ផែនការ Marshall របស់សហរដ្ឋអាមេរិកដើម្បីស្រោចស្រង់អឺរ៉ុបមានអាយុ ៧០ ឆ្នាំហើយ
ចុះផ្សាយនៅថ្ងៃ៖
ស្តាប់ - ០៤:២៧
គិតមកដល់ពេលនេះ ផែនការ Marshall មានអាយុ ៧០ ឆ្នាំហើយ។ ផែនការសេដ្ឋកិច្ចនេះត្រូវបានសហរដ្ឋអាមេរិកបង្កើតឡើង ដើម្បីស្រោចស្រង់អឺរ៉ុបក្រោយសង្គ្រាមលោកលើកទី២។ បើទោះបីជាផែនការនេះលែងនៅមានទៀតក៏ដោយ ប៉ុន្តែ ឥទ្ធិពលនៃផែនការសេដ្ឋកិច្ចដើម្បីសង្គ្រោះអឺរ៉ុបនេះនៅតែបន្សល់ទុកកេរដំណែល ដែលជាភស្តុតាងនៃការកសាងអឺរ៉ុបក្នុងសតវត្សទី២០។ តាមរយៈកិច្ចអន្តរាគមន៍របស់សហរដ្ឋអាមេរិក បណ្តាប្រទេសអឺរ៉ុបហត្ថលេខីនៃផែនការសេដ្ឋកិច្ចនេះបានស្គាល់ភាពរុងរឿងរហូតមកដល់សព្វថ្ងៃ។
កាលពីថ្ងៃពុធ៍ទី ២១ មិថុនា កន្លងទៅនេះ លោកស្រី Angela Merkel អធិការបតីអាល្លឺម៉ង់បានប្រាព្ធពិធីគំរប់ខួបទី ៧០ឆ្នាំ នៃការបង្កើតផែនការ Marshall។ លោក Henry Kissinger អតីតៈរដ្ឋមន្រ្តីការបរទេសអាមេរិកក៏បានបង្ហាញវត្តមាននៅក្នុងពិធីនេះផងដែរ។ សូមរំលឹកជូនថា ផែនការ Marshall គឺជាកម្មវិធីសេដ្ឋកិច្ចដែលសហរដ្ឋអាមេរិកបានបង្កើតឡើង ក្នុងទម្រង់ជាការផ្តល់ប្រាក់កច្ចីដល់បណ្តាប្រទេសនៅទ្វីបអឺរ៉ុប ដើម្បីឲ្យប្រទេសទាំងនោះអាចកសាងសេដ្ឋកិច្ចខ្លួនឡើងវិញក្រោយពីបានខ្ទេចខ្ទាំដោយសារសង្គ្រាមលោកលើកទី២។
កាលពីតំបូងឡើយ ផែនការស្តារសេដ្ឋកិច្ចអឺរ៉ុបនេះត្រូវបានប្រកាសកាលពីថ្ងៃទី៥ មិថុនា ឆ្នាំ១៩៤៧ នាសាកលវិទ្យាល័យ Havard ដោយលោក George Marshall រដ្ឋមន្រ្តីការបរទេសអាមេរិក។ ៤ ខែក្រោយមក មានប្រទេសអឺរ៉ុបចំនួន ១៦ បានចុះហត្ថលេខាយល់ព្រមទទួលយកសំណើរបស់អាមេរិកនេះ។ លើកលែងតែសាធារណរដ្ឋសហព័ន្ធអាល្លឺម៉ង់តែប៉ុណ្ណោះ ដែលនៅរារែកចិត្តនៅឡើយ។ ទាល់តែ ២ ឆ្នាំក្រោយមកទើប អាល្លឺម៉ង់សុខចិត្តហត្ថលេខាទទួលយកជំនួយសេដ្ឋកិច្ចអាមេរិក។
ចន្លោះពីឆ្នាំ១៩៤៧ រហូតដល់ឆ្នាំ១៩៥១ ផែនការ Marshall បានបញ្ចេញសាច់ប្រាក់ចំនួន ១៣ ពាន់លានដុល្លារដល់បណ្តាប្រទេសនៅអឺរ៉ុប។ បើយើងគិតពីអត្រាអតិផរណាចាប់តាំងពីឆ្នាំ១៩៤៧ មក បច្ចុប្បន្ននេះ គឺឆ្នាំ២០១៧ ទំហំទឹកលុយនេះស្មើនឹងប្រមាណ ១៤៥ពាន់លានដុល្លារ។ ប្រទេសដែលទទួលបានប្រយោធន៍ចម្បងពីផែនការ Marshall នេះ គឺអង់គ្លេស និងបារាំង។ ក្នុងចំណោមទឹកប្រាក់ ១៣ ពាន់លានដុល្លារ ប្រទេសទាំងពីរនេះបានទទួលជំនួយអាមេរិករហូតទៅដល់ ៤៩% ឯណោះ។
ពោល គឺអង់គ្លេសទទួលបាន ២៦% ហើយបារាំងទទួលបាន ២៣%។ ចំពោះប្រទេសអាល្លឺម៉ង់វិញ ផែនការ Marshall នេះក៏បានធ្វើឲ្យសេដ្ឋកិច្ចអាល្លឺម៉ង់មានភាពរុងរឿងរហូតមកដល់សព្វថ្ងៃនេះ។ ជាសរុប អាល្លឺម៉ង់បានទទួលជំនួយជាទឹកប្រាក់ចំនួន ១,៤ ពាន់លានដុល្លារពីសហរដ្ឋអាមេរិក។ លោកស្រី Angela Merkel បានទទួលស្គាល់ថា ផែនការ Marshall នេះពិតជាបានជួយបណ្តាប្រទេសអឺរ៉ុបឲ្យងើបខ្លួនឡើងវិញ ក្រោយពីត្រូវបានបំផ្លិចបំផ្លាញដោយសារតែសង្គ្រាមលោកលើកទី២។ ប៉ុន្តែ លោកស្រី ក៏បានឆ្លៀតរំលឹកផងដែរថា ផែនការស្តារសេដ្ឋកិច្ចអឺរ៉ុបនេះក៏បានផ្តល់ផលប្រយោធន៍ទៅឲ្យសហរដ្ឋអាមេរិកច្រើនសន្ធឹកសន្ធាប់ផងដែរ។
តួយ៉ាង គឺបណ្តាប្រទេសហត្ថលេខីនៃផែនការនេះចាំបាច់ត្រូវកសាងប្រទេសខ្លួនឡើងវិញ ដោយយកសហរដ្ឋអាមេរិកជាសហភាគហ៊ុននិក (បានន័យថាជាអ្នកចូលភាគហ៊ុនផង) និងជាដៃគូពាណិជ្ជកម្មផង ។ ដូចនេះ ជំនួយរបស់អាមេរិកចំពោះអឺរ៉ុបកាលពីឆ្នាំ១៩៤៧ ពុំមែនជាជំនួយគ្មានលក្ខខណ្ឌឡើយ។ កាលពីសម័យនោះ លោកប្រធានាធិបតី Harry Truman ដែលបានកាន់អំណាចចន្លោះពីឆ្នាំ១៩៤៥ ដល់ឆ្នាំ ១៩៥៣ បានប្រើប្រាស់ផែនការ Marshall នេះជាលេស ក្នុងគោលដៅបង្អាកនយោបាយវាតទីនិយមរបស់សហភាពសូវៀតនៅទ្វីបអឺរ៉ុប។
តាមរយៈជំនួយជ្រោមជ្រែងនេះ អឺរ៉ុបដែលទើបតែរើបខ្លួនពីសង្គ្រាម អឺរ៉ុបដែលទើបតែទទួលបានទទួលលុយដុល្លារថ្មីៗ ក៏ចាប់ផ្តើមប្រើប្រាស់គ្រឿងឧបភោគបរិភោគមកពីអាមេរិក។ ទីផ្សារសេដ្ឋកិច្ចអឺរ៉ុប ជាពិសេសអង់គ្លេស និងបារាំងក៏បានប្រែខ្លួនជាទីផ្សារសេរីភ្លាមៗ ដើម្បីសំរួលដល់ការនាំចូលទំនិញមកពីសហរដ្ឋអាមេរិក។ ក្រោយមក បណ្តាប្រទេសនៅអឺរ៉ុបទាំងមូលបានយកគំរូសេដ្ឋកិច្ចពីអាមេរិក គឺផលិតកម្ម និងការនាំចេញ។ ក្រៅពីទំនិញ សហរដ្ឋអាមេរិកក៏បាននាំចេញយ៉ាងគំហុកចូលទៅទីផ្សារអឺរ៉ុបផងដែរនូវ សារធាតុដើម ថាមពល និងគ្រឿងម៉ាស៊ីនជាដើម ដើម្បីយកទៅបំពាក់បណ្តារោងចក្រ អឺរ៉ុប ដែលទើបតែសាងសង់ថ្មីៗ។
ចំពោះអាល្លឺម៉ង់នេះទៀតសោត អន្តរាគមន៍អាមេរិកមិនមានត្រឹមតែការធ្វើឲ្យសេដ្ឋកិច្ចអាល្លឺម៉ង់រីកលូតលាស់ប៉ុណ្ណោះទេ។ប៉ុន្តែ សហរដ្ឋអាមេរិកក៏បានជួយសម្រួលឲ្យអាល្លឺម៉ង់ចៀសវាង និងពន្យឺតការបង់ថ្លៃសំណងចិត្តសង្គ្រាមលោកលើកទី២ ដល់បណ្តាប្រទេសនៅអឺរ៉ុបដែលបានរងប៉ះពាល់ផងដែរ។ សម័យកាលនោះ សហរដ្ឋអាមេរិកបានបញ្ចុះបញ្ចូលបណ្តាប្រទេសអឺរ៉ុបរងគ្រោះឲ្យសុខចិត្តរង់ចាំទាមទារសំណងសង្គ្រាមពីអាល្លឺម៉ង់ នៅពេលណាដែលប្រទេសអាល្លឺម៉ង់ទាំងពីររួបរួមគ្នាឡើងវិញ។
ជាសរុប ចំនួនទឹកប្រាក់នៃផែនការស្តារសេដ្ឋកិច្ចអឺរ៉ុប Marshall នេះមិនច្រើនទេ។ បើយើងប្រៀបធៀបនឹងផែនការរបស់លោកអតីតៈប្រធានាធិបតី បារ៉ាក់ អូបាម៉ា ដើម្បីស្តារសេដ្ឋកិច្ចអាមេរិកកាលពីសម័យវិបត្តិហិរញ្ញវត្ថុឆ្នាំ ២០០៨ យើងឃើញថាទំហំទឹកប្រាក់មានរហូតទៅដល់ ៧៨៧ ពាន់លានដុល្លារឯណោះ។ ពោល គឺលើសផែនការ Marshall រហូតទៅដល់ ៧ ដង។ ហើយពាក្យថា «ផែនការ Marshall» នេះក៏បន្សល់ទុកចំហាយសាយភាពរហូតមកដល់សព្វថ្ងៃនេះ។ តួយ៉ាងដូចជាកាលពីកិច្ចប្រជុំប្រទេស G20 កាលពីថ្ងៃទី១២ និង ១៣ មិថុនាកន្លងទៅនេះ បណ្តាប្រមុខដឹកនាំប្រទេសនានានៅទ្វីបអាហ្វ្រិកបានមកជួបជុំគ្នានៅទីក្រុងប៊ែរឡាំង ប្រទេសអាល្លឺម៉ង់។
ប្រធានបទសន្និសីទនេះ គឺទាក់ទងនឹងការបង្កើតភាពជាដៃគូរវាងទ្វីបអាហ្វ្រិក និងប្រទេស G20។ នាឱកាសនោះលោកស្រី Angela Merkel បានទទួលស្វាគមន៍បណ្តាមេដឹកនាំអាហ្រ្វិក ហើយលោកស្រីបានអំពាវនាវឲ្យបង្កើតភាពជាដៃគូអភិឌ្ឍន៍ជាមួយប្រទេសអាហ្វ្រិកណា ដែលមានលទ្ធភាពអាចធានាសន្តិភាព ស្ថេរភាព និងសន្តិសុខ។ តាមរយៈការបោះដៃរបស់អាល្លឺម៉ង់បែបនេះទៅរកអាហ្វ្រិកលោក Alassane Ouattara ប្រធានាធិបតីកូតឌីវ័រ បានហៅឆន្ទៈរបស់ប្រមុខដឹកនាំអាល្លឺម៉ង់ថាជា «ផែនការ Merkel»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ