អ.ស.ប.៖ក្រុមប្រឹក្សាសន្តិសុខពង្រឹងវិធានការការពារបេតិកភ័ណ្ឌវប្បធម៌ពិភពលោក
ក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆ័ន្ទនៅថ្ងៃសុក្រ ទី២៤ មីនាលើសេចក្តីសម្រេចចិត្តមួយដើម្បីពង្រឹងវិធានការការពារបេតិកភ័ណ្ឌវប្បធម៌ពិភពលោក។ ការសម្រេចចិត្តយ៉ាងដូចនេះដោយក្រុមប្រឹក្សាសន្តិសុខបានមើលឃើញថា មានសម្បត្តិបេតិកភ័ណ្ឌវប្បធម៌ក្នុងលោកកាន់តែច្រើនឡើងៗត្រូវបានបំផ្លិចបំផ្លាញដោយជម្លោះប្រដាប់អាវុធ និងទង្វើភេរវនិយម។ ចាប់ពីពេលនេះទៅ ជនដៃដល់ដែលបំផ្លាញសម្បត្តិបេតិកភ័ណ្ឌវប្បធម៌នឹងត្រូវចោទប្រកាន់ពីបទឧក្រិដ្ឋកម្មសង្រ្គាម។
ចុះផ្សាយនៅថ្ងៃ៖
ស្តាប់ - ០២:១៤
ក្នុងរយៈពេលប៉ុន្មានឆ្នាំចុងក្រោយនេះ មានសម្បត្តិបេតិកភ័ណ្ឌវប្បធម៌ក្នុងលោកជាច្រើនបានក្លាយជាផ្ទាំងស៊ីបនៃការវាយបំផ្លិចបំផ្លាញពីក្រុមជនប្រដាប់អាវុធ ក៏ដូចជាពួកជីហាតអង្គការរដ្ឋអ៊ីស្លាម។ ជាក់ស្តែង រូបព្រះពុទ្ធ Bamiyan នៅក្នុងប្រទេសអាហ្វហ្កានីស្ថាន កំណត់ត្រាដោយដៃ Tombouctou នៅក្នុងប្រទេសម៉ាលី ឬមួយក៏ប្រាសាទ Palmyre នៅក្នុងប្រទេសស៊ីរី។ នៅក្នុងន័យនេះ សេចក្តីសម្រេចចិត្តរបស់ក្រុមប្រឹក្សាសន្តិសុខបានអំពាវនាវឲ្យការពារសម្បត្តិបេតិកភ័ណ្ឌវប្បធម៌ពិភពលោកជាអចិន្ត្រែយ៍នៅគ្រប់តំបន់ជម្លោះក្នុងលោកដោយគ្មានការកម្រិតភូមិសាស្រ្ត និងការគំរាមកំហែងគ្រប់ប្រភេទ រួមមាន ការវាយកម្ទេចចោល ការលួចយក ឬមួយក៏ការរត់ពន្ធ។
សេចក្តីសម្រេចចិត្តដដែលបានគូសបញ្ជាក់ថា ទង្វើវាយប្រហារដោយចេតនាលើទីតាំងសម្បត្តិបេតិកភ័ណ្ឌវប្បធម៌ ឬសាសនាអាចចាត់ទុកជាឧក្រិដ្ឋកម្មសង្រ្គាម។ ទន្ទឹមគ្នានេះ សមាជិកក្រុមប្រឹក្សាសន្តិសុខក៏បានអំពាវនាវដល់គ្រប់ប្រទេសឲ្យបង្កើតកងឯកភាពជំនាញមួយដោយសហការណ៍ជាមួយអន្តរជាតិសម្រាប់ប្រយុទ្ធប្រឆាំងនឹងការជួញដូរសម្បត្តិបេតិកភ័ណ្ឌមនុស្សជាតិដែលលួចចេញពីតំបន់មានជម្លោះប្រដាប់អាវុធ។ លោកស្រី Audrey Azoulay រដ្ឋមន្រ្តីក្រសួងវប្បធម៌បារាំងបានប្រដូចទង្វើបំផ្លិចបំផ្លាញសម្បត្តិបេតិកភ័ណ្ឌមនុស្សជាតិទៅនឹងទង្វើសម្លាប់មនុស្ស។
តាមលោកស្រី Audrey Azoulay យុទ្ធនាការប្រយុទ្ធប្រឆាំងនឹងការបំផ្លាញសម្បត្តិមនុស្សជាតិក៏ជាវិធានការសន្តិសុខមួយយ៉ាងសំខាន់ព្រោះទឹកប្រាក់បានមកពីការជួញដូរសម្បត្តិបេតិកភ័ណ្ឌពិភពលោកបានចូលរួមចិញ្ចឹមអំពើភេរវនិយម។ ដោយឡែក នាយិកាអង្គការ Unesco លោកស្រី Irina Bokova ដែលគាំទ្រសេចក្តីសម្រេចរបស់ក្រុមប្រឹក្សាសន្តិសុខបានទទួលស្គាល់ថា ការពង្រឹងវិធានការការពារសម្បត្តិបេតិកភ័ណ្ឌមនុស្សជាតិតម្រូវឲ្យមានការចំណាយច្រើន និងបានកើនឡើងជានិច្ច។
កាលពីថ្ងៃចន្ទ ទី២០ មីនា ប្រទេសចំនួន ៧ ក្នុងនោះមានបារាំង រួមទាំងអ្នកផ្តល់ជំនួយឯកជនម្នាក់បានសន្យាផ្តល់លុយសរុបប្រមាណជា ៧៥លានដុល្លារសម្រាប់ការពារបេតិកភ័ណ្ឌវប្បធម៌ដែលកំពុងទទួលការគំរាមកំហែងដោយសង្រ្គាម និងភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ