វិបត្តិនយោបាយកាន់តែធ្លាក់ចុះជ្រៅ នៅវ៉េណេស៊ុយអេឡា
ប៉ូលិស និងបាតុករបានប៉ះទង្គិចគ្នា មួយប្រាវ នៅថ្ងៃសៅរ៍ម្សិលមិញ នៅទីក្រុងការ៉ាកាសរបស់ប្រទេសវ៉េណេស៊ុយអេឡា។ ការប៉ះទង្គិចដែលមិនបានបង្កឲ្យមានអ្នករបួស។ នេះបើតាមប៉ូលិស។ ក្នុងរយៈពេល មួយសប្តាហ៍ នេះជាលើកទី ៤ ដែលបាតុកម្មត្រូវបានរៀបចំឡើង ដើម្បីប្រឆាំងរដ្ឋាភិបាល របស់លោកនីកូឡា ម៉ាឌូរ៉ូ។ វ៉េណេស៊ុយអេឡាដែលកំពុងក្រពុលមុខខ្លាំង ដោយសារវិបត្តិសេដ្ឋកិច្ច ពេលនេះកំពុងស្ថិតនៅមាត់ជ្រោះនៃវិបត្តិនយោបាយ ហើយនិងរដ្ឋប្រហារយោធា។
ចុះផ្សាយនៅថ្ងៃ៖
នៅវ៉េណេស៊ុយអេឡា ទាំង រដ្ឋាភិបាល និងប្រជាជនចាប់ផ្តើមទ័លគំនិតលែងទ្រាំទ្របាននឹងវិបត្តិសេដ្ឋកិច្ច ដែលកើតឡើង ដោយសារតែធ្លាក់តម្លៃប្រេង ដែលជាប្រភពចំណូលតែមួយរបស់ប្រទេស។ ប្រឈមនឹងអប្រជាប្រិយភាពខ្លាំងមិនធ្លាប់មាននៅក្នុងប្រទេស លោកប្រធានាធិបតីនីកូឡា ម៉ាឌូរ៉ូបានដើរក្រឡាអុក ដើម្បីបំបាត់សំឡេងក្រុមប្រឆាំង។
រដ្ឋាភិបាលវ៉េណេស៊ុយអេឡា ត្រូវរងការរិះគន់ ទាំងក្នុងស្រុក និងពីសហគមន៍អន្តរជាតិ បន្ទាប់ពីឲ្យតុលាការកំពូល ដែលស្ថិតនៅក្រោមឥទ្ធិពលរបស់លោកប្រធានាធិបតី នីកូឡា ម៉ាឌូរ៉ូ បានសម្រេចរឹបអូសយកអំណាចពីសភា ដែលគ្រប់គ្រងដោយគណបក្សប្រឆាំង។ វិបត្តិនយោបាយនៅ វ៉េណេស៊ុយអេឡាចាប់ផ្តើមលេចមុខ នៅឆ្នាំ ២០១៥ ចាប់តាំងពីគណបក្សប្រឆាំង ឈ្នះឆ្នោត ចូលកាន់កាប់សភា ដែលធ្លាប់តែគ្រប់គ្រងដោយគណបក្សកាន់អំណាច។
គណបក្សប្រឆាំងដែលបានបរិហាររិះគន់ ការគាបសង្កត់ រំលោភលទ្ធិប្រជាធិបតេយ្យពីសំណាក់រដ្ឋាភិបាលរបស់លោក ម៉ាឌូរ៉ូ បានអំពាវនាវឲ្យមានអន្តរាគមន៍របស់យោធា ឬរដ្ឋប្រហារយោធា ហើយនិងបាតុកម្ម ដង្ហែរក្បួនតាមដងផ្លូវ ប្រឆាំងលោកម៉ាឌូរ៉ូ។ នៅថ្ងៃសៅរ៍ម្សិលមិញ នៅក្នុងបាតុកម្មជាលើកទី ៤ ក្នុងរយៈពេលតែមួយសប្តាហ៍ ប្រជាជនវ៉េណេស៊ុយអេឡារាប់ពាន់នាក់បានចូលរួមធ្វើបាតុកម្មជាមួយគណបក្សប្រឆាំង។ បាតុកម្មភ្លូកទឹក ភ្លូកដី នៅទីក្រុងការ៉ាកាសធ្វើឡើង បន្ទាប់ពីមេបក្សប្រឆាំងម្នាក់ ដែលឡើងកូដខ្លាំង និងដែលអាចជាប់ឆ្នោត ប្រធានាធិបតីនៅឆ្នាំ ២០១៨ ត្រូវ បានរដ្ឋាភិបាលសម្រេច ហាមឃាត់មិនឲ្យធ្វើនយោបាយរយៈពេល ១៥ឆ្នាំ។ លោក Henriques Capriles ដែលចាញ់ឆ្នោតប្រធានាធិបតីយ៉ាងប្រផិតប្រផើយ នៅឆ្នាំ ២០១៣ ត្រូវបានរដ្ឋាភិបាលដាក់ពិន័យ ពីបទគ្រប់គ្រងមិនល្អ ក្នុងពេលលោកធ្វើជាអភិបាលរដ្ឋមីរ៉ង់ដា។
“ការដាក់មេបក្សប្រឆាំង ដែលមានប្រជាប្រិយភាពឲ្យនៅក្រៅសៃង្វៀននយោបាយ មិនអាចបន្ទុចបង្អាក់សំឡេងប្រឆាំងបានទេ។ ការតស៊ូទើបតែចាប់ផ្តើមនៅពេលទេ” នេះជាសំដីរបស់អ្នកគាំទ្របក្សប្រឆាំងវ៉េណេស៊ុយអេឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ