ស៊ីរី៖ ប្រជាជនស៊ីវីល៣៣នាក់ស្លាប់នៅក្នុងការវាយប្រហារជើងអាកាសមួយរបស់កងទ័ពសម្ព័ន្ធ
យោងតាមអង្គការតាមមើលសិទ្ធមនុស្សនៅស៊ីរី (OSDH) ការវាយប្រហារជើងអាកាសមួយរបស់កងទ័ពសម្ព័ន្ធប្រឆាំងពួកអ៊ីស្លាមជីហាតនៅស៊ីរីក្រោមបញ្ជាការអាមេរិក បានបណ្តាលឲ្យស្លាប់ប្រជាជនស៊ីវីលយ៉ាងតិច៣៣នាក់។ ក្រសួងការពារជាតិអាមេរិក បានគូសបញ្ចាក់ឲ្យដឹងដែរថា”កងទ័ពសម្ព័ន្ធនឹងបើកការអង្កេតមួយនៅលើការវាយប្រហារតាមអាកាសកាលពីថ្ងៃអង្គារមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
យោងតាមអង្គការការពារសិទ្ធមនុស្សនៅក្នុងប្រទេសស៊ីរី (OSDH) ការវាយប្រហារតាមជើងអាកាសមួួយនៅភាគខាងត្បូងក្រុង Al-Mansoura ដែលស្ថិតនៅក្រោមការត្រួតត្រារបស់អង្គការរដ្ឋអ៊ីស្លាមនៅ Raqqa ភាគខាងជើងប្រទេស បានសម្លាប់ជីវិតប្រជាជនស៊ីវីល៣៣នាក់។ នេះគ្រាន់តែជាតួលេខបណ្តោះអាសន្នប៉ុណ្ណោះ ដោយក្រុមអ្នកជួយសង្គ្រោះ នៅតែបន្តការតាមស្វែងតាមរកជនដែលនៅរស់រានមានជីវិត។
អង្គការតាមដានសិទ្ធិមនុស្សនៅស៊ីរីដដែលនេះ ដែលមានបណ្តាញព័ត៌មានដ៏ធំធេង បានចោទថា ជាការវាយប្រហាររបស់កងកម្លាំងសម្ព័ន្ធក្រោមបញ្ជាការអាមេរិក កាលពីយប់ថ្ងៃចន្ទឆ្លងមកថ្ងៃអង្គារមុននោះ ដែលបានតម្រង់ការវាយប្រហារទៅលើសាលារៀនមួយកន្លែងដែលជាទីស្នាក់នៅរបស់ជនភៀសខ្លួនមកពីតំបន់ Raqqa មកពីHolms និង Alep ។
ចំណែក កងទ័ពសម្ព័ន្ធអន្តរជាតិដែលដឹកនាំការវាយប្រហារប្រឆាំងពួកអ៊ីស្លាមជីហាតនៅអ៊ីរ៉ាក់ ធ្លាប់បានទទួលស្គាល់កាលពីដើមខែមីនាមុន ថាការវាយប្រហារនានារបស់ខ្លួន បានបណ្តាលឲ្យស្លាប់ប្រជាជនស៊ីវីលយ៉ាងតិច២២០នាក់នៅក្នុងប្រទេសទាំងពីរគឺនៅស៊ីរីនិងអ៊ីរ៉ាក់ចាប់តាំងពីឆ្នាំ ២០១៤មក។
ក៏ប៉ុន្តែចំពោះក្រុមអ្នកសង្កេតការណ៍វិញ តួលេខខាងលើនេះ ជាតួលេខដ៏ស្តួចស្តើង។ លើសពីនេះ ក្រុមអ្នកសង្កេតការណ៍ នៅតែមានការព្រួយបារម្ភខ្លាំងជានិច្ច ពីព្រោះចំនួនជនរងគ្រោះស៊ីវីល នៅតែកើនចំនួនយ៉ាងច្រើនចាប់តាំងពីដើមខែមីនា រួមទាំងការបាញ់ផ្លោងយ៉ាងសន្ធឹកសន្ទាប់នៅក្នុងតំបន់ Raqqa។
ទន្ទឹមនេះ ក្រសួងការពារជាតិអាមេរិក បានជូនដំណឹងដែរថានឹងបើកការអង្កេតមួយនៅលើការវាយប្រហារទាំងអស់នេះដែរ -នេះបើយោងតាមអ្នកនាំពាក្យម្នាក់របស់កងយោធាអាមេរិកនៅថ្ងៃពុធម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ