាការប្រាក់ចំនួន 0,២៥% ដែលធ្វើឲ្យអត្រាការប្រាក់គោលបច្ចុប្បន្នស្ថិតក្នុងកំរិត 0,៧៥%។ ការតំឡើងនេះ គឺដោយយោងលើកំណើនសេដ្ឋកិច្ចអាមេរិកក្រោយពីវិបត្តិហិរញ្ញវត្ថុឆ្នាំ២០០៨។ គួររំលឹកជូនថា ក្នុងកំឡុងឆ្នាំ២០០៨ ដែលជាឆ្នាំនៃវិបត្តិសេដ្ឋកិច្ចសកល រតនាគារជាតិអាមេរិកបានទម្លាក់អត្រាការប្រាក់គោលជាបន្តបន្ទាប់ពីកំរិត៣,៥០% រហូតមកត្រឹមតែ 0,២៥% ប៉ុណ្ណោះ។ ការទំលាក់ដ៏គំហុកបែបនេះ គឺក្នុងន័យសម្របខ្លួននឹងស្ថានភាពសេដ្ឋកិច្ចជាក់ស្តែង ជាពិសេស គឺជួយសង្គ្រោះពលរដ្ឋអាមេរិក និងសហគ្រាសក្នុងស្រុកអាមេរិកណាដែលជាប់បំណុលធនាគារ ដើម្បីអាចឲ្យពួកគេអាចមានសមត្ថភាពបង់ប្រាក់រំលួសប្រចាំខែ។
ការរក្សាកំរិតអត្រាការប្រាក់គោលឲ្យនៅដដែលបែបនេះក៏ជាសញ្ញាល្អផងដែរ។ នេះជាសញ្ញាវិជ្ជមានមួយបន្ថែមទៀត ខណៈពេលដែលចំនួនអ្នកគ្មានការងារធ្វើក្នុងស្រុកកំពុងធ្លាក់ចុះ។ ម៉្យាង កំណើនសេដ្ឋកិច្ចអាមេរិកក៏កំពុងតែរើបឡើងគួរសមផងដែរ។ ហើយ កំរិតអតិផរណាក៏ពុំសូវកើនឡើងខ្ពស់ឡើយដោយស្ថិតក្នុងកំរិតតែ ១,៦% តែប៉ុណ្ណោះ។ ដោយយោងលើកត្តាទាំងអស់នេះ រតនាគារជាតិអាមេរិកទំនងជាអាចដំឡើងអត្រាការប្រាក់គោលក្នុងរយៈពេលប៉ុន្មានខែខាងមុខនេះ។ បើតាមការវិភាគ វាទំនងជាអាចដំឡើងនាខែមិនាខាងមុខនេះ។
ធនាគារកណ្តាលអាមេរិកក៏ធ្លាប់បានប្រកាសកាលពីខែធ្នូកន្លងទៅនេះផងដែរថា ក្នុងកំឡុងឆ្នាំ២០១៧នេះ ស្ថាប័នខ្លួនគ្រោងដំឡើងអត្រាការប្រាក់នេះជាបីតំណាក់កាល។
គោលដៅ គឺចង់ឲ្យអត្រានេះឡើងដល់កំរិត ១,៤%។ ប៉ុន្តែ នេះគ្រាន់តែជាការគ្រោងទុកតែប៉ុណ្ណោះ ព្រោះរតនាគារជាតិអាមេរិកខ្លាចការដំឡើងអត្រាការប្រាក់រហ័សពេកអាចបង្កឲ្យកំរិតអតិផរណាឡើងខ្ពស់ផងដែរ។ ហើយប្រសិនបើអតិផរណាត្រូវឡើងខ្ពស់ មានន័យថាកំរិតប្រាក់ខែបុគ្គលិកកម្មករអាមេរិកក្នុងស្រុកក៏ត្រូវឡើងទៅតាមនោះផងដែរ។ ដូចនេះ ការតំឡើងគំហុកភ្លាមៗអាចគំរាមកំហែងដល់ទីផ្សារការងារដែលកំពុងតែតូចចង្អៀត និងផុយស្រួយស្រាប់ផង។ តាមពិតទៅ មុននឹងសំរេចចិត្តដំឡើងអត្រាការប្រាក់ជាយថាហេតុណាមួយ រតនាគារជាតិអាមេរិកត្រូវការពឹងផែ្អកលើកត្តាពីរ។
ចំណុចទីមួយ គឺរងចាំរបាយការណ៍របស់ក្រសួងការងារអាមេរិកស្តីពីស្ថានភាពចំនួនអ្នកគ្មានការងារធ្វើ។ គេត្រូវការរបាយការណ៍នេះយ៉ាងហោចណាស់ក៏ចំនួន ២ ដើម្បីអាចវិភាគអំពីស្ថានភាពជាក់ស្តែងនៃលំនឹងទីផ្សារការងារក្នុងស្រុក។ ចំណុចទីពីរ គឺគេត្រូវរង់ចាំមើលទំហំថវិការជាតិអាមេរិក និងដំណើរការក្នុងការអនុម័តថវិការនេះពីសភា។ កន្លងមក លោកស្រី Janet Yallen ប្រធានរតនាគារជាតិអាមេរិកក៏ធ្លាប់បានប្រកាសជាញឹកញយផងដែរថា ស្ថាប័នរបស់លោកស្រីកំពុងតាមដានដោយប្រយ័ត្នប្រយែងបំផុតចំពោះវិធានការណ៍ផ្តល់សន្ទុះសេដ្ឋកិច្ចរបស់លោកប្រធានាធិបតី ដូណាល់ ត្រាំ។
វិធានការណ៍ទាំងនោះមានដូចជាការបញ្ចុះពន្ធប្រាក់ខែបុគ្គលិកកម្មករ និងសហគ្រាសក្នុងស្រុក និងការវិនិយោគលើហេដ្ឋារចនាសម្ព័ន្ធ។ វិធានការណ៍ទាំងពីរនេះអាចបង្កឲ្យអតិផរណាឡើងខ្ពស់។ លោកស្រី Janet Yalle នឹងផ្តល់ព័ត៌មានលំអិតបន្ថែមទៀតនៅថ្ងៃទី១៤ កុម្ភៈខាងមុខនេះនៅចំពោះមុខសមាជិកសភា Congrès៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ