លោកអូបាម៉ា និងភរិយា ចុះកិច្ចសន្យាប្រគល់សិទ្ធិឱ្យរោងពុម្ពសៀវភៅក្នុងតម្លៃខ្ពស់មិនធ្លាប់មាន
អតីតប្រធានាធិបតីអាមេរិក លោក បារ៉ាក់ អូបាម៉ា និងភរិយា បានព្រមព្រៀងចុះកិច្ចសន្យាប្រគល់សិទ្ធិឱ្យរោងពុម្ពបោះផ្សាយសៀវភៅ ក្នុងតម្លៃខ្ពស់ខ្លាំងមិនធ្លាប់មានទេ។ ស្វាមីភរិយាមួយនេះ បានសរសេរសៀវភៅម្នាក់មួយក្បាល ដែលគេរង់ចាំអានបំផុត។ បើតាមកាសែត Financial Times រោងពុម្ពទំនងជាបានចំណាយថវិកាជាង៦០លានដុល្លារ ដើម្បីបានសិទ្ធិបោះផ្សាយសៀវភៅពីរក្បាលនេះ។
ចុះផ្សាយនៅថ្ងៃ៖
ស្តាប់ - ០២:០៦
លោកអូបាម៉ា ធ្លាប់ចេញសៀវភៅពីរក្បាលហើយ “Dreams from my father” នៅឆ្នាំ១៩៩៥ និង The audacity of Hope (2006) ដែលសៀវភៅនីមួយៗលក់ដាច់អស់ជាងបីលានក្បាល រាប់តែនៅក្នុងសហរដ្ឋអាមេរិកមួយ។ ចំណែកលោកស្រី មីឆែល អូបាម៉ា ក៏ធ្លាប់បានសរសេរសៀវភៅលក់មួយក្បាលដែរ កាលពីឆ្នាំ២០០២ ស្តីពីសួនច្បារនិងអាហារ មានចំណងជើងថា American Grown។
អ្នកអានរង់ចាំសំណេរថ្មីរបស់អតីតប្រធានាធិបតីអាមេរិកខ្លាំងណាស់ ! ព្រោះម្យ៉ាងលោកអូបាម៉ា មានប្រជាប្រិយភាពខ្ពស់ផង ហើយម្យ៉ាងទៀតនៅក្នុងសៀវភៅនោះ លោកអូបាម៉ា ទំនងជានឹងរៀបរាប់ខ្លះអំពីអ្នកស្នងតំណែងនៅសេតវិមាន ដូណាល់ ត្រាំ។ ក្រោយចប់អាណត្តិភ្លាម លោកអូបាម៉ា បានប្រកាសថានឹងចំណាយពេលសរសេរសៀវភៅ និងពេលវេលាជាមួយកូនស្រីទាំងពីរ។
ចំណែកលោកស្រី មីឆែល អូបាម៉ា ដែលបានកំហិតតួនាទីជាជំទាវទីមួយរបស់អាមេរិក អស់រយៈពេល៨ឆ្នាំ និងដែលបានច្រានចោលជាសាធារណៈសម្មតិកម្មលោកស្រីក្លាយជាបេក្ខជនប្រធានាធិបតីនៅឆ្នាំ២០២០ នឹងមានឱកាសបញ្ចេញស្នាដៃសំណេររៀបរាប់អំពីការគ្រប់គ្រងប្រទេសរបស់ស្វាមី។ លោកស្រី ជាស្ត្រីគួរឱ្យកោតសរសេរទីពីរនៅអាមេរិកបន្ទាប់ពីលោកស្រីគ្លីនតុន។ នេះបើតាមការអង្កេត កាលពីចុងខែធ្នូ។
ប្រធានាធិបតីអាមេរិកមុនៗ ក៏ធ្លាប់សរសេរសៀវភៅ និងចុះកិច្ចសន្យាជាមួយរោងពុម្ពដែរ តែក្នុងតម្លៃ ១០លានដុល្លារ ចំពោះលោកចចប៊ូស និង១៥លានដុល្លារប៉ុណ្ណោះចំពោះលោកប៊ីល គ្លីនតុន ដែលបានសរសេរជីវប្រវត្តិលោក។ តែសម្រាប់លោក និងលោកស្រីអូបាម៉ា កិច្ចសន្យាប្រគល់សិទ្ធិឱ្យរោងពុម្ព មានតម្លៃដល់ទៅ ៦០លានដុល្លារ។ ប្រសិនបើដូចជាការអះអាងរបស់Financial Time មែននោះ គឺពិតជាមិនតម្លៃដ៏ខ្ពស់បំផុតដែលធ្លាប់មានឡើយប្រវត្តិបោះពុម្ពសៀវភៅ ! អ្នកនិពន្ធប្រលោមលោកអង្កេត ធ្លាប់បានចុះកិច្ចសន្យាប្រគល់សិទ្ធិឱ្យរោងពុម្ព នៅឆ្នាំ២០០៩ ក្នុងតម្លៃប្រមាណ១៥០លានដុល្លារ តែសម្រាប់១៧សៀវភៅ ជារឿងតគ្នា១៧ក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ