ក្រោយសក្ខីកម្មរបស់លោកខមី លោកត្រាំ ចង់ផ្តល់ចម្លើយ ដោយហ៊ានស្បថ
បន្ទាប់ស្ងប់ស្ងាត់ខុសទម្លាប់អស់ពេញមួយថ្ងៃ លោកត្រាំ បានលេចមុខបញ្ចេញប្រតិកម្មតបនឹងការចោទប្រកាន់របស់អតីតប្រធានFBI តាមគ្រប់មធ្យោបាយ ដោយសារទ្វីត និងក្នុងពេលធ្វើសន្និសីទកាសែតជាសាធារណៈ។ លោក ត្រាំ បានបដិសេធថាមិនបានរារាំងដំណើរការអង្កេត ហើយបានចង្អុលមុខលោក ខមី វិញថានិយាយមិនពិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
បន្ទាប់ពីទុកពេលឱ្យតែមេធាវីជាអ្នកបញ្ចេញប្រតិកម្ម តបនឹងពាក្យដាក់បន្ទុករបស់ចេមស៍ ខមី លោក ត្រាំបានសរសេរសារទ្វីតជាថ្មី ថាលោក ក្រៅអំពីភ និងធ្វើសេចក្តីថ្លែងការណ៍ខុស ... លោក ខមី ជាជញ្ជីង ! ពេលរសៀលបន្តិច លោក ត្រាំ បានបញ្ចេញប្រតិកម្មជាន់បន្ថែមមួយកំរិត នៅក្នុងសន្និសីទរួមគ្នាជាមួយប្រធានាធិបតី រ៉ូមានី ថា ចេមស៍ ខមី បានបញ្ជាក់ច្រើននូវអ្វីជាប្រសាសន៍លោក ហើយពាក្យខ្លះ មិនពិត។
ដូច្នេះអ្នកដែលកុហក គឺលោក ខមី មិនមែនលោកទេ ! លោកត្រាំ ក៏បានបដិសេធដែរថាមិនបានស្នើសុំអតីតនាយកទីភ្នាក់ងារចារកិច្ចFBIនេះ ឱ្យបញ្ឈប់ការអង្កេត ប្រឆាំងនឹងអតីតទីប្រឹក្សាសន្តិសុខ Michael Flynn ក្នុងសំណុំរឿងសង្ស័យមានពាក់ព័ន្ធនឹងរុស្ស៊ីឡើយ។ លោក ត្រាំបានសម្តែងការហួសចិត្តចង់អស់សំណើចនឹង គំនិតថាលោកជាប្រធានាធិបតី ត្រូវទៅសុំអ្វីមួយពីលោក ខមី។
ចុះតើលោកត្រាំ ពិតជាមានលួចថតកិច្ចសន្ទនាជាមួយអតីតមេប៉ូលិសខមី មែនឬ ? លោក ត្រាំបានព្រលយពាក្យនេះឡើង ហើយសន្យានឹងលម្អិតនៅថ្ងៃក្រោយ។ តែខ្សែអាត់ថតសំឡេងទំនងគ្រាន់តែជាបំផ្លើសបង្អើលតែប៉ុណ្ណោះ។ ម្សិលមិញ អ្នកទទួលខុសត្រូវអង្កេត ដឹកនាំដោយគណៈកម្មការស៊ើបការណ៍សភា បានស្នើសុំពីលោក ខមី នូវកំណត់ត្រាដែលកត់ពេលជជែកជាមួយលោក ត្រាំ និងសុំពីសេតវិមាននូវរាល់ឯកសារថតសំឡេងឬកំណត់ត្រាផ្សេងទាក់ទងនឹងជំនួបរវាងអ្នកទាំងពីរ។
បើម្ខាងៗចោទគ្នាថានិយាយភ ចុះតើធ្វើដូចម្តេចនឹងដឹងការពិត ? លោក ត្រាំ បានប្រកាសត្រៀមខ្លួនជាស្រេច ១០០% ចូលទៅផ្តល់សក្ខីកម្ម ក្រោមពាក្យសម្បថ នៅចំពោះមុខរដ្ឋអាជ្ញាពិសេស ដែលដឹកនាំអង្កេតសំណុំរឿងសង្ស័យរុស្ស៊ីចូលជ្រៀតជ្រែកក្នុងយុទ្ធនាការបោះឆ្នោតប្រធានាធិបតីអាមេរិកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ