អាមេរិកពង្រឹងសន្តិសុខក្រោយការប៉ុនប៉ុងចូលសេតវិមានញយៗ
ភ្នាក់ងារទទួលបន្ទុករក្សាសន្តិសុខប្រធានាធិបតីអាមេរិក បានប្រកាសពង្រឹងការការពារ និងត្រួតពិនិត្យសេតវិមាន ក្រោយពីចាប់បានបុរសម្នាក់ ដែលប៉ុនប៉ងចូលវិមានប្រធានាធិបតី និងបានគំរាមថាមានផ្ទុកគ្រាប់បែកក្នុងឡាន ចតនៅមាត់ច្រកចូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ហេតុការណ៍បានកើតឡើងនៅល្ងាចថ្ងៃសៅរ៍ វេលាម៉ោង១១និង៥នាទីយប់ ម៉ោងនៅសហរដ្ឋអាមេរិក។ បុរសម្នាក់ បានបើកឡានទៅឈប់ដល់មាត់ច្រកត្រួតពិនិត្យចូលសេតវិមាន ដែលភ្នាក់ងារចារកិច្ចឈរប្រចាំការ។ ជារថយន្តជាប់សង្ស័យ ! ភ្នាក់ងារប៉ូលិសបានចាប់អ្នកបើកបរនោះភ្លាម និងរក្សាជំហរត្រៀមតបត ក្នុងករណីមានការវាយប្រហារជាយថាហេតុណា មួយ។ ជនល្មើលបានថែមទាំងអះអាងថាមានគ្រាប់បែកលាក់ក្នុងរថយន្តទៀត។ នេះបើតាមការពន្យល់លម្អិតរបស់អ្នកនាំពាក្យកងពលរក្សាសន្តិសុខប្រធានាធិបតីនិងឥស្សរជនអាមេរិក។
ប៉ុន្តែលោកប្រធានាធិបតី ដូណាល់ ត្រាំ និងភរិយា បានចាកចេញពីសេតវិមាន ទៅសម្រាកថ្ងៃចុងសប្តាហ៍នៅរដ្ឋផ្លរីដា។
នៅមុនឧប្បត្តិហេតុនេះ ប៉ុន្មានម៉ោង មានមនុស្សម្នាក់ក៏ត្រូវបានចាប់ខ្លួនដែរ បន្ទាប់ពីបានសាកល្បងលោតរបងចូលក្នុងទីធ្លាសេតវិមាន តាមច្រកចេញចូលសម្រាប់អ្នកជិះកង់។ បើតាមភ្នាក់ងារសម្ងាត់អាមេរិក បើទោះបីជាគ្មានអាវុធជាប់នឹងខ្លួនក្តី ក៏ជននេះអាចនឹងត្រូវចាប់ខ្លួន និងជាប់ទោសដែរ។
កាលពីសប្តាហ៍មុន ភ្នាក់ងារសន្តិសុខសេតវិមានបានទាញសញ្ញាអាសន្នម្តងហើយ បន្ទាប់ពីមានការគំរាមកំហែងជាក់ស្តែង។ នៅថ្ងៃទី ១០មីនា ក្នុងពេលដែលលោកប្រធានាធិបតីកំពុងធ្វើការក្នុងការិយាល័យ មានបុរសម្នាក់ បានជ្រៀតចូលក្នុងផ្ទៃសេតវិមាន និងរត់លាក់ខ្លួនពេញសួនច្បារ ជាង១៥នាទី មុននឹងត្រូវភ្នាក់ងារសន្តិសុខចាប់ខ្លួនបាន។
មិនមែនជាករណីកម្រទេ ដែលមានមនុស្សលួចឆ្លងចូលក្នុងសេតវិមានបាននោះ។ កាលពីឆ្នាំ២០១៤ អតីតយុទ្ធជនពិការផ្លូវចិត្តម្នាក់ មានកាបិតបត់ក្នុងហោបៅផង បានផ្លោះលោតចូលក្នុងទីធ្លាវិមានប្រធានាធិបតី និងបានរត់ ឆ្លងកាត់សួនច្បារយ៉ាងលឿនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ