នាយករដ្ឋមន្ត្រីកាណាដាជួបប្រធានាធិបតីអាមេរិក ក្នុងទស្សនៈវិស័យផ្ទុយគ្នា
ចុះផ្សាយនៅថ្ងៃ៖
ស្តាប់ - ០៥:៣៩
លោកនាយករដ្ឋមន្ត្រីកាណាដា ជូស្តាំង ទ្រូដូ Justin Trudeau ត្រូវផ្តើមបំពេញទស្សនកិច្ចផ្លូវការ នៅសហរដ្ឋអាមេរិក ក្នុងថ្ងៃចន្ទទី ១៣ កុម្ភៈនេះ។ បន្ទាប់ពីលោកស្រីនាយករដ្ឋមន្ត្រីអង់គ្លេស Teresa May និងលោកនាយករដ្ឋមន្ត្រីជប៉ុន ស្ហ៊ីនហ្សូ អាបេ លោក ទ្រូដូជាប្រមុខដឹកនាំរដ្ឋាភិបាលបរទេសទីបី ដែលលោកដូណាល់ ត្រាំ ត្រូវទទួលស្វាគមន៍ នៅសេតវិមាន។ ប៉ុន្តែជំនួបនេះ បង្កប់ទៅដោយវិញ្ញាសាដ៏លំបាកៗ ព្រោះប្រមុខដឹកនាំប្រទេសជិតខាងទាំងពីរ មានទស្សនៈវិស័យសុខគ្នាស្រលះពេក។
ក្រោយពីបានជួបគ្នាតាមទូរស័ព្ទម្តង ក្រោយពិធីឡើងចូលកាន់តំណែងប្រធានាធិបតីភ្លាម នៅថ្ងៃចន្ទនេះ លោកនាយករដ្ឋមន្ត្រីកាណាដាត្រូវជួប ដោយផ្ទាល់ ជាមួយ លោក ដូណាល់ ត្រាំ នៅសេតវិមាន។ ប៉ុន្តែ ជំនួបនេះមានបង្កប់ទៅដោយគំនិតប្រឆាំងគ្នា។
ទស្សនៈផ្ទុយគ្នារវាងលោក ត្រាំ និង ទ្រូដូ
លោកដូណាល់ ត្រាំ និងលោក ជូស្តាំង ទ្រូដូ Justin Trudeau គ្មានទស្សនៈវិស័យចំពោះពិភពលោកដូចគ្នាទេ ! ប្រវត្តិនយោបាយ និងស្ទីល ខុសគ្នា ៖ លោក ទ្រូដូមាន វ័យក៏ក្មេងជាងលោកត្រាំច្រើន ប្អូនដល់ទៅ២៥ឆ្នាំ ហើយទស្សនៈនយោបាយ បែងចែកគ្នាកាន់តែឆ្ងាយដាច់ពីលោកត្រាំទៅទៀត។ នៅពេលឡើងកាន់តំណែងភ្លាម លោក ទ្រូដូ បានសន្យាដឹកនាំប្រទេស ឆ្ពោះទៅរកអនាគត ប្រកបដោយសុទិដ្ឋិនិយម និងលើកតម្កើងរូបភាពកាណាដា លើឆាកអន្តរជាតិ ព្រមទាំងជាអ្នកសេរីនិយមខ្លាំង ការពារនយោបាយផ្តោះប្តូរពាណិជ្ជកម្មសេរី ជាពិសេសជាមួយប្រទេសជិតខាង។
ឯចំណែកប្រធានាធិបតីអាមេរិក ដូណាល់ ត្រាំវិញ តាំងពីជាប់ឆ្នោតនៅថ្ងៃទី ៨ វិច្ឆិកាមក គេឃើញមានតែការបិទផ្លាកគំរាមកំហែង គ្រវីទង់ក្នុងទិសស្លោក "ដំបូងបង្អស់គឺដើម្បីអាមេរិក” ហើយបានបង្ហាញខ្លួនយ៉ាងចំហ ជាអ្នកការពារតែប្រយោជន៍ជាតិឯងខ្លាំងបំផុត។ ដោយសារតែគំនិតគិតតែពីផលប្រយោជន៍ខ្លួនឯងនេះ លោក ដូណាល់ ត្រាំ ថែមទាំងបានសើសុំសើរើ កិច្ចព្រមព្រៀងផ្តោះប្តូរពាណិជ្ជកម្មសេរីចំណាស់ ២៣ឆ្នាំ ទៀតផង។
ហេតុដូច្នេះហើយបានជាជំនួបរវាងមេដឹកនាំទាំងពីរ នៅថ្ងៃនេះ ពិតជាមានការលំបាកខ្លាំង។ តែនាយករដ្ឋមន្ត្រីកាដាណា សន្យាថានឹងជួបនិយាយជាមួយលោកត្រាំ ឱ្យបានច្បាស់លាស់ តែក្នុងអត្ថន័យគោរពគ្នា។
តើកិច្ចព្រមព្រៀងផ្តោះប្តូរពាណិជ្ជកម្មអាមេរិកខាងជើងនោះជាអ្វី ?
កិច្ចព្រមព្រៀងផ្តោះប្តូរពាណិជ្ជកម្មសេរីអាមេរិកខាងជើង ជាកិច្ចព្រមព្រៀងបីប្រទេស អាមេរិក កាណាដា និងម៉ិចស៊ិក ចុះហត្ថលេខា នៅឆ្នាំ១៩៩២ និងចូលជាធរមាន នៅឆ្នាំ១៩៩៤។ នៅក្នុងឆ្នាំ២០១៥ ដោយសារកិច្ចព្រមព្រៀងបើកចំហចរាចរណ៍នាំចេញនាំចូលទំនិញ និង ចរាចរណ៍បុគ្គល លុបពន្ធដារ ... មហាយក្សនៅអាមេរិកខាងជើង កាណាដា និងអាមេរិក បានផ្តោះប្តូរពាណិជ្ជកម្មគ្នា ក្នុងទំហំ ៨៨៦ពាន់លានដុល្លារកាដាណា បើគិតជាសាច់លុយ និង៦៣៦ពាន់លានអឺរ៉ូ បើគិតពីតម្លៃសេវាកម្ម។ មានន័យថាជាអាមេរិកនិងកាណាដាជាដៃគូពាណិជ្ជកម្មដ៏ធំជាងគេបង្អស់មួយនៅលើពិភពលោក។
កិច្ចព្រមព្រៀងនេះ បានផ្តល់ការងារដល់ពលរដ្ឋអាមេរិកប្រមាណ ៩លាននាក់ ក្នុងវិស័យពាណិជ្ជកម្មនិងវិនិយោគជាមួយកាណាដា។ ប៉ុន្តែនៅថ្ងៃទី ២០មករា ថ្ងៃស្បថចូលកាន់តំណែង លោក ដូណាល់ ត្រាំ បានប្រកាសថា ចង់សើរើចរចាកិច្ចព្រមព្រៀងនេះឡើងវិញ បើដៃគូមិនព្រមអាមេរិកនឹងដកខ្លួនចេញតែម្តង ព្រោះកិច្ចព្រមព្រៀងនេះ អាក្រក់សម្រាប់សហរដ្ឋអាមេរិក និងមិនយុត្តិធម៌សម្រាប់ពលរដ្ឋអាមេរិកទេ។
តាំងពីប៉ុន្មានថ្ងៃមកហើយ ដែលកាណាដាបានបញ្ជូនរដ្ឋមន្ត្រីពាក់ព័ន្ធមកជួបស្គាល់ និងស្ទាបស្ទង់សមភាគីអាមេរិក។ លោក ទ្រូដូ ក៏បានសន្យាថានឹងមកនិយាយឱ្យបានដឹងសខ្មៅ ជាមួយលោក ដូណាល់ ត្រាំ នៅថ្ងៃនេះ។
ប្រសិនបើមានការចរចាឡើងវិញមែន នោះអ្នកខាតបង់ច្រើនជាងគេ គឺជាពិតប្រាកដថាជាកាណដាហើយ ! ព្រោះថា ការនាំចេញរបស់កាណាដា ទៅអាមេរិក តំណាងឱ្យមួយភាគបីនៃនាំចេញសរុប ឯអាមេរិកនាំចូលមកកាណដាតែ១៨%ប៉ុណ្ណោះ។ ម្យ៉ាងទៀតទីតាំងភូមិសាស្ត្រកាណាដា មិនអំណោចផលទេ ក្នុងផ្នែកផ្តោះប្តូរពាណិជ្ជកម្មនេះ ! កាណាដាមានប្រទេសជាប់របងតែមួយគត់ គឺអាមេរិក។ ដូច្នេះបើកាណាដាចង់ស្វែងរកដៃគូផ្សេងក្នុងទ្វីប ត្រូវឆ្លងកាត់អាមេរិកទាំងអស់។
ប៉ុន្តែកាណាដានៅមានសង្ឃឹមមួយ ថាបើកិច្ចព្រមព្រៀងឆ្នាំ១៩៩៤នេះ ត្រូវធ្លាក់ទឹក ក៏កាណាដាអាចរំពឹងលើកិច្ចព្រមព្រៀងផ្តោះប្តូរពាណិជ្ជកម្មរវាងកាណាដា និងអាមេរិក ឆ្នាំ១៩៨៧ ដ៏ស៊ីចង្វាក់គ្នាពីរប្រទេសដែរ។ ហើយជាចុងក្រោយ កាណាដាមិនមែនជាទិសដៅវាយប្រហារខ្លាំងរបស់លោកត្រាំ ដូចម៉ិចស៊ិកឡើយ។
ថាមពលចងភ្ជាប់ លោកត្រាំ និង ទ្រូដូ
មានប្រធានបទបី ដែល លោក ដូណាល់ ត្រាំ និងលោក ជូស្តាំង ទ្រូដូ ត្រូវលើកមកជជែកនៅក្នុងជំនួបនេះ ៖ ការផ្តោះប្តូរពាណិជ្ជកម្ម អន្តោប្រវេសន៍ និង ថាមពល។ ទស្សនៈផ្ទុយគ្នាខ្លាំង លើសំណុំរឿងពាណិជ្ជកម្ម ឯបញ្ហាអន្តោប្រវេសន៍ ក៏មិនត្រូវគ្នាដែរ គ្រាន់តែ លោក ទ្រូដូ មិនធ្វើការរិះគន់ដោយចំៗ ត្រង់ៗប៉ុណ្ណោះ។ មួយថ្ងៃក្រោយការចេញក្រិត្យអន្តោប្រវេសន៍ អាមេរិកដ៏ចម្រូងចម្រាស លោកនាយករដ្ឋមន្ត្រីកាណាដាបានសរសេរទ្វីតថា កាណាដា នឹងទទួលជនអន្តោប្រវេសន៍រងទុក្ខបុកម្នេញពីសង្គ្រាម។ ការរស់ចម្រុះជាតិសាសន៍ ជាកម្លាំងរបស់កាណាដា។
ហើយមានប្រធានបទតែគត់ប៉ុណ្ណោះ ដែលមេដឹកនាំទាំងពីរមានទស្សនៈស្របគ្នា នោះគឺគម្រោងសំណង់បំពង់បង្ហូរប្រេង Keystone XL ដ៏ធំបំផុតជាមួយកាណាដា ដែលប្រធានាធិបតីអូបាម៉ា បានកប់មិនឱ្យសាងសង់នៅឆ្នាំ២០១៥ ដើម្បីអាកាសធាតុ។ តែគ្រាន់តែបានចូលកាន់តំណែងលោក ត្រាំ បានផ្តល់ជីវិតថ្មីដល់គម្រោងនេះ។ ដូច្នេះ ថ្វីបើមានវិស័យខ្លះត្រូវថប់ដង្ហើម ដោយការចរចាកិច្ចព្រមព្រៀងផ្តោះប្តូរពាណិជ្ជកម្មឡើងវិញ តែវិស័យថាមពលវិញ បានផ្តល់សន្ទុះថ្មី ព្រោះអាមេរិកត្រូវការប្រេងនិងឧស្ម័នដ៏សម្បូរបែបរបស់កាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ