ទស្សនកិច្ចបង្កប់ដោយរឿងរស៊ើបរបស់រដ្ឋមន្រ្តីការបរទេស និងរដ្ឋមន្រ្តីក្រសួងសន្តិសុខជាតិអាមេរិកនៅម៉ិចស៊ិក
នៅថ្ងៃព្រហស្បតិ៍ ទី២៣ កុម្ភៈនេះ រដ្ឋមន្រ្តីការបរទេសអាមេរិកលោក Rex Tillerson និងរដ្ឋមន្រ្តីក្រសួងសន្តិសុខជាតិអាមេរិកលោក John Kelly ទៅបំពេញទស្សនកិច្ចនៅក្នុងប្រទេសម៉ិចស៊ិក។ ដំណើរទៅកាន់ប្រទេសម៉ិចស៊ិកក្បែរខាងរបស់លោក Tillerson និង Kelly ពេលនេះបានធ្វើឡើង មួយថ្ងៃបន្ទាប់ពីរដ្ឋបាលអាមេរិកបានផ្សព្វផ្សាយសេចក្តីណែនាំថ្មីសំដៅរឹតបន្តឹងលើអ្នកដែលគ្មានក្រដាសស្នាមស្របច្បាប់រស់ក្នុងទឹកដីអាមេរិកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
មានសំណុំរឿងជាច្រើនដែលរដ្ឋមន្រ្តីអាមេរិកទាំងពីររូប គឺលោក Rex Tillerson និងលោក John Kelly ត្រូវលើកយកទៅជជែកជាមួយភាគីម៉ិចស៊ិក។ តែប្រធានរឿងដែលកំពុងរសើបខ្លាំង និងដែលកំពុងបង្កឲ្យមានសង្រ្គាមពាក្យសម្តីរវាងអាមេរិក និងម៉ិចស៊ិកពេលនេះមានពីរ ទី១ គឺគម្រោងរបស់លោកប្រធានាធិបតីអាមេរិកដូណាល់ ត្រាំចង់សាងសង់ជញ្ជាំងនៅតាមបណ្តោយព្រំដែនរវាងប្រទេសជិតខាងទាំងពីរក្នុងគោលដៅទប់ស្កាត់លំហូរជនអន្តោប្រវេសន៍ខុសច្បាប់ចូលក្នុងទឹកដីអាមេរិក។
តាមលោកដូណាល់ ត្រាំ ម៉ិចស៊ិកជាអ្នកចំណាយលុយលើការសាងសង់ជញ្ជាំងនោះ ហើយបើម៉ិចស៊ិកបដិសេធ អាមេរិកនឹងដកយកលុយពីពន្ធនាំចូល។ ចំណែកប្រធានរឿងរសើបទី២ គឺទាក់ទងនឹងកិច្ចព្រមព្រៀងដោះដូរសេរី។ តាមលោកដូណាល់ ត្រាំ កិច្ចព្រមព្រៀងដោះដូរសេរីរវាងអាមេរិក និងម៉ិចស៊ិកជាកិច្ចព្រមព្រៀងមិនស្មើភាព។ ក្រៅពីប្រធានរឿងរសើបទាំងពីរដែលនៅមិនទាន់បានដោះស្រាយ រដ្ឋបាលអាមេរិករបស់លោកត្រាំទើបបានផ្សព្វផ្សាយសេចក្តីណែនាំថ្មីមួយទៀតស្តីពីការបណ្តេញអ្នកគ្មានក្រដាសស្នាមចេញពីទឹកដីអាមេរិកាំង។
ចាប់ពីពេលនេះទៅ អាមេរិកនឹងចាប់បញ្ជូនទៅកាន់ម៉ិចស៊ិកនូវជនទាំងឡាយណាដែលបានឆ្លងដែនដោយខុសច្បាប់ចូលទឹកដីអាមេរិកនៅប៉ែកខាងត្បូង ទោះបីជាជននោះមានជនជាតិអ្វីក៏ដោយ។ សេចក្តីណែនាំដដែលបានកំណត់ថា បើជនឆ្លងដែនខុសច្បាប់នោះជាកូនក្មេងមិនទាន់គ្រប់អាយុ តែមានក្រុមគ្រួសាររស់នៅសហរដ្ឋអាមេរិក គឺឱពុកម្តាយរបស់កូនក្មេងនោះនឹងត្រូវទទួលទោស។ ឃើញថា ទាំងនេះសុទ្ធសឹងជាបញ្ហារសើបដែលលោក Tillersion និងលោក Kelly ត្រូវព្យាយាមនិយាយពន្យល់ និងសម្របសម្រួលជាមួយភាគីម៉ិចស៊ិក។
បើតាមមើលទៅ ភាគីម៉ិចស៊ិកពិបាកនឹងទទួលយកនូវវិធានការមួយចំនួនរបស់លោកដូណាល់ ត្រាំ។ លោករដ្ឋមន្រ្តីការបរទេសម៉ិចស៊ិកបានថ្លែងនៅមុនការទៅដល់របស់លោក Tillerson និងលោក Kelly ថា ម៉ិចស៊ិកមិនអាចទទួលយកវិធានការអន្តោប្រវេសន៍អនុម័តដោយរដ្ឋបាលអាមេរិករបស់លោកត្រាំបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ