ប្រធានាធិបតីអាមេរិកអាចនឹងផ្សព្វផ្សាយជាសាធារណៈក្រឹត្យថ្មីស្តីពីអន្តោប្រវេស្តន៍នៅថ្ងៃនេះ
ប្រធានាធិបតីអាមេរិកលោក Donald Trump អាចនឹងផ្សព្វផ្សាយជាសាធារណៈនៅថ្ងៃនេះ ក្រឹត្យថ្មីមួយស្តីពីអន្តោប្រវេស្តន៍ដើម្បីជំនួសក្រឹត្យទីមួយដែលតុលាការអាមរិកបានលើកព្យួរ។ ក្រឹត្យដែលចែងពីការហាមមិនឲ្យអាណិកជនមកពី៧ប្រទេសភាគច្រើនកាន់សាសនាអ៊ីស្លាម ចូលមកកាន់ទឹកដីអាមេរិកទេ។ក្រឹត្យនោះត្រូវបានតុលាការវិនិច្ឆ័យថាជាក្រឹត្យរើសអើងនិងធ្វើឲ្យខូចផលប្រយោជន៍របស់ប្រជាជននៅក្នុងរដ្ឋដែលដាក់ពាក្យប្តឹងទៅតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ដើម្បីច្រានចោលក្រឹត្យរបស់លោក ត្រាំ ក្រុមចៅក្រមនៅរដ្ឋ Californie បានពន្យល់ប្រាប់ថា រដ្ឋាភិបាលអាមេរិក ពុំបានផ្តល់ភ័ស្តុតាងបញ្ជាក់ពីការគំរាមកំហែងដែលខ្លួនបានចោទទៅលើពលរដ្ឋទាំង៧ប្រទេសដែលគេហាមមិនឲ្យចូលទឹកដីអាមេរិកទេ។ ក្រុមចៅក្រម ថែមទាំងចោទទៀតថា អត្ថបទនៃក្រឹត្យនោះ មានលក្ខណៈរើសអើងចំពោះប្រជាជនកាន់សាសនាអ៊ីស្លាមរស់នៅក្នុងបណ្តារដ្ឋដែលដាក់ពាក្យប្តឹង។
សេតវិមានប្រធានាធិបតីអាមេរិកវិញដែលនៅតែនិយាយដដែលៗពីបញ្ហា"សន្តិសុខជាតិជាធំនោះ ក៏គ្មានជម្រើសអ្វីក្រៅតែពីការអនុវត្តតាមសេចក្តីសម្រេចរបស់តុលាការនេះទេ។
ទន្ទឹមនេះ លោក Sean Spicer ដែលជាអ្នកនាំពាក្យរបស់សេតវិមាន បានបញ្ជាក់ប្រាប់ថា សេតវិមាន កំពុងរៀបចំក្រឹត្យថ្មីមួយទៀតស្របទៅតាមបំណងរបស់ខ្លួនដើម្បីឈានទៅដល់គោលដៅដែលលោក ត្រាំចង់បាន តែត្រូវធ្វើយ៉ាងណាគេចឲ្យផុតពីគំនាបផ្លូវច្បាប់និងតុលាការរហូតទាល់តែបានទទួលជ័យជំនះ។
លោក Sean Spicer នៅតែមានក្តីសង្ឃឹមជានិច្ចថា ជាផ្លូវការសេតវិមាននឹងបានឈ្នះនៅមុខតុលាការក្នុងការតទល់ជាមួយនឹងរដ្ឋវ៉ាស៊ីនតោន។ ទន្ទឹមនេះ សេតវិមានបានទទួលស្គាល់ដែរថា ការសរសរអត្ថបទជាថ្មីឡើងវិញទៅតាមបំណងចិត្តរបស់ខ្លួននោះគឹជាដំណោះស្រាយមួយដ៏រហ័ស។
ម្យ៉ាងទៀត ឯកសារដែលរៀបចំរួចនិងបញ្ជូនទៅដល់បណ្តាញសាព័ត៌មាន បានស្នើឲ្យពលរដ្ឋដែលធ្លាប់ចូលមកសហរដ្ឋអាមេរិកនិងអ្នកមានទិដ្ឋាការឬក៏មានបណ្ឌស្នាក់នៅក្នុងទឹកដីអាមេរិក អាចចូលមកក្នុងទឹកដីអាមេរិកបាន។ តែអត្ថបទនោះ ក៏ពុំបានបញ្ជាក់អ្វីដែរថាពលរដ្ឋដ៏ទៃផ្សេងទៀតអាចនឹងមានលទ្ធភាពក្នុងការដាក់ពាក្យសុំទិដ្ឋាការនេះទេ។
ក្រឹត្យថ្មីនេះ ត្រូវបានក្រសួងពាក់ព័ន្ធ អាន ពិនិត្យនិងវាយតំលៃជាថ្មីឡើងវិញ ដើម្បីចៀសវៀងការរាំងខ្ទប់ជាថ្មីម្តងទៀតនៅតុលាការ ពីព្រោះក្រុមមេធាវីនៅក្នុងរដ្ឋជាច្រើនបានសន្យាថានឹងបិទខ្ទប់ក្រឹត្យថ្មីរបស់លោក Donald Trump ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ