ពលរដ្ឋវ៉េណេស៊ុយអេឡាជាង៧លាននាក់បោះឆ្នោតប្រជាមតិរៀបចំដោយក្រុមប្រឆាំងនឹងប្រធានាធិបតី
ថ្ងៃអាទិត្យម្សិលមិញ ប្រជាជនវ៉េណេស៊ុយអេឡាជាង៧លាន១សែន៨ម៉ឺននាក់បាននាំគ្នាបោះឆ្នោតប្រជាមតិដែលរៀបចំដោយក្រុមប្រឆាំងប្រធានាធិបតីម៉ាឌូរ៉ូ។ ប្រជាមតិនេះមានទិសដៅទាត់ចោលគម្រោងរដ្ឋធម្មនុញ្ញរបស់លោកម៉ាឌូរ៉ូ ដាក់សម្ពាធលើប្រធានាធិបតីថែមទៀត។ អ្នកបោះឆ្នោតជាង៩៨ភាគរយ បានបោះឆ្នោតប្រឆាំងលោកម៉ាឌូរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ប្រជាមតិនៅវ៉េណេស៊ុយអេឡា ថ្ងៃអាទិត្យម្សិលមិញ ជាប្រជាមតិរៀបចំឡើងដោយក្រុមប្រឆាំងប្រធានាធិបតី ម៉ាឌូរ៉ូ។ មិនមែនជាប្រជាមតិផ្លូវការទេ។ លោកម៉ាឌូរ៉ូបានចាត់ទុក ប្រជាមតិនេះ ថាខុសច្បាប់។ ប៉ុន្តែ ក្នុងចំណោមអ្នកបោះឆ្នោត១៩លាន៥សែននាក់ ក្រុមប្រឆាំងអាចប្រមូលបានអ្នកដែលទៅបោះឆ្នោតបានជាង៧លាននាក់ ទាំងក្នុងប្រទេសនិងក្រៅប្រទេស។ អ្នកបោះឆ្នោតនៅបរទេស បើយោងតាមក្រុមប្រឆាំងមានដល់១លាននាក់។ សូមបញ្ជាក់ដែរថា វ៉េណេស៊ុយអេឡា មានប្រជាជនសរុបជាង៣០លាននាក់។
ប្រជាប្រិយភាពប្រធានាធិបតីម៉ាឌូរ៉ូកំពុងធ្លាក់ចុះខ្លាំង ដោយសារវិបត្តិសេដ្ឋកិច្ច និងបាតុកម្មរ៉ាំរ៉ៃ៣ខែមកនេះ។ អាជ្ញាធរបានបង្ក្រាបបាតុកម្ម ធ្វើអោយមានមនុស្សស្លាប់ជាង១០០នាក់។
ខ្លឹមសារប្រជាមតិវ៉េណេស៊ុយអេឡា ម្សិលមិញនេះ ផ្តោតលើសំនួរចំនួន៣ ដែលអ្នកបោះឆ្នោតត្រូវឆ្លើយ។ អ្នកដែលបានបោះឆ្នោត៩៨,៣ភាគរយ បានបោះឆ្នោតទាត់ចោលគម្រោងរដ្ឋធម្មនុញ្ញរបស់ប្រធានាធិបតី និងបង្ហាញបំណងចង់អោយកងទ័ពការពាររដ្ឋធម្មនុញ្ញបច្ចុប្បន្ននេះ ព្រមទាំងចង់អោយមានការបោះឆ្នោតមុនអាណត្តិ នៅឆ្នាំ២០១៨។ ដោយឡែក ម្សិលមិញនេះ មានស្ត្រីអាយុ៦១ឆ្នាំម្នាក់បានសម្លាប់ និងមនុស្ស៣នាក់រងរបួស ដោយសារការបាញ់ប្រហារ ក្នុងសង្កាត់ជនក្រីក្រមួយ នៅទីក្រុងការ៉ាកាស។ បើយោងតាមសម្ព័ន្ធក្រុមប្រឆាំង ហិង្សានេះជាស្នាដៃរបស់ក្រុមទាហានមួយក្រុម។
តាំងពីចាញ់ឆ្នោតសភាឆ្នាំ២០១៥មក ប្រធានាធិបតីម៉ាឌូរ៉ូបានបដិសេធទទួលស្គាល់សភា និង ចង់អោយមានរដ្ឋធម្មនុញ្ញមួយថ្មី មកជំនួសរដ្ឋធម្មនុញ្ញឆ្នាំ១៩៩៩។ លោកម៉ាឌូរ៉ូធ្លាប់ប្រាប់ថា រដ្ឋធម្មនុញ្ញនេះចេញផ្ទាល់មកពីប្រជាជននិងកម្មករក្នុងស្រុកតែម្តង មិនមែនជារដ្ឋធម្មនុញ្ញគណបក្សនយោបាយទេ។ លោកចង់អោយសមាជិកសភាមួយចំណែក ទទួលបានការបោះឆ្នោតគាំទ្រពីមនុស្សគ្រប់ស្រទាប់វណ្ណៈក្នុងសង្គម បែបយ៉ាង អ្នកចូលនិវត្តន៍ ជនពិការ រឺក៏ខាងផ្នែកសហគ្រាសជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ