លោកដូណាល់ត្រាំ រងការរិះគន់ពីចៅក្រមដែលលោកជ្រើសរើសសម្រាប់តុលាការកំពូល
ប្រធានាធិបតីអាមេរិក លោកដូណាល់ ត្រាំ នៅព្រឹកថ្ងៃព្រហស្បតិ៍ ទី ៩កុម្ភៈបានចោទប្រកាន់សមាជិកព្រឹទ្ធសភា មកពីគណបក្សប្រជាធិបតេយ្យ ថា បានកែក្រឡាស់សំដីរបស់ចៅក្រម Niel Gorsuch។ លោកNiel Gorsuchដែលលោកដូណាល់ ត្រាំ បានជ្រើសរើសឲ្យធ្វើជាចៅក្រមតុលាការកំពូលបាននិយាយប្រាប់សមាជិកព្រឹទ្ធសភាថា ការរិះគន់កន្លងមករបស់លោកដូណាល់ ត្រាំ គឺធ្វើឲ្យគេបាក់ទឹកចិត្តខ្លាំងណាស់។
ចុះផ្សាយនៅថ្ងៃ៖
កាំបិតចិតដងឯង។ លោកដូណាល់ ត្រាំមិនចង់លឺពាក្យនេះទេ។ គ្រាន់តែព្រះអាទិត្យរះភ្លាម ប្រធានាធិបតីអាមេរិកាំង ចាប់ភ្លែត ទូរស័ព្ទ សរសេរសារTwitterវាយបកទៅសមាជិកព្រឹទ្ធសភា លោកRichard Blumenthal ដែលកាលពីថ្ងៃពុធបាននិយាយប្រាប់អ្នកកាសែតថា នៅពេលជួបសន្ទនាជាមួយលោក ចៅក្រមNiel Gorsuch បានប្រាប់លោកថា សំដីរិះគន់របស់ប្រធានាធិបតីដូណាល់ ត្រាំ ទៅលើចៅក្រមអាមេរិកាំងកន្លងមក គឺជាសំដីធ្វើឲ្យគេបាក់ទឹកចិត្តខ្លាំងណាស់។
ចៅក្រមនៅតុលាការឧទ្ធរណ៍ ក្នុងរដ្ឋកូឡូរ៉ាដូ លោក Niel Gorsuchទើបត្រូវបានលោកដូណាល់ ត្រាំ ជ្រើសរើស កាលពីថ្ងៃទី ៣១មករា ឲ្យធ្វើជាចៅក្រមតុលាការកំពូល ដែលជាស្ថាប័នមានអំណាចលើសគេ នៅអាមេរិក។ ជំនួបនៅថ្ងៃពុធរវាងលោក Niel Gorsuchជាមួយសមាជិកព្រឹទ្ធសភា Richard Blumenthal ធ្វើឡើងនៅក្នុងក្របខ័ណ្ឌនៃយុទ្ធនាការបញ្ចុះបញ្ចូលសមាជិកព្រឹទ្ធសភា អាមេរិកដែលមាននាទីបោះឆ្នោតទទួលយកបេក្ខជនចៅក្រម ដែលស្នើឡើងដោយប្រធានាធិបតី។
នៅថ្ងៃពុធ អ្នកនាំពាក្យរបស់ចៅក្រម Niel Gorsuch បានបញ្ជាក់ប្រាប់ទៅទីភ្នាក់ងារព័ត៌មានបារាំងAFP ថា លោក Niel Gorsuchពិតជាបាននិយាយយ៉ាងដូច្នេះមែន ទៅសមាជិកព្រឹទ្ធសភា។ ប៉ុន្តែ នៅក្នុងសារTwitter របស់ខ្លួន លោកប្រធានាធិបតីដូណាល់ ត្រាំ បានសរសេរថា សមាជិកព្រឹទ្ធសភា បានពាក្យក្រឡាស់សំដី របស់លោក Niel Gorsuch ចៅក្រមដែលលោកទើបជ្រើសរើសសម្រាប់តំណែងចៅក្រមនៅតុលាការកំពូល។
ប្រធានាធិបតីអាមេរិកបានផ្តើមសង្រ្គាមរិះគន់ ដំបូង ចៅក្រមអាមេរិក នៅរដ្ឋសៀអាថល Seattle ដែលបានសម្រេចផ្អាកព្យួរ ការអនុវត្តក្រឹត្យអន្តោប្រវេសន៍របស់ប្រធានាធិបតី ដែលបានបិទទ្វារ ហាម មិនឲ្យប្រជាជនមកពីប្រទេសអ៊ីស្លាមចំនួន ៧ ចូលក្នុងទឹកដីអាមេរិក។ លោកដូណាល់ ត្រាំ ធ្លាប់បានរិះគន់ចៅក្រមនៅសៀអាថល ថា ជាចៅក្រមក្លែងក្លាយ។ នៅថ្ងៃពុធម្សិលមិញ ក្រៅតែពីបរិហារថា តុលាការអាមេរិកាំងមានលក្ខណៈនយោបាយ លោកដូណាល់ ត្រាំនៅចោទប្រកាន់ រាល់ចៅក្រមដែលប្រឆាំងនឹងក្រឹត្យអន្តោប្រវេសន៍ របស់លោក ថា ជាអ្នកធ្វើឲ្យសន្តិសុខអាមេរិកត្រូវរងគ្រោះថ្នាក់។
ការប្រឈមមុខដាក់គ្នារវាងចៅក្រម ហើយនិងលោកប្រធានាធិបតីដូណាល់ ត្រាំ កាន់តែរីករាលដាល ពីមួយថ្ងៃ ទៅមួយថ្ងៃ។ បន្ទាប់ពីសវនាការលើក្រឹត្យអន្តោប្រវេសន៍ ដ៏ចម្រូងចម្រាសនៅរដ្ឋមួយចំនួន ដូចជានៅវ៉ាស៊ីនតោនជាដើម នៅចុងសប្តាហ៍នេះទៀត ចៅក្រមនៅសាន់ហ្វា្រន់ស៊ីស្កូនឹងសម្រេចថា តើត្រូវផ្អាកព្យួរក្រឹត្យអន្តោប្រវេសន៍របស់លោកដូណាល់ ត្រាំ ដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ