អាមេរិក៖លោកដូណាល់ ត្រាំបានដកសេចក្តីព្រាងច្បាប់ថ្មីស្តីពីសុខភាពដោយគ្មានសម្លេងគាំទ្រគ្រប់គ្រាន់
នៅសហរដ្ឋអាមេរិក លោកប្រធានាធិបតីដូណាល់ ត្រាំបានបង្ខំចិត្តដកចេញវិញនូវសេចក្តីព្រាងច្បាប់ថ្មីស្តីពីសុខភាព។ មូលហេតុ មកពីគណបក្សសាធារណរដ្ឋរបស់លោកដែលមានសម្លេងភាគច្រើននៅសភាមិនអាចប្រមូលបានសម្លេងគ្រប់គ្រាន់ដើម្បីអនុម័តលើច្បាប់ថ្មីដែលត្រូវចូលជំនួសច្បាប់សុខភាព« Obamacare » របស់លោកអូបាម៉ា។ ប្រឈមនឹងភាពបរាជ័យនេះ លោកដូណាល់ ត្រាំបានបញ្ជាក់ថា លោកនឹងមិនបោះបង់ចោលច្បាប់ថ្មីនោះទេ និងត្រៀមខ្លួនដើម្បីសហការណ៍ជាមួយក្រុមអ្នកប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៣៣
« វាពិតជារឿងល្អណាស់បើគ្មានការគាំទ្រពីក្រុមអ្នកប្រជាធិបតេយ្យ។ ប្រសិនបើច្បាប់សុខភាព « Obamacare » របស់ពួកគេទទួលបរាជ័យដែលខ្ញុំជឿជាក់ថានឹងកើតមាននាពេលឆាប់ៗខាងមុខ ពួកគេប្រាកដជាសម្រេចចិត្តមកចូលរួមជាមួយច្បាប់ថ្មីរបស់យើង និងនៅពេលនោះ ខ្ញុំពិតជាសប្បាយចិត្តនឹងបើកទ្វារទទួលពួកគេ ហើយខ្ញុំសង្ឃឹមថា នេះជាអ្វីដែលនឹងអាចមាននៅពេលខាងមុខ។
អ្នកដែលចាញ់ពិតប្រាកដពេលនេះ គឺលោកស្រី Nancy Pelosi និងលោក Chuck Shumer ដែលជាប្រធានក្រុមអ្នកប្រជាធិបតេយ្យនៅសភា និងនៅព្រឹទ្ធសភា ព្រោះថា « Obamacare » ជាច្បាប់របស់ពួកគេ ១០០%។ ច្បាប់« Obamacare » មិនមែនជាច្បាប់សាធារណរដ្ឋទេ ហើយក្រុមអ្នកប្រជាធិបតេយ្យមានច្បាប់« Obamacare » រហូតដល់ច្បាប់មួយនេះស្លាប់លែងដំណើរការនាពេលឆាប់ៗខាងមុខ។
ខ្ញុំសូមរម្លឹកជូនអស់ លោកថា « Obamacare » មិនមែនជាច្បាប់របស់យើងទេ គឺជាច្បាប់របស់ក្រុមអ្នកប្រជាធិបតេយ្យ។ នៅពេលដែលក្រុមអ្នកប្រជាធិបតេយ្យនឹងក្លាយខ្លួនជាអ្នកស៊ីវីល័យ ហើយមានបំណងចង់បង្កើតឲ្យមានច្បាប់សុខភាពមួយដ៏ប្រសើរសម្រាប់ពលរដ្ឋរស់ក្នុងប្រទេសនេះ យើងនឹងបើកទ្វារចំហដើម្បីទទួលយកសំណើរបស់ពួកគេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ