អាមេរិកបង្កើនប្រតិបត្តិការយោធាកម្ទេចពួកជីហាតនៅស៊ីរី តែបន្តមិនទម្លាយផែនការសម្ងាត់
ចុះផ្សាយនៅថ្ងៃ៖
ស្តាប់ - ០៥:១២
កាលពីថ្ងៃអង្គារ ទី២១ មីនា ក្រុមប្រទេសសម្ព័ន្ធមិត្តអន្តរជាតិទាំង ៦៨ប្រទេសដែលបង្កើតឡើងដោយលោកអតីតប្រធានាធិបតីអាមេរិកបារ៉ាក់ អូបាម៉ាក្នុងឆ្នាំ ២០១៤ បានរួមប្រជុំគ្នាក្នុងទីក្រុងវ៉ាស៊ីនតោន។ នេះជាកិច្ចប្រជុំលើកទី១ រៀបចំដោយរដ្ឋបាលអាមេរិករបស់លោកប្រធានាធិបតីដូណាល់ ត្រាំ។ លោកត្រាំមិនមានវត្តមាននៅក្នុងកិច្ចប្រជុំនោះទេ តែលោករដ្ឋមន្រ្តីការបរទេសអាមេរិក Rex Tillerson បានប្រាប់ឲ្យដឹងពីគោលដៅរបស់អាមេរិកក្នុងការកំចាត់មេអង្គការរដ្ឋអ៊ីស្លាមអាប៊ូបា អាល់បាដាឌី។ ការប្តេជ្ញាចិត្តរបស់អាមេរិកពេលនេះបានធ្វើឡើង ក្នុងពេលដែលទ័ពអាមេរិកកំពុងបង្កើនប្រតិបត្តិការវាយប្រហារលើពួកជីហាតនៅមូលដ្ឋានរ៉ាក់កាស្ថិតប៉ែកខាងជើងប្រទេសស៊ីរី។
កម្មវត្ថុរបស់រដ្ឋបាលអាមេរិកក្នុងជំនាន់លោកដូណាល់ ត្រាំបច្ចុប្បន្នក៏មិនខុសពីកម្មវត្ថុរបស់រដ្ឋបាលអាមេរិកក្នុងជំនាន់លោកបារ៉ាក់ អូបាម៉ាដែរ នោះគឺការកំចាត់រចនាសម្ព័ន្ធរបស់អង្គការរដ្ឋអ៊ីស្លាមឲ្យដល់ឫសគល់នៅក្នុងប្រទេសអ៊ីរ៉ាក់ និងស៊ីរី។ តែអ្វីដែលគួរឲ្យកត់សម្គាល់ អាមេរិករបស់លោកដូណាល់ ត្រាំហ៊ានទាំងចេញមុខធានាក្តែងៗពីការអាចសម្លាប់បានមេកើយអង្គការរដ្ឋអ៊ីស្លាមអាប៊ូបា អាល់បាដាឌីក្នុងពេលឆាប់ៗខាងមុខ។ « កំចាត់អាប៊ូបា អាល់បាដាឌីជារឿងងាយ គ្រាន់តែត្រូវការពេលវេលាបន្តិច » នេះជាឃ្លាថ្លែងដោយលោក Rex Tillerson ប្រមុខការទូតអាមេរិកនាឱកាសកិច្ចប្រជុំនៃក្រុមប្រទេសសម្ព័ន្ធមិត្តអន្តរជាតិទាំង ៦៨ប្រទេសក្នុងទីក្រុងវ៉ាស៊ីតោនកាលពីថ្ងៃទី២១ មីនា។
ដើម្បីបញ្ជាក់ពីការប្តេជ្ញាចិត្តរបស់ខ្លួន រដ្ឋបាលអាមេរិករបស់លោកដូណាល់ ត្រាំបានបង្កើនការវាយប្រហារលើពួកជីហាតនៅក្នុងទីក្រុងរ៉ាក់កាស្ថិតប៉ែកខាងជើងប្រទេសស៊ីរី។ ទីក្រុងរ៉ាក់កា ជាមូលដ្ឋានស្នូលមួយរបស់អង្គការរដ្ឋអ៊ីស្លាម និងដែលមេកើយរបស់វាអាប៊ូបា អាល់បាដាឌីកំពុងមានវត្តមាននៅទីនោះ។ បន្ទាប់ពីបានប្រកាសកាលពីថ្ងៃទី១០ មីនាក្នុងការបញ្ជូនទ័ពចំនួន ៤០០នាក់ទៅគាំទ្រ និងត្រៀមជួយកម្លាំងប្រជាធិបតេយ្យស៊ីរីហៅកាត់ FDS ដើម្បីវាយសង្រ្គប់យកក្រុងរ៉ាក់កាទាំងមូលមក អាមេរិកក៏បានបើកការវាយប្រហារតាមឧទ្ធម្ភាគចក្រ និងបាញ់គ្រាប់កាំភ្លើងត្បាល់កាលពីថ្ងៃទី២២ មីនាទៅជួយគាំទ្រយុទ្ធនាការរបស់កម្លាំង FDS ដើម្បីដណ្តើមទំនប់វារីអគ្គិសនីស្ថិតក្នុងស្រុកតាបកាមានចម្ងាយ ៥០គីឡូម៉ែត្រប៉ែកខាងលិចក្រុងរ៉ាក់កា។
សូមជម្រាបជូនថា កម្លាំងប្រជាធិបតេយ្យស៊ីរីហៅកាត់ FDS ជាសម្ព័ន្ធមួយដែលចូលរួមដោយកម្លាំងយុទ្ធជនអារ៉ាប់ និងយុទ្ធជនគួដដោយមានការគាំទ្រយ៉ាងពេញទំហឹងពីកម្លាំងសម្ព័ន្ធមិត្តអន្តរជាតិដឹកនាំដោយអាមេរិក។ សម្ព័ន្ធមួយនេះបានបើកយុទ្ធនាការក្នុងខែវិច្ឆិកា ឆ្នាំ ២០១៦ ដើម្បីរំដោះទីក្រុងរ៉ាក់កាដែលបានធ្លាក់ក្នុងកណ្តាប់ដៃរបស់អង្គការរដ្ឋអ៊ីស្លាមក្នុងខែសីហា ឆ្នាំ ២០១៤។ បន្ទាប់ពីបានបើកយុទ្ធនាការចាស់ដៃមក កម្លាំង FDS ទើបដណ្តើមកាន់កាប់បានអាកាសយានដ្ឋានយោធាតាបកា។ ចំណែកទំនប់វារីអគ្គិសនីនៅមិនទាន់ដណ្តើមបាននៅឡើយទេ តែបានគាំងដំណើរការដោយសាររចនាសម្ព័ន្ធរបស់វាទទួលរងការខូចខាតដោយគ្រាប់បែក។
យ៉ាងណាក៏ដោយ ទីក្រុងរ៉ាក់កាដែលជាមូលដ្ឋានរបស់អង្គការរដ្ឋអ៊ីស្លាមនៅក្នុងទឹកដីស៊ីរីកំពុងស្ថិតក្រោមការឡោមព័ទ្ធរបស់កម្លាំង FDS ដោយមានការជួយគាំទ្រពីកម្លាំងសម្ព័ន្ធមិត្តអន្តរជាតិដឹកនាំដោយអាមេរិក។ សូមជម្រាបជូនថាក្នុងរយៈពេលប៉ុន្មានសប្តាហ៍កន្លងទៅ កម្លាំងសម្ព័ន្ធមិត្តអន្តរជាតិបានបង្កើនការវាយប្រហារផ្លូវអាកាសក្នុងទឹកដីស៊ីរីសំដៅលើទីតាំងរបស់អង្គការរដ្ឋអ៊ីស្លាម។ ជាក់ស្តែងក្នុងខែកុម្ភៈ យន្តហោះចម្បាំងបានចេញប្រតិបត្តិការជិត ៥៦០ដង ខែមករាមានប្រមាណជា ៥០០ដង ហើយក្នុងខែធ្នូ ឆ្នាំ ២០១៦ មានមិនដល់ ៣០០ដងផង។ កំណើនយុទ្ធនាការនេះពិតជាសក្ខីកម្មមួយដែលសម្តែងចេញពីឆន្ទៈរបស់រដ្ឋបាលអាមេរិករបស់លោកដូណាល់ ត្រាំក្នុងការកំចាត់អង្គការរដ្ឋអ៊ីស្លាមឲ្យដល់ឫសគល់ ទោះស្ថិតនៅកន្លែងណាក៏ដោយ។
ទន្ទឹមគ្នានេះ លោកប្រមុខការទូតអាមេរិក Rex Tillerson មិនភ្លេចនិយាយទេពីគម្រោងបង្កើតតំបន់បណ្តោះអាសន្នមួយដែលមានស្ថិរភាព និងធានាបទឈប់បាញ់នៅក្នុងទឹកដីស៊ីរីដើម្បីអនុញ្ញាតឲ្យមានការវិលត្រឡប់របស់ជនភៀសខ្លួន និងជនបំលាស់ទីជនជាតិស៊ីរី។ សហគមន៍អន្តរជាតិ ពិសេសបារាំងតាមរយៈលោកប្រមុខការទូតហ្សង់ម៉ាក អេរ៉ូបានសម្តែងការពេញចិត្តចំពោះសេចក្តីសម្រេចចិត្តរបស់អាមេរិកក្នុងយុទ្ធនាការរំដោះទីក្រុងរ៉ាក់កា។ សម្រាប់លោកអេរ៉ូ គឺនៅទីក្រុងរ៉ាក់កានោះហើយដែលពួកជីហាតបានរៀបចំផែនការភេវរកម្មវាយប្រហារលើទឹកដីអឺរ៉ុប។ ក៏ប៉ុន្តែ រូបប្រមុខការទូតបារាំងមិនយល់ស្របតាមអាមេរិកក្នុងការបង្កើតឲ្យមានតំបន់បណ្តោះអាសន្នលើទឹកដីស៊ីរីដើម្បីអនុញ្ញាតឲ្យមានការវិលត្រឡប់របស់ជនភៀសខ្លួន និងជនបំលាស់ទីជនជាតិស៊ីរីទេ។
អ្វីដែលលោកអេរ៉ូចង់បាននៅក្រោយការរំដោះទីក្រុងរ៉ាក់កាពីពួកជីហាត គឺបង្កើតអភិបាលស៊ីរីមួយដឹកនាំដោយក្រុមប្រឆាំងកណ្តាលនិយម។ នៅត្រង់ចំណុចនេះ លោកអេរ៉ូនៅមិនទាន់បានទទួលចម្លើយជាក់ច្បាស់ពីអាមេរិកនៅឡើយទេ។ មួយវិញទៀត និងអ្វីដែលសហគមន៍អន្តរជាតិកំពុងចង់ដឹងពីអាមេរិកនោះ គឺផែនការសម្ងាត់ក្នុងការកំចាត់អង្គការរដ្ឋអ៊ីស្លាម។ ផែនការសម្ងាត់មួយនេះត្រូវបានលើកឡើងដោយលោកដូណាល់ ត្រាំនាសម័យឃោសនាបោះឆ្នោត។ តែរហូតមកដល់ពេលនេះ ផែនការសម្ងាត់នោះនៅបន្តស្ងាត់ រហូតធ្វើឲ្យលោកស្រីហ៊ីលឡារី គ្លីនតុនដែលជាបេក្ខជនប្រធានាធិបតីចាញ់ឆ្នោតដៀមដាមឲ្យថា "ការបន្តមិនបញ្ចេញផែនការសម្ងាត់ ក៏ដោយសារតែគ្មានផែនការសម្ងាត់ស្អីណាដើម្បីបញ្ចេញនោះទេ"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ