តួកគីរំពឹងលើលោក ដូណាល់ ត្រាំ ដើម្បីបានខិតរកអាមេរិកវិញ
ចុះផ្សាយនៅថ្ងៃ៖
សហរដ្ឋអាមេរិកប្រកាសចង់ចាប់ផ្តើមជាថ្មី ជាមួយតួកគី។ ឯប្រមុខដឹកនាំតួកគីក៏សង្ឃឹមថានឹងអាចចូលកាន់តែជិតប្រធានាធិបតីអាមេរិកថ្មី ដូណាល់ ត្រាំ ដែរ ដោយសុខចិត្តធ្មេញភ្នែកធ្វើមិនឃើញមិនឮគំនិតខ្វែងគ្នាមួយចំនួនជាមួយលោកត្រាំផង។ ប៉ុន្តែដំណើរផ្លូវហាក់ដូចជានៅវែងឆ្ងាយ និងមានឧបសគ្គច្រើនណាស់។
អឺរ៉ុបភាគច្រើន បានអបអរជ័យជំនះរបស់លោក ដូណាល់ ត្រាំ ជាប្រធានាធិបតីអាមេរិក ដោយចុងមាត់ចុងក តែក្រុងអង់ការ៉ាវិញ រីករាយខ្លាំងណាស់។ ព្រោះថាទំនាក់ទំនងរវាងលោកប្រធានាធិបតីតួកគី អែរដូហ្កាន និងសេតវិមានសម័យលោកបារ៉ាក់ អូបាម៉ា បានធ្លាក់ចុះយ៉ាងខ្លាំង នារយៈពេលប៉ុន្មានខែចុងក្រោយនេះ ដោយហេតុតែសំណុំរឿងស៊ីរី និងការទារធ្វើបត្យាប័នប្រមុខសាសនាជាមេបក្សប្រឆាំងនិរទេសខ្លួននៅសហរដ្ឋអាមេរិក។
ឆ្លៀតពេលដែលមានវត្តមានជុំគ្នានៅសន្និសីទអន្តរជាតិស្តីអំពីសន្តិសុខ នៅក្រុងម៉ុយនិច នាយករដ្ឋមន្ត្រីតួកគី បានជួបជាមួយអនុប្រធានាធិបតីអាមេរិក ដើម្បីបានជជែកគ្នាភ្លាម អំពីសំណុំដ៏សំខាន់ទាំងពីរដែលជាគន្លឹះនៃចំណងទំនាក់ទំនងអាមេរិក-តួកគី។ សម្រាប់តួកគី ការដែលអាមេរិកមានរដ្ឋបាលថ្មី ដូចយ៉ាងរដ្ឋបាលលោកត្រាំនេះ គឺជាឱកាសដ៏ប្រពៃសម្រាប់បង្ហាញគំនិតផ្តួចផ្តើមដ៏ច្បាស់លាស់ផ្នែកនយោបាយការបរទេសរបស់ខ្លួនហើយ។
ក្រោយពីបានវាយតម្លៃឡើងវិញ អំពីទំនាក់ទំនងអាមេរិកជាមួយតួកគី ក្នុងនាមជាដៃគូពាណិជ្ជកម្ម យោធា និងកិច្ចសហប្រតិបត្តិការប្រយុទ្ធប្រឆាំងនឹងភេរវនិយមហើយ រដ្ឋាភិបាលអាមេរិកមុខជានឹងចាត់វិធានការដើម្បីធ្វើឱ្យទំនាក់ទំនងប្រទេសទាំងពីរបានប្រសើរឡើងជាមិនខាន។ នេះជាការរំពឹងទុករបស់តួកគី។
ជាក់ស្តែង ៤៨ម៉ោងក្រោយជំនួបតាមទូរស័ព្ទរវាងប្រធានាធិបតីអាមេរិក លោក ដូណាល់ ត្រាំ ជាមួយនឹងប្រធានាធិបតីតួកគី អ៊ែរដូហ្កានភ្លាម នាយកទីភ្នាក់ងារចារកិច្ចអាមេរិក សេអ៊ីអា បានធ្វើដំណើរទស្សនកិច្ចជាផ្លូវការនៅតួកគីភ្លាម ក្រោមការទទួលស្វាគមន៍យ៉ាងអំណរពីថ្នាក់ដឹកនាំតួកគី។
ការប្រឹងរកគ្រប់វិធីដើម្បីខិតចូលជិតរដ្ឋបាលអាមេរិកថ្មី គឺជាអាទិភាពចំបងរបស់រដ្ឋាភិបាលតួកគី នេះបើតាមអ្នកវិភាគស្និទ្ធរបបកាន់អំណាចតួកគី។ ថ្នាក់ដឹកនាំតួកគីសុទ្ធតែមើលឃើញ លោក ដូណាល់ ត្រាំ គឺជាអ្នកដែលអាចធ្វើឱ្យបំណងប្រាថ្នារបស់គេបានសម្រេច។ ការខិតចូលគ្នា គឺស្ថិតនៅលើលោកត្រាំ ? គឺដោយសារតែមូលហេតុនេះ បានជាគេសង្កេតឃើញថា តួកគី មិនដែលបានបញ្ចេញប្រតិកម្មរិះគន់លោកត្រាំទាល់តែសោះ ! សូម្បីតែសុន្ទរកថា នោះវាយប្រហារ និងប្រឆាំងទាំងស្រុងជំហរដែលតួកគីធ្លាប់ការពារពីមុន និងរហូតមកក៏ដោយ !
ជាទម្លាប់ លោកអ៊ែរដូហ្កាន តែងបកអាក្រាតបស្ចឹមលោក ថាស្អប់អ៊ីស្លាម ! ប៉ុន្តែនៅពេលលោកដូណាល់ ត្រាំ ចេញក្រិត្យហាមឃាត់មិនពលរដ្ឋ៧ប្រទេសភាគច្រើនជាអ្នកកាន់សាសនាអ៊ីស្លាម ចូលសហរដ្ឋអាមេរិក ស្រាប់លោក អ៊ែរដូហ្កានគ្មានចេញស្តីអ្វីមួយម៉ាត់ បន្ទោសឬរិះគន់លោកត្រាំសោះ។ មិនធ្វើអ្វីប៉ះពាល់ដល់លោកត្រាំ ក៏ព្រោះតែប្រមុខដឹកនាំតួកគី សង្ឃឹមថា អាចយកចិត្តសមភាគីអាមេរិកថ្មីបាន លើរាល់សំណុំរឿងដែលធ្លាប់បំពុលទំនាក់ទំនងអាមេរិក-តួកគី ក្នុងសម័យលោកអូបាម៉ា កាន់អំណាច។
ប៉ុន្តែ បើទោះបីភាគីទាំងពីរបានបង្ហាញឆន្ទៈល្អ ! អាមេរិកចង់ចាប់ផ្តើមជាថ្មីជាមួយតួកគី ក៏ដោយ ក៏អ្នកវិភាគសំលឹងឃើញថាទំនាក់ទំនងអាមេរិក-តួកគី ល្អមិនបានយូរទេ ! ប្រទេសទាំងពីរនេះ មានគំនិតមិនត្រូវគ្នាជាប្រពៃណីទៅហើយ។ ភាពល្អូកល្អើនពេលនេះ គ្រាន់តែជាតាកតិចមួយរយៈខ្លីប៉ុណ្ណោះ។
មានកត្តាពីរដែលជាអ្នកកំណត់ចំណងសម្ព័ន្ធមេត្រីអាមេរិក-តួកគី ៖ ទីមួយ គឺជំហររបស់រដ្ឋបាលលោកត្រាំ ចំពោះពួកគូដឌីស្ថាននៅភាគខាងជើងប្រទេសស៊ីរី ដែលលោកអូបាម៉ា បានផ្តល់ជំនួយដើម្បីប្រយុទ្ធប្រឆាំងនឹងពួកអង្គការរដ្ឋអ៊ីស្លាម។ ប៉ុន្តែសម្រាប់ក្រុងអង់ការ៉ា ពួកនេះ ជាអង្គការភេរវនិយមស្និទ្ធនឹងបក្សពលករគួដឌីស្ថាន PKK ដែលបានងើបបះបោរបង្ហូរឈាមនៅក្នុងប្រទេស តាំងពីឆ្នាំ១៩៨៤មក។ តួកគីបានស្នើទៅអាមេរិកបើកប្រតិបត្តិការរួមគ្នារំដោះក្រុងរ៉ាខា របស់ស៊ីរី ដោយគ្មានពួកគួដឌីស្ថាននេះទេ។
កត្តាទីពីរដែលអាចធ្វើទំនាក់ទំនងជាមួយអាមេរិក មានការវិវឌ្ឍន៍ គឺបញ្ហាប្រមុខសាសនា ហ្គូឡិន ដែលអង់ការ៉ាចោទថាជាមេដឹកនាំធ្វើរដ្ឋប្រហារមិនសម្រេចកាលពីខែកក្កដា ២០១៦។ អាមេរិកបដិសេធជារហូតសំណើរបស់តួកគីសុំធ្វើបត្យាប័នហ្គូឡិនដែលនិរទេសខ្លួនទៅ ជ្រកកោននៅ អាមេរិកតាំងពីឆ្នាំ១៩៩៩។ ជាធម្មតា ប្រធានាធិបតីអាមេរិកមិនអាចផ្តល់ចម្លើយវិជ្ជមានទេ ព្រោះជាការសម្រេចរបស់តុលាការ តែថ្នាក់ដឹកនាំតួកគី សង្ឃឹមថាលោក ត្រាំ អាចប្រើសម្ពាធលើរូបហ្គូឡិនបាន។ លោក ត្រាំ ក៏បានអះអាងប្រាប់លោក អែរដូហ្កាន រួចហើយថានឹងតាមសំណុំរឿងនេះឱ្យកៀកកិត។ នេះបើតាមសារព័ត៌មានតួកគីចេញផ្សាយកាលពីថ្ងៃសៅរ៍។ ប៉ុន្តែតើកៀកកិតប៉ុណ្ណា គ្មាននរណាអាចឆ្លើយបានឡើយ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ