ពលរដ្ឋអាមេរិកជាង ៨ លាននាក់កំពុងតែមានជម្ងឺផ្លូវចិត្តកំរិតធ្ងន់
ចុះផ្សាយនៅថ្ងៃ៖
ស្តាប់ - ០៤:១៦
យោងតាមលទ្ធផលនៃការសិក្សាវិទ្យាសាស្រ្តមួយបានឲ្យដឹងថា មានពលរដ្ឋអាមេរិកចំនួនប្រមាណ ៨,៣ លាននាក់កំពុងតែមានជំងឺផ្លូវចិត្តកំរិតធ្ងន់។ ហើយអ្នកជម្ងឺទាំងនោះចាំបាច់ត្រូវការទទួលការព្យាបាលជាបន្ទាន់។ ការសិក្សានោះក៏បានលាតត្រដាងឲ្យដឹងផងដែរថា កំណើនអ្នកជម្ងឺផ្លូវចិត្តនេះក៏បានជះឥទ្ធិពលធ្វើឲ្យចំនួនពលរដ្ឋអាមេរិកធ្វើអត្តឃាតកាន់តែកើនឡើងផងដែរពីមួយឆ្នាំទៅមួយឆ្នាំ។ ស្របពេលគ្នានេះ គុណភាពសេវាសុខាភិបាលសាធារណៈផែ្នកវិកលចរិតនៅសហរដ្ឋអាមេរិកក៏កំពុងតែថយចុះ។ ជាពិសេស ថវិការដ្ឋសំរាប់សេវាសាធារណៈនៃជម្ងឺនេះក៏ត្រូវបានកាត់បន្ថយជាលំដាប់។
ចំនួនពលរដ្ឋអាមេរិកមានជម្ងឺផ្លូវចិត្តកំពុងតែកើនឡើងឥតឈប់ឈរ។ នេះជាការប្រកាសអាសន្ននៅក្នុងរបាយការណ៍នៃការសិក្សាវិទ្យាសាស្រ្តមួយចុះផ្សាយកាលពីថ្ងៃច័ន្ទ ទី១៧ មេសាកន្លងទៅនេះ។ លទ្ធផលនៃការសិក្សានេះត្រូវបានផ្សព្វផ្សាយនៅតាមអ៊ិនធ័រណេតនៅក្នុងព្រឹត្តិប័ត្រវិទ្យាសាស្រ្ត Psychiatric services។ លោកស្រីវេជ្ជបណ្ឌិត Judith Weissman អ្នកស្រាវជ្រាវប្រចាំមជ្ឈមណ្ឌលវេជ្ជសាស្រ្ត Langone នៃសាកលវិទ្យាល័យញ៉ូវយកជាអ្នកដឹកនាំក្រុមអ្នកស្រាវជ្រាវក្នុងក្របខ័ណ្ឌនៃការសិក្សានេះ។
ឆ្លងតាមរយៈការសិក្សាវិភាគស្ថិតិរបស់រដ្ឋាភិបាលសហព័ន្ធ ក្រុមអ្នកស្រាវជ្រាវបានទាញសេចក្តីសន្និដ្ឋានថា បច្ចុប្បន្ននេះ មានពលរដ្ឋអាមេរិកជាង ៨,៣ លាននាក់កំពុងតែមានជម្ងឺផ្លូវចិត្តកំរិតធ្ងន់ធ្ងរ។ នេះជាចំនួនដ៏ច្រើនលើសលប់ពុំដែលធ្លាប់មានពីមុនមក។ ហើយចំនួននេះ គឺតំណាងឲ្យ ៣,៤% នៃចំនួនប្រជាជនអាមេរិកសរុប។ បើប្រៀបធៀបនឹងកាលពីដប់ឆ្នាំមុន ចំនួននេះមានតែ ៣% តែប៉ុណ្ណោះ។ ការសិក្សានេះត្រូវបានធ្វើឡើងចន្លោះពីឆ្នាំ២០០៦ ដល់ឆ្នាំ ២០១៤។ ពលរដ្ឋអាមេរិកដែលមានជម្ងឺផ្លូវចិត្តនោះមានអាការៈផ្សេងៗដូចជា៖ សម្ពាធផ្លូវចិត្ត ការតានតឹងអារម្មណ៍ និងការក្រៀមក្រំផ្លូវចិត្តជាដើម។ ហើយអ្នកមានអាការៈជម្ងឺទាំងអស់នោះចាំបាច់ត្រូវទទួលការព្យាបាលជាបន្ទាន់។
ការសិក្សានេះក៏ផ្អែកលើការធ្វើអង្កេតដោយផ្ទាល់មួយជាមួយនឹងពលរដ្ឋអាមេរិកចំនួន ៣៥ ០០០ គ្រួសារ ដែលស្មើនឹងមនុស្សចំនួន ២ សែននាក់មកពីគ្រប់ស្រទាប់វណ្ណៈនិង សហគមន៍ជាតិសាសន៍នានា។ ពលរដ្ឋទាំងនោះបានចូលរួមសហការជារៀងរាល់ឆ្នាំជាមួយមជ្ឈមណ្ឌលបង្ការ និងគ្រប់គ្រងជម្ងឺផ្លូវចិត្ត (CDC) ដែលមានទីតាំងនៅគ្រប់ទីកន្លែងនានាទូទាំងសហរដ្ឋអាមេរិក។ អ្នកចូលរួមសហការជាមួយនឹងការធ្វើអង្កេតសិក្សានេះបានរៀបរាប់អំពីស្ថានភាពផ្លូវចិត្តរបស់ពួកគេដោយផែ្អកលើអារម្មណ៍ចំនួន ៦។ ក្នុងនោះមានជាអាទិដូចជា៖ ១)អារម្មណ៍ទុក្ខសោក ២)អារម្មណ៍គិតថាខ្លួនគ្មានប្រយោធន៍ ៣)អារម្មណ៍រវើរវាយកាយ ៤)អារម្មណ៍នឿយហត់រាងកាយ ៥)អារម្មណ៍ខឹងច្រឡោត និង៦)ការបាត់បង់សមត្ថភាពចង់ប្រឹងប្រែងធ្វើអ្វីមួយ។
បើយោងតាមសំដីរបស់លោកស្រីវេជ្ជបណ្ឌិត Judith Weissman បានឲ្យដឹងថា កំណើនអ្នកជម្ងឺផ្លូវចិត្តក្នុងចំណោមពលរដ្ឋអាមេរិក គឺអាចបណ្តាលមកពីវិបត្តិសេដ្ឋកិច្ចឆ្នាំ២០០៨។ វិបត្តិនេះបានបណ្តាលពលរដ្ឋអាមេរិកដែលបាត់បង់ការងារ និងជាប់ជំពាក់បំណុលធនាគារធ្លាក់ខ្លួនចូលទៅក្នុងវិបត្តិផ្លូវចិត្តធ្ងន់ធ្ងរ។ ហើយចំពោះអ្នកមានបញ្ហាជម្ងឺផ្លូវចិត្តស្រាប់ ពួកគេកាន់តែមិនអាចងើបខ្លួនឲ្យចេញផុតពីវិបត្តិនេះបានឡើយ។
វិបត្តិផ្លូវចិត្តក៏ជះឥទ្ធិពលអាក្រក់ និងបង្កផលវិបាកយ៉ាងច្រើនដល់អ្នកជម្ងឺរហូតធ្វើឲ្យគុណភាពជីវិត និងសេចក្តីសង្ឃឹមរស់នៅរបស់គេកាន់តែថយចុះជាលំដាប់។ បើតាមអ្នកជំនាញ ចំពោះអ្នកមានជម្ងឺផ្លូវចិត្តធ្ងន់ធ្ងរឈានទៅដល់ជម្ងឺវិកលចរិត ពួកគេមានសេចក្តីសង្ឃឹមរស់នៅថយចំនួន ២៥ ឆ្នាំ។ នេះប្រសិនបើយើងប្រៀបធៀបជាមួយនឹងប្រជាជនធម្មតាដែលពុំមានអាការៈជម្ងឺបែបនេះ។ បើតាមលោកស្រីវេជ្ជបណ្ឌិត Weissman អ្នកជម្ងឺមានអាយុចន្លោះពី៤៥ ទៅ៥៩ ឆ្នាំ គឺជាក្រុមអ្នកជម្ងឺដែលប្រឈមនឹងហានិភ័យខ្ពង់ជាងគេ។
ដោយសារមូលហេតុនេះហើយបានជាអត្រាអ្នកធ្វើអត្តឃាតកាន់តែកើនខ្ពស់ក្នុងចំណោមមនុស្សក្នុងវ័យនេះ។ ជាមធ្យម មានពលរដ្ឋអាមេរិកប្រមាណ ៤ ៣០០ នាក់ ក្នុងមួយឆ្នាំ ដែលបានសម្រេចចិត្តប្រល័យជីវិតខ្លួនឯងដោយសារតែវិបត្តិផ្លូវចិត្តតាមយារយី។
តាមរយៈការសិក្សានេះក៏បានឲ្យដឹងផងដែរថា មួយភាគធំនៃអ្នកមានជម្ងឺផ្លូវចិត្ត ពួកគេពុំទទួលបានសេវាកម្មព្យាបាលឡើយ។ មានមូលហេតុពីរយ៉ាងដែលធ្វើឲ្យអ្នកជម្ងឺទាំងនោះពុំទទួលបានការព្យាបាលត្រឹមត្រូវ៖ ១)គឺអាចបណ្តាលមកពីអ្នកជម្ងឺទាំងនោះគ្មានមធ្យោបាយថវិកាគ្រប់គ្រាន់ ២)គឺប្រហែលជាអ្នកជម្ងឺទាំងនោះពុំអាចស្វែងរកដំណោះស្រាយបានដោយសារតែស្ថានភាពអាការៈជម្ងឺរបស់ពួកគេធ្ងន់ធ្ងរពេក។ ម៉្យាងទៀត វិបត្តិសេដ្ឋកិច្ច និងសង្គមបាននាំឲ្យអ្នកជម្ងឺមួយចំនួនធំសំងំលាក់ខ្លួនពួនអាត្មាតែម្នាក់ឯងដោយពុំហ៊ានសុំជំនួយពីខាងក្រៅ ដែលនេះជាការលំបាកក្នុងផ្តល់សេវាកម្មព្យាបាលដល់ពួកគេ។
លើសពីនេះ ការថយចុះគុណភាពនៃសេវាកម្មសុខាភិបាលផែ្នកជម្ងឺផ្លូវចិត្ត និងជម្ងឺវិកលចរិតក៏ជាចំណែកមួយសំខាន់ផងដែរ។ អ្នកជម្ងឺនោះពុំមានការធានាសុខភាពឯកជនឡើយ។ ហើយនេះជាឧបសគ្គមួយរាំងស្ទះមិនអាចអនុញ្ញាតឲ្យពួកគេមានឱកាសបានទៅជួបពិគ្រោះជម្ងឺជាមួយគ្រូពេទ្យឯកទេសផ្លូវចិត្ត។ ម៉្យាងទៀត មួយផែ្នកធំនៃអ្នកជម្ងឺក៏គ្មានការធានារ៉ាប់រងដើម្បីអាចទិញថ្នាំពេទ្យព្យាបាល។ លើសពីនេះ កង្វះគ្រូពេទ្យឯកទេសផែ្នកជម្ងឺផ្លូវចិត្ត និងជម្ងឺវិកលចរិតក៏ជាកត្តាមួយជំរុញឲ្យមានអ្នកជម្ងឺកាន់តែកើនឡើងផងដែរ។
សូមបញ្ជាក់ថា កាលពីឆ្នាំ២០០៨ សភាអាមេរិកបានអនុម័តច្បាប់ពិសេសមួយស្តីពីការផ្តល់សេវាប្រកបដោយសមភាពដល់អ្នកជម្ងឺផ្លូវចិត្ត។ លើសពីនេះ កាលពីឆ្នាំ២០១០ ច្បាប់ធានារ៉ាប់រងសុខភាព Obamacare ដែលផ្តល់សេវាសុខភាពឥតគិតថ្លៃដល់ពលរដ្ឋក្រីក្រក៏ត្រូវបានសភាអនុម័តផងដែរ។ ប៉ុន្តែ ជាក់ស្តែង ច្បាប់ទាំងពីរនេះពុំបានជួយអ្វីបន្តិចសោះឡើយដល់អ្នកជម្ងឺផ្លូវចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ