កូឡុំប៊ី ការហូរបាក់ដីមរណៈសម្លាប់មនុស្សអស់យ៉ាងហោច ជាងពីររយនាក់
គ្រោះហូរបាក់ដីដ៏សម្បើមមួយកំពុងវាយប្រហារលើប្រទេសកូឡុំប៊ីភាគខាងត្បូង។ ក្រុងដែលមានប្រជាជនរស់នៅជាងបួនម៉ឺននាក់ ស្ទើរលុបបាត់ឈឹង។ តុល្យការរងគ្រោះធ្ងន់ធ្ងរខ្លាំង ៖ ជាងពីរនាក់ស្លាប់។ បើតាមអង្គការកាកបាទក្រហម មានមនុស្សជាង២០០នាក់ផ្សេងទៀតរងរបួស និងជាង២២០នាក់ បាត់ខ្លួន។ រដ្ឋាភិបាលកូឡុំប៊ីកំពុងបើកយុទ្ធនាការសង្គ្រោះទ្រង់ទ្រាយធំ។
ចុះផ្សាយនៅថ្ងៃ៖
សោកនាដកម្មបានកើតឡើង បន្ទាប់ពីមានភ្លៀងធ្លាក់ខ្លាំង ដែលជាហេតុការណ៍ អាកាសធាតុធម្មជាតិ El Nino និងដែលបណ្តាលឱ្យទន្លេបីជន់ឡើងក្នុងពេលទាំងមួយ ទើបមានហេតុការណ៍ហូរបាក់ដីឡើង។
ជំនន់ភក់ និងថ្ម បានហូរអូសយកផ្ទះសម្បែង រថយន្ត ស្ពានថ្នល់ទៅជាមួយ សឹងថាឆូតបំបាត់ក្រុងតូចមួយនៅភាគខាងត្បូងប្រទេសឱ្យបាត់ចេញពីផែនទីតែម្តង។ ក្រុមអ្នកសង្គ្រោះ ដោយមានជំនួយពីយោធាផង កំពុងស្វែងរកអ្នកបាត់ខ្លួន អស់ពេញមួយថ្ងៃ កាយវែករកក្នុងគំនរថ្ម គំនរដី។ អាជ្ញាធរតំបន់ បានភ្ញាក់ខ្លួនដឹងអំពីទំហំនៃគ្រោះថ្នាក់ នៅរសៀលម្សិលមិញប៉ុណ្ណោះ និងកំពុងផ្តើមរាប់ជនរងគ្រោះដែលកើនឡើងឥតឈប់ឈរ។ បើតាមតួលេខរបស់យោធាសង្គ្រោះ គេរាប់ឃើញមានស្លាប់២៥០នាក់ របួសជាងបួនរយនាក់ និងជាង២០០នាក់បាត់ខ្លួន។
រដ្ឋាភិបាលបានបញ្ជូនជំនួយជាសម្ភារៈថ្នាំសង្កូវ ស្បៀង ទឹកស្អាត ចំនួន៧តោន។ ប្រធានាធិបតី សិនតូស ជ័យលាភីរង្វាន់ណូបែលសន្តិភាពឆ្នាំ២០១៦ បានចុះទៅដល់កន្លែងរងគ្រោះ ដើម្បីធ្វើអធិការកិច្ចប្រតិបត្តការសង្គ្រោះ និងជួបជាមួយគ្រួសាររងគ្រោះ ដោយបានប្រកាសចាត់ទុកគ្រោះហូរបាក់ដីថា ជាអន្តរាយសាធារណៈ។
រដូវវស្សាឆ្នាំនេះ បានចាប់ផ្តើមយ៉ាងកំណាច មិនធ្លាប់មានទេ សម្រាប់តំបន់ទាំងមូលតែម្តង ៖ នៅប៉េរ៉ូប្រទេសជាតិខាង ប្រជាជនជាងមួយលាននាក់ត្រូវរងគ្រោះ និង១០០នាក់បានស្លាប់ក្នុងគ្រោះទឹកជំនន់។ តំបន់ជាច្រើន នៃប្រទេសកូឡុំប៊ី បន្តស្ថិតក្រោមការប្រកាសអាសន្នទឹកភ្លៀងនិងការហូរបាក់ដី។
សហគមន៍អន្តរជាតិ ដោយផ្តើមពីប្រទេសបារាំង តាមរយៈសេចក្តីថ្លែងការណ៍ថ្ងៃនេះ លោកហ្វ្រង់ស័រ ហូឡង់ បានផ្ញើសារសាមគ្គីភាពនិងប្រកាសត្រៀមផ្តល់ជំនួយ ទៅតាមសំណើសុំរបស់កូឡុំប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ