អាមេរិកបំពាក់អាវុធឲ្យក្រុមគួឌីស្ថាន នៅស៊ីរី ដើម្បីប្រយុទ្ធប្រឆាំងនឹងក្រុមជីហាត
រដ្ឋបាលអាមេរិករបស់លោកដូណាល់ត្រាំ នៅថ្ងៃអង្គារទី ៩ឧសភា បានសម្រេចបំពាក់អាវុធឲ្យក្រុមគួឌីស្ថាន នៅស៊ីរី នោះបើទោះបីជាមានការចេញមុខប្រឆាំង ដ៏ខ្លាំងក្លាពីរដ្ឋាភិបាលតួកគី ដែលសម្ព័ន្ធមិត្តរបស់អាមេរិកក៏ដោយ។ ទីក្រុងអង់ការ៉ាដែលធ្លាប់ចេញទៅទម្លាក់គ្រាប់បែកវាយប្រហារក្រុមគួឌីស្ថាននៅស៊ីរី បានចាត់ទុកក្រុមនេះជាដៃជើង គ្នីគ្នារបស់ក្រុមគួដតួកគី ដែលជាសត្រូវសួរពូជរបស់រដ្ឋាភិបាលតួកគី។
ចុះផ្សាយនៅថ្ងៃ៖ កែប្រែថ្ងៃទី៖
រដ្ឋាភិបាលតួកគី តាមរយៈឧបនាយករដ្ឋមន្រ្តីបានប្រតិកម្មខ្លាំងនៅថ្ងៃពុធនេះ ដោយចាត់ទុកការសម្រេចចិត្តរបស់ទីក្រុងវ៉ាស៊ីនតោនថា ជាការមិនអាចទទួលយកបាន។ នៅថ្ងៃអង្គារ លោកប្រធានាធិបតីអាមេរិក ដូណាល់ ត្រាំ បានសម្រេចយល់ព្រមតាមសំណើរបស់មន្ទីរបញ្ចកោន ដែលចង់ឲ្យអាមេរិកបំពាក់អាវុធដល់ទាហានរបស់ក្រុមគួឌីស្ថាន នៅប្រទេសស៊ីរី។ តាមអ្នកនាំពាក្យរបស់ក្រសួងការពារជាតិអាមេរិក លោកJeff Davis លោកប្រធានាធិបតីអាមេរិកបានអនុញ្ញាតឲ្យមន្ទីរបញ្ចកោនផ្តល់អាវុធដល់ក្រុមទាហានគួឌីស្ថាន ស៊ីរី ដើម្បីវាយឈ្នះលើក្រុមជីហាត អង្គការរដ្ឋអ៊ីស្លាម នៅទីក្រុងរ៉ាកា ក្នុងទឹកដីស៊ីរី។
កម្លាំងប្រជាធិបតេយ្យស៊ីរី ដែលជាសម្ព័ន្ធអារ៉ាប់ គួឌីស្ថានបានស្វាគមការសម្រេចចិត្តរបស់ទីក្រុងវ៉ាស៊ីនតោន ដែលបើតាមពួកគេ គឺនឹងជួយឲ្យគេវាយឈ្នះកាន់តែឆាប់ ក្រុមជីហាត អង្គការរដ្ឋអ៊ីស្លាមនៅស៊ីរី។
មន្រ្តីយោធាជាន់ខ្ពស់ម្នាក់របស់ក្រសួងការពារជាតិអាមេរិក ដែលសុំមិនបញ្ចេញឈ្មោះ បាននិយាយថា ជាមួយនឹងភ្លើងខៀវរបស់ប្រធានាធិបតី អាមេរិកអាចផ្តល់ទៅឲ្យក្រុមទាហានគួឌីស្ថាន ស៊ីរី នូវអាវុធធុនស្រាល គ្រាប់បែក និងរថពាសដែកជាដើម។
ផ្តល់អាវុធទៅឲ្យក្រុមគួឌីស្ថានស៊ីរី ដែលតួកគី បានចាត់ទុកជាសត្រូវរួមគ្នាជាមួយក្រុមគួឌីស្ថានតួកគី តើអាមេរិករបស់លោកដូណាល់ត្រាំ ប្រុងដើរនយោបាយអ្វីជាមួយតួកគី ដែលជាដៃគូ សម្ព័ន្ធមិត្ត សំខាន់របស់អាមេរិក នៅក្នុងអង្គការអូតង់។ ម្យ៉ាងទៀត ការសម្រេចចិត្តរបស់លោកដូណាល់ ត្រាំ បំពាក់អាវុធឲ្យក្រុមគួឌីស្ថាន ធ្វើឡើងនៅតែមួយអាទិត្យ មុនដែលលោកប្រធានាធិបតីតួកគី លោករេស៊ីប អ៊ែរដូហ្កាន ត្រូវធ្វើដំណើរទស្សនកិច្ចផ្លូវរដ្ឋទៅទីក្រុងវ៉ាស៊ីនតោន។ នៅក្នុងវេទិកាសាធារណៈ កាលពីពីរសប្តាហ៍មុន លោកប្រធានាធិបតីតួកគី ធ្លាប់បានអះអាងថា លោកនឹងបញ្ចុះបញ្ចូល លោកដូណាល់ ត្រាំ ឲ្យយល់ឃើញថា ក្រុមគួឌីស្ថាន ស៊ីរី ដែលអាមេរិកកំពុងជួយផ្នែកសព្វាវុធ តាមពិតជាសាខា គ្នីគ្នារបស់ក្រុមគួឌីស្ថានតួកគី ដែលអង់ការ៉ា និងប្រទេសលោកខាងលិច ចាត់ចូលក្នុងបញ្ជីរភេរវនិយមពិភពលោក។
មជ្ឈមណ្ឌលប្រឆាំងភេរវកម្មអាមេរិកផ្ទាល់ធ្លាប់បានចាត់ទុកក្រុមគួឌីស្ថានស៊ីរីថា ជាក្រុមភេរវនិយម ប៉ុន្តែ អាមេរិកបានប្តូរជំហរនេះមកវិញ នៅឆ្នាំ ២០១៤ នៅពេលទ័ពអាមេរិកចាប់ផ្តើមរួមដៃធ្វើការជាមួយក្រុមនេះ ដើម្បីប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាម នៅស៊ីរី។
សម្រាប់អ្នកវិភាគមួយចំនួន វ៉ាស៊ីនតោននឹងធ្វើឲ្យរដ្ឋាភិបាលតួកគីខឹងក្តៅក្រហាយ។ ទីក្រុងអង់ការ៉ានៅតែបារម្ភខ្លាចជាប់ជានិច្ចថា ក្រុមគួឌីស្ថាន នៅស៊ីរី នឹងរួមកម្លាំងជាមួយក្រុមគួឌីស្ថានតួកគី ដើម្បីបង្កអសន្តិសុខ ដណ្តើមកាន់កាប់ទឹកដី នៅតាមព្រំដែនតួកគី ស៊ីរី។ កងទ័ពតួកគី និងក្រុមទាហានគួឌីស្ថានស៊ីរី ឧស្សាហ៍ប៉ះទង្គិចអាវុធគ្នា នៅតាមបណ្តោយព្រំដែនតួកគីស៊ីរី។ នៅខែមេសា កន្លងទៅ កងទ័ពតួកគីថែមទាំងបានទៅទម្លាក់គ្រាប់បែកលើទីស្នាក់ការកណ្តាលរបស់ក្រុមគួឌីស្ថាន ស៊ីរី ដោយបានសម្លាប់មនុស្ស២៨នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ